🔯বঙাইগাঁৱত পঞ্চায়ত আৰু গ্ৰামোন্নয়নৰ কাম-কাজ ক্ষীপ্ৰ কৰাৰ নিৰ্দেশ উপায়ুক্তৰ

🔯বঙাইগাঁৱত পঞ্চায়ত আৰু গ্ৰামোন্নয়নৰ কাম-কাজ ক্ষীপ্ৰ কৰাৰ নিৰ্দেশ উপায়ুক্তৰ

📝বঙাইগাঁওঃ ২৬ জুলাইঃ আজি বঙাইগাঁও জিলাৰ উপায়ুক্ত ডা:এম এচ লক্ষ্মী প্ৰিয়াই জিলাখনত পঞ্চায়ত আৰু গ্ৰামোন্নয়ন বিভাগৰ উন্নয়নমূলক কাম-কাজৰ পৰ্যালোচনা কৰে। জিলা পৰিষদৰ মুখ্য কাৰ্যবাহী বিষয়া নাদিৰা জেচমিন সমন্বিতে জিলাখনৰ ৰাষ্ট্ৰীয় গ্ৰামীণ জীৱিকা মিছনৰ জিলা আঁচনি প্ৰৱন্ধক, মাণিকপুৰ, ডাংতল, বইটামাৰী, সৃজনগ্ৰাম আৰু টাপাট্টাৰী উন্নয়ন খণ্ডৰ খণ্ড উন্নয়ন বিষয়াৰ লগতে আন বিষয়ববীয়াৰ সৈতে উপায়ুক্তৰ সভাকক্ষত অনুষ্ঠিত এই সভাত উপায়ুক্ত ডা:লক্ষ্মী প্ৰিয়াই মহাত্মা গান্ধী ৰাষ্ট্ৰীয় গ্ৰাম্য নিয়োগ নিশ্চিত আঁচনিৰ জব কাৰ্ড, প্ৰধানমন্ত্ৰী আৱাস যোজনা(গ্ৰামীণ), বৃদ্ধ পেঞ্চন , বিধৱা পেঞ্চন আদি আঁচনি সম্পৰ্কত সংশ্লিষ্ট বিষয়াসকলৰ সৈতে পৰ্যালোচনা কৰে।উপায়ুক্তগৰাকীয়ে জব কাৰ্ডৰ অধীনত কাম কৰা লোকসকলৰ কাম-কাজৰ বুজ লয় আৰু বৰ্তমানে চলি থকা মহাত্মা গান্ধী গ্ৰাম্য নিয়োগ নিশ্চিত আঁচনিৰ কামসমূহৰ অগ্ৰগতিৰ বুজ লয়। গ্ৰাম্য নিয়োগ নিশ্চিত আঁচনি হ'ল এনেকুৱা এখন আঁচনি যিখন আঁচনিৰ অধীনত লাভ কৰা পুঁজিৰ সদব্যৱহাৰ কৰি ৰাজহুৱা সম্পদ সৃষ্টি কৰিব পাৰি। 

তেওঁ মহাত্মা গান্ধী গ্ৰাম্য নিয়োগ নিশ্চিত আঁচনিৰ অধীনত মহিলাসকল আত্ম নিৰ্ভৰশীল হোৱা অৰ্থাৎ স্বনিৰ্ভৰ নাৰীৰ ওপৰত গুৰুত্ব আৰোপ কৰে যাতে মহিলাসকলো পুৰুষৰ সমানে আৰ্থিকভাৱে আত্মনিৰ্ভৰশীল হ'ব পাৰে। প্ৰাকৃতিক সম্পদ ব্যৱস্থাপনা( Natural Resource Management) আঁচনিৰ অধীনত বৰষুণৰ পানী সংৰক্ষণত গুৰুত্ব দিবলৈ খণ্ড উন্নয়ন বিষয়াসকলক  উপায়ুক্তগৰাকীয়ে আহ্বান জনায়। পঞ্চায়ত আৰু গ্ৰামোন্নয়ন বিভাগৰ কামসমূহত পুঁজি মুকলি কৰি দিয়াত যাতে কাৰিকৰী কাৰণত বিলম্ব নহয় সেয়া নিশ্চিত কৰিবলৈও উপায়ুক্তগৰাকীয়ে খণ্ড উন্নয়ন বিষয়াসকলক নিৰ্দেশ দিয়ে। সেইদৰে গ্ৰাম ৰোজগাৰ সেৱকসকলে যাতে দিবলগীয়া কামৰ প্ৰস্তাৱ সময়মতে দিয়ে আৰু কম্পিউটাৰ অপাৰেটৰসকলে সময়মতে আপলোড কৰে সেয়াও নিশ্চিত কৰিবলৈ উপায়ুক্তগৰাকীয়ে

নিৰ্দেশ দিয়ে ৷🔯