🔯চুপাৰি চিণ্ডিকেটৰ সৈতে জড়িত আব্দুল হান্নান আলীক জেৰা অব্যাহত ৰাখিছে বঙাইগাঁও আৰক্ষীয়ে

🔯চুপাৰি চিণ্ডিকেটৰ সৈতে জড়িত আব্দুল হান্নান আলীক জেৰা অব্যাহত ৰাখিছে বঙাইগাঁও আৰক্ষীয়ে 

📝বঙাইগাঁওঃ২০ জুলাইঃ বাৰ্মিজ চুপাৰিৰ অবৈধ  বেহা তথা চিণ্ডিকেটৰ সৈতে জড়িত অন্যতম নায়ক  আব্দুল হান্নান আলীক দেওবাৰে বঙাইগাঁও আৰক্ষীয়ে গোলাঘাট আৰক্ষীৰ সহযোগত  গোলাঘাটৰ পৰা গ্ৰেপ্তাৰ কৰি অনাৰ পিছত জেৰা অব্যাহত ৰাখিছে বঙাইগাঁও আৰক্ষীয়ে ৷ আজি বঙাইগাঁও জিলাৰ আৰক্ষী অধীক্ষক স্বপ্ননীল ডেকাই সংবাদ মাধ্যমৰ আগত কয় যে যোৱা মে মাহত বঙাইগাঁও আৰক্ষীয়ে বাৰ্মিজ চুপাৰিৰ বিৰুদ্ধে অভিযান চলাই বহু পৰিমাণৰ বাৰ্মিজ চুপাৰি জব্দ কৰিবলৈ সক্ষম হৈছিল ৷ এই সন্দৰ্ভত বঙাইগাঁও থানাত ৪৬০ /২১ নম্বৰৰ এটা গোচৰ ৰুজু কৰা হৈছিল ৷ সেই গোচৰৰ তদন্তৰ ভিত্তিত বঙাইগাঁও আৰক্ষীয়ে দেওবাৰে নিশা গোলাঘাট আৰক্ষীৰ সহায়ত গোলাঘাটৰ পৰা আব্দুল হান্নান আলী নামৰ ব্যক্তিজনক গ্ৰেপ্তাৰ কৰিবলৈ সক্ষম হয় ৷ ইতিমধ্যে আৰক্ষীয়ে ব্যক্তিজনক দুদিনৰ বাবে নিজৰ জিম্মালৈ আনিছে আৰু সোধ- পোছ অব্যাহত ৰাখিছে ৷ আৰক্ষী অধীক্ষকগৰাকীয়ে লগতে জনোৱা মতে ধৃত আব্দুল হান্নান আলীয়ে আৰক্ষীকক সোধ - পোছৰ সময়ত বাৰ্মিজ চুপাৰিৰ ব্যৱসায়ৰ লগত জড়িত থকা বুলি প্ৰকাশ কৰাৰ লগতে মণিপুৰৰ পৰা আনি অসমৰ বাহিৰৰ বিভিন্ন ঠাইত ব্যৱসায় কৰে বুলি প্ৰকাশ কৰে ৷ মণিপুৰৰ পৰা চোৰাংকৈ ক্ৰয় কৰি আনি পেকেজিং কৰি অসমৰ চুপাৰিৰ ৰূপ দি বাহিৰলৈ প্ৰেৰণ কৰে ৷ এই কামটো কৰোতে শুল্ক ফাঁকি দিয়ে ৷ 

উল্লেখ্য যে এই আব্দুল হান্নান আলী আদা , হালধী আদিৰ ব্যৱসায়ৰ লগতো জড়িত বুলি জানিব পৰা গৈছে ৷ সেইদৰে বাৰ্মিজ চুপাৰিৰ এই অবৈধ বেহাৰ এজন অন্যমত নায়ক আৰু অসমৰ বিভিন্ন ঠাইত চলি থকা অবৈধ বাৰ্মিজ চুপাৰিৰ বেহাৰ সৈতে প্ৰত্যক্ষভাৱে জড়িত বুলি অভিযোগ উত্থাপিত হৈ আহিছে ৷ এই বাৰ্মিজ চুপাৰিৰ অবৈধ বেহাৰ সৈতে ধৃত আব্দুল হান্নান আলীয়ে কেৱল জড়িত নহয় ৷ বৰং এজন মাৰোৱাৰী ব্যক্তি , এজন কাছাৰৰ ব্যক্তিকে ধৰি কেইবাজনো ব্যক্তি জড়িত হৈ থকা বুলিও অভিযোগ উত্থাপিত হৈ আহিছে ৷ এনে সময়তে ৰাজ্যৰ নতুন চৰকাৰখনৰ মুখ্যমন্ত্ৰী ড: হিমন্ত বিশ্ব শৰ্মাই চুপাৰি , গৰু ,কয়লা আদিৰ চিণ্ডিকেটৰ লগতে ড্ৰাগছ , চুলাই মদ আদিৰ বেহা বন্ধ কৰাৰ বাবে আৰক্ষীক কঠোৰ ব্যৱস্থা গ্ৰহণ কৰিবলৈ নিৰ্দেশ দিয়াৰ পিছতে এতিয়া আৰক্ষী বিভাগ উঠি পৰি লাগিছে আৰু ৰাজ্যৰ বিভিন্ন জিলাত অব্যাহত আছে এইবোৰৰ বিৰুদ্ধে অভিযান ৷ কিন্তু ৰাইজৰ প্ৰশ্ন যে কেৱল পুঠি , খলিহনাক গ্ৰেপ্তাৰ কৰিলেই জানো সকলো বন্ধ হ'ব নেকি ? এনে অবৈধ বেহা বন্ধ কৰিবলৈ হলে ইয়াৰ লগত জড়িত মূল ব্যক্তিসকলক গ্ৰেপ্তাৰ কৰি শাস্তি বিহিব লাগিব ৷ তেতিয়াহে মুখ্যমন্ত্ৰীয়ে বিচৰাৰ দৰে অসমৰ পৰা চিণ্ডিকেট, অবৈধ বেহা নাইকিয়া হ'ব ৷ ৰাইজেও এনে অসামাজিক কাৰ্য- কলাপ বন্ধ হোৱাটোকে বিচাৰে ৷ গতিকে আৰক্ষী বিভাগে চলাই থকা অভিযান অব্যাহত ৰখাতো বিচাৰিছে ৰাইজে ৷🔯