🔯সাংসদ নৱ কুমাৰ শৰণীয়াৰ পৌৰোহিত্যত বঙাইগাঁও জিলা উন্নয়ন সমন্বয় আৰু নিৰীক্ষণ কমিটীৰ সভা সম্পন্ন

🔯সাংসদ নৱ কুমাৰ শৰণীয়াৰ পৌৰোহিত্যত বঙাইগাঁও জিলা উন্নয়ন সমন্বয় আৰু নিৰীক্ষণ কমিটীৰ সভা সম্পন্ন

🔯বৰপেটাৰ সাংসদ আব্দুল খালেকৰ লগতে উপস্থিত থাকিল বিজনী , উত্তৰ অভয়াপুৰী আৰু দক্ষিণ অভয়াপুৰী সমষ্টিৰ বিধায়ক 

📝বঙাইগাঁওঃ ৬ জুলাইঃ বঙাইগাঁও জিলা উন্নয়ন সমন্বয় আৰু নিৰীক্ষণ সমিতিৰ সভাখন আজি জিলা উপায়ুক্তৰ সভাকক্ষত অনুষ্ঠিত হয় ৷ কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়াৰ  পৌৰহিত্য অনুষ্ঠিত সভাত বৰপেটা লোকসভা সমষ্টিৰ সাংসদ আব্দুল খালেক, অভয়াপু্ৰী দক্ষিণ বিধানসভা (অনু:জাতি) সমষ্টিৰ বিধায়ক প্ৰদীপ সৰকাৰ,  অভয়াপুৰী উত্তৰ বিধানসভা সমষ্টিৰ বিধায়ক আব্দুল বাতেন খণ্ডকাৰ আৰু বিজনী বিধানসভা সমষ্টিৰ বিধায়ক অজয় কুমাৰ ৰয় উপস্থিত থাকে। সভাৰ আৰম্ভণিতে বঙাইগাঁও জিলাৰ উপায়ুক্ত ডা: এম এচ লক্ষ্মী প্ৰিয়াই  জিলাখনত জনস্বাস্থ্য কাৰিকৰী বিভাগ , নগৰ উন্নয়ন ,ৰাষ্ট্ৰীয় স্বাস্থ্য অভিযান ,পঞ্চায়ত আৰু গ্ৰামোন্নয়ন, সমাজ কল্যাণ, শিক্ষা ,জলসিঞ্চন, মীন, কৃষি, খাদ্য আৰু অসামৰিক যোগান, জল জীৱন মিছন, ৰাষ্ট্ৰীয় কৃষি বিকাশ যোজনা , প্ৰধানমন্ত্ৰী আদৰ্শ গাঁও যোজনা আদিৰে ধৰি বিভিন্ন বিভাগৰ অধীনত ৰূপায়ণ হৈ থকা উন্নয়নমূলক আঁচনিসমূহৰ এক খতিয়ান দাঙি ধৰে ৷ সভাত বৰ্তমান বঙাইগাঁও জিলাত ক'ভিড মহামাৰীৰ সংক্ৰমণ প্ৰতিৰোধৰ বাবে জিলা প্ৰশাসনে লোৱা ব্যৱস্থাৱলীৰ সাংসদ শৰণীয়াই প্ৰশংসা কৰে ৷ 

ইপিনে সভাত জলসম্পদ বিভাগক কাছাৰীপেটী গাঁও পঞ্চায়তৰ অধীনৰ এটা প্ৰতিৰোধৰ কামৰ বাবে ৫ লাখ টকা দিব বুলি সাংসদ আব্দুল খালেকে ঘোষণা কৰে। আনহাতে তেওঁ কীৰ্তনপাৰাত প্ৰধান মন্ত্ৰী জন বিকাশ যোজনাৰ অধীনত এখন আঁচনি লোৱাৰ বাবে সভাত প্ৰস্তাৱ দাঙি ধৰে। তদুপৰি তেওঁ জিলাখনৰ বঙাইগাঁও পৌৰসভা এলেকাত সমূহীয়া টয়লেট বৃদ্ধি কৰিবলৈও বিভাগীয় বিষয়াক আহ্বান জনায়। আনহাতে পূৰ্বৰ ৰে'লৱে বিভাগৰ ৰাজ্যিক মন্ত্ৰী ৰাজেন গোহাইয়ে নিউ বঙাইগাঁৱত আধাৰশিলা স্থাপন কৰা ৰে'লৰ ডিলাক্স ডবা নিৰ্মাণৰ কাম কি পৰ্যায়ত আছে সেই বিষয়ে ৰে'লৱে বিষয়াৰ পৰা বুজ লয়৷ জিলা উন্নয়ন সমন্বয় আৰু নিৰীক্ষণ সমিতিৰ সভাত সাংসদ শৰণীয়াই সকলো বিভাগীয় বিষয়াক উন্নয়নমূলক আঁচনিসমূহ সঠিকভাৱে ৰূপায়ণ কৰিবলৈ আহ্বান জনায় ৷ সভাত পৰ্যালোচনা কৰা আঁচনিসমূহৰ সন্দৰ্ভত যি যি প্ৰাৰম্ভিক কৰ্মসূচী হাতত লোৱা হ'ব সেই বিষয়ে উপায়ুক্তক ততালিকে জনাবলৈ বিভাগীয় বিষয়াসকলক উপায়ুক্ত ডা: লক্ষ্মী প্ৰিয়াই নিৰ্দেশ দিয়ে ৷ সভাত জিলা উন্নয়ন আয়ুক্ত ভাস্কৰ দাস, জিলা পৰিষদৰ মুখ্য কাৰ্যবাহী বিষয়া নাদিৰা জেচমিন, অতিৰিক্ত উপায়ুক্তসকল, সহকাৰী আয়ুক্তসকল, বিভাগীয় মূৰব্বী বিষয়াসকল তথা গাঁও পঞ্চায়তৰ সভাপতিসকলো উপস্থিত থাকে।🔯