🔯বঙাইগাঁৱত মন্ত্ৰী ৰঞ্জিত কুমাৰ দাসৰ ' মুখ্যমন্ত্ৰীৰ ক'ভিড-১৯ বিধৱা সাহাৰ্য আঁচনি'ৰ অধীনত চেক বিতৰণ

🔯বঙাইগাঁৱত মন্ত্ৰী ৰঞ্জিত কুমাৰ দাসৰ ' মুখ্যমন্ত্ৰীৰ ক'ভিড-১৯ বিধৱা  সাহাৰ্য আঁচনি'ৰ অধীনত চেক বিতৰণ 

🔯আৱৰ্ত ভৱনত অভিভাৱক মন্ত্ৰীৰ কাৰ্যালয় মুকলি

📝বঙাইগাঁওঃ ১৭জুলাইঃ আজি বিয়লি জনস্বাস্থ্য কাৰিকৰী, পঞ্চায়ত আৰু গ্ৰামোন্নয়ন, খাদ্য, অসামৰিক যোগান আৰু উপভোক্তা পৰিক্ৰমা, সাধাৰণ প্ৰশাসন আদি বিভাগ তথা বঙাইগাঁও জিলাৰ অভিভাৱক মন্ত্ৰী ৰঞ্জিত কুমাৰ দাসে এক অনুষ্টুপীয়া অনুষ্ঠানত 'মুখ্যমন্ত্ৰীৰ ক'ভিড-১৯ বিধৱা সাহাৰ্য আঁচনি'ৰ অধীনত জিলাখনৰ স্বামীহাৰা বিধবা পত্নীলৈ চেক বিতৰণ কৰে। এই উপলক্ষে বঙাইগাঁও জিলা উপায়ুক্তৰ সভাকক্ষত জিলা উপায়ুক্ত ডাঃ এম এচ লক্ষ্মীপ্ৰিয়াই আঁত ধৰা অমুষ্ঠানত বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীৰ উপস্থিতিত জিলাখনৰ বঙাইগাঁও ৰাজহ চক্ৰৰ অন্তৰ্গত ১০ গৰাকী, বইটামাৰী ৰাজহ চক্ৰৰ ১০ গৰাকী, মাণিকপুৰ ৰাজহ চক্ৰৰ ৩ গৰাকী আৰু সৃজনগ্ৰাম ৰাজহ চক্ৰৰ অন্তৰ্গত ৪ গৰাকীসহ মুঠ ২৭ গৰাকী ক'ভিডত মৃত্যু হোৱা ব্যক্তিৰ বিধৱা পত্নীক চেক প্ৰদান কৰা হয়। 

ইপিনে চেক বিতৰণ কৰি দিয়া ভাষণত মন্ত্ৰী দাসে কয় যে অসমৰ মুখ্যমন্ত্ৰী হিমন্ত বিশ্ব শৰ্মাই প্ৰথমৰ পৰাই ক'ভিড-১৯ মহামাৰী সম্পৰ্কীয় পৰিস্থিতি চম্ভালিবলৈ সন্মুখৰ পৰাই নেতৃত্ব দি আহিছে আৰু ক'ভিডত যিসকল মহিলাৰ একমাত্ৰ উপাৰ্জনকাৰী স্বামী ক'ভিডত মৃত্যু হোৱাৰ বাবে পৰিয়াল চলাই নিবলৈ আৰ্থিক সমস্যা হৈছে তেওঁলোকৰ প্ৰতি সহমৰ্মিতা প্ৰদৰ্শন হেতু সাহাৰ্য হিচাপে বিধৱাসকলক ২.৫০ লাখ টকাৰ চেক প্ৰদান কৰাৰ  ব্যৱস্থা কৰিছে। তেওঁ জিলাখনত ক'ভিডৰ প্ৰথম আৰু দ্বিতীয় লহৰত বৰ্তমানলৈকে ১৬২ গৰাকী ব্যক্তিৰ মৃত্যু হোৱা বুলি উল্লেখ কৰি তাৰে ৩৭ গৰাকী ব্যক্তি বঙাইগাঁও জিলাৰ বাহিৰৰ আছিল বুলি কয় ৷ সেই ৩৭ গৰাকী ব্যক্তিক বাদ দি ক'ভিডৰ প্ৰথম লহৰত বঙাইগাঁও জিলাত ৩৫ গৰাকী আৰু দ্বিতীয় লহৰত ৯০ গৰাকী ব্যক্তিৰ মৃত্যু হোৱা বুলি উল্লেখ কৰে ৷ আনহাতে অনুষ্ঠানত উপস্থিত থাকি প্ৰাক্তন যোগান মন্ত্ৰী আৰু বৰ্তমানৰ বঙাইগাঁও সমষ্টিৰ বিধায়ক ফণীভূষণ চৌধুৰীয়ে বঙাইগাঁও জিলাক ক'ভিডমুক্ত কৰিবলৈ সকলো পক্ষকে আহ্বান জনায়। তদুপৰি পুনৰাই যাতে এনেদৰে কোনেও কো'ভিডত প্ৰাণ হেৰুৱাবলগীয়া নহয় তাৰ বাবে সজাগ হ'বলৈও আহ্বান জনায়।উপায়ুক্ত ডা:এম এচ লক্ষ্মীপ্ৰিয়াই অনুষ্ঠানৰ আৰম্ভণীতে উপস্থিত সকলোকে সম্ভাষণ জনায় ৷ অনুষ্ঠানত ক'ভিডত মৃত্যু হোৱা প্ৰতিজন লোকৰ আত্মাৰ শান্তিৰ বাবে এক মিনিট সময় মৌনতা অৱলম্বন কৰা হয় ৷ চেক বিতৰণ অনুষ্ঠানত জিলা উন্নয়ন আয়ুক্ত ভাস্কৰ দাস, জিলা পৰিষদৰ মুখ্য কাৰ্যবাহী বিষয়া নাদিৰা জেচমিন, অতিৰিক্ত উপায়ুক্তসকল, উত্তৰ শালমাৰা মহকুমাৰ মহকুমাধিপতি, চক্ৰ বিষয়াসকল, সহকাৰী আয়ুক্তসকল, যুটীয়া স্বাস্থ্য সেৱা সঞ্চালক আদি কৰি বিষয়াৰ লগতে হিতাধিকাৰীসকল উপস্থিত আছিল। উল্লেখ্য যে চেক বিতৰণ অনুষ্ঠানৰ পূৰ্ৱে বঙাইগাঁও আৱৰ্ত ভৱনত জিলাখনৰ অভিভাৱক মন্ত্ৰীগৰাকীৰ এটা কাৰ্যালয় মকলি কৰা হয় ৷ কাৰ্যালয়টো মন্ত্ৰী ৰঞ্জিত কুমাৰ দাসে মুকলি কৰে ৷ 

ইপিনে অনুষ্ঠানৰ শেষত মন্ত্ৰী ৰঞ্জিত কুমাৰ দাসে সংবাদ মাধ্যমৰ আগত কয় যে মুখ্যমন্ত্ৰী ডঃ হিমন্ত বিশ্ব শৰ্মাই ক'ভিডৰ প্ৰথম লহৰৰ লগতে দ্বিতীয় লহৰতো সন্মুখত থাকি নেতৃত্ব দিছিলে আৰু পৰৱৰ্তী সময়ত তেওঁ মুখ্যমন্ত্ৰী হোৱাৰ পিছত ক'ভিডত যিসকল ব্যক্তিয়ে মৃত্যুবৰণ কৰিলে সেইসকলৰ ভিতৰত প্ৰথম পৰ্যায়ত কিছু ব্যক্তিৰ প্ৰতি সহমৰ্মিতা প্ৰকাশ কৰি সমবেদনাৰ বাৰ্তা হিচাপে স্বামীহাৰা বিধৱা পত্নীক আঢ়ৈ লাখকৈ ধনৰাশি প্ৰদান কৰিছিলে ৷ আনুষ্ঠানিকভাৱে সমগ্ৰ কাৰ্যসূচীখিনি গুৱাহাটীত হৈছিল ৷ আমাক জিলাভিত্তিক অভিভাৱক মন্ত্ৰী হিচাপে জিলাসমূহত প্ৰদান কৰিবলৈ আহ্বান জনাইছিল ৷ মুখ্যমন্ত্ৰীৰ নিৰ্দেশতে আমি বঙাইগাঁও জিলাৰ ২৭ গৰাকী স্বামীহাৰা বিধৱা মহিলাক আঢ়ৈ লাখকৈ টকাৰ চেক প্ৰদান কৰিছো ৷ বঙাইগাঁও জিলাত  বৰ্তমান ২৭ গৰাকী ব্যক্তিৰ পৰিয়ালক চেক প্ৰদান কৰা হৈছে আৰু বাজেটত ইতিমধ্যে ধন ধাৰ্য কৰিছে ,গতিকে আগন্তুক দিনতো যাতে আমি ক'ভিডত মৃত্যু হোৱা স্বামীহাৰা মহিলাসকলক সহমৰ্মিতামূলক সাহাৰ্য প্ৰদান কৰিব পাৰো তাৰ কাৰণে আমাৰ তৰফৰ পৰা প্ৰয়াস কৰিম যাম৷🔯