🔯৮ জুলাইত উদ্যোগ বচাওক শ্ৰমিক বচাওক মঞ্চই আহ্বান জনোৱা ' জাতীয় উদ্যোগ বচাওক' দিৱসলৈ পাৱাৰ ৱ'কাৰ্চ ইউনিয়নৰ সমৰ্থন

🔯৮ জুলাইত উদ্যোগ বচাওক শ্ৰমিক বচাওক মঞ্চই আহ্বান জনোৱা ' জাতীয় উদ্যোগ বচাওক' দিৱসলৈ পাৱাৰ ৱ'কাৰ্চ ইউনিয়নৰ সমৰ্থন 

📝বঙাইগাঁওঃ ৬ জুলাইঃ অহা ৮ জুলাইত উদ্যোগ বচাওক ,শ্ৰমিক বচাওক মঞ্চই আহ্বান জনোৱা 'জাতীয় উদ্যোগ বচাওক দিৱস'ৰ প্ৰতি  আসাম ষ্টেট পাৱাৰ ৱ'কাৰ্চ ইউনিয়নে পূৰ্ণ সমৰ্থন জনাইছে ৷ এক প্ৰেছ বিবৃতিত আসাম ষ্টেট পাৱাৰ ৱ'কাৰ্চ ইউনিয়নৰ সভাপতি ব্ৰজেন বৰি ,কাৰ্যকৰী সভাপতি  লীলা চাংমাই আৰু সাধাৰণ  সম্পাদক  অমিত কৰে বৰ্তমান ভাৰত চৰকাৰে ৰাজহুৱা খণ্ডৰ গোপীনাথ বৰদলৈ আন্তঃৰাষ্ট্ৰীয় বিমান বন্দৰকে ধৰি প্ৰমুখ বিমান বন্দৰসমূহ, ভাৰতীয় ৰে'ল ,পেট্ৰলিয়াম উদ্যোগ, বেংক আদিৰ ব্যাপক ব্যক্তিগতকৰণেৰে দেশৰ অৰ্থনীতি  আৰু নিয়োগ ব্যৱস্থা ব্যক্তিগত খণ্ডৰ নিয়ন্ত্ৰণলৈ নিয়াৰ হঠকাৰী ষড়যন্ত্ৰৰ তীব্ৰ সমালোচনা কৰি দেশৰ জনতাক চৰকাৰে প্ৰতাৰণা কৰা বুলি উল্লেখ কৰে ৷ অনহাতে ৰাজ্যখনৰো যোগীঘোপাৰ অশোক কাগজ কল,দেৰগাওঁৰ সমবায় চেনীকল, বঙাইগাওঁ তাপবিদ্যুৎ কেন্দ্ৰ ,চন্দ্ৰপুৰ তাপবিদ্যুৎ কেন্দ্ৰ, নগাওঁ আৰু পাঁচগ্ৰাম কাগজ কল ,ৰঙিয়াৰ এপল' কাপোৰ কল আদিৰ ইতিমধ্যে মৃত্যু ঘটিছে বুলি কয় ৷ সেইদৰে নামৰূপৰ ব্ৰহ্মপুত্ৰ ভেলী সাৰ কাৰখানা,শিলঘাট সমবায় মৰাপাট কল আদি কেন্দ্ৰীয় আৰু ৰাজ্য চৰকাৰৰ অধীনৰ ৰাজহুবা খণ্ডৰ উদ্যোগসমূহ মৃত্যুৰ পথত বুলি উল্লেখ কৰে ৷ ইপিনে তীব্ৰ গতিত মৃত্যুমুখলৈ ধাৱমান অসম শক্তি বিতৰণ কোম্পানী এমাহৰ ভিতৰতে অসম চৰকাৰৰ মুখ্যমন্ত্ৰী , শক্তিমন্ত্ৰী আৰু সুদক্ষ অধ্যক্ষ জিষ্ণু বৰুৱাৰ নেতৃত্বত আৰু বিষয়া -কৰ্মচাৰী সকলৰ প্ৰচেষ্টাত পুনৰ জীৱন পোৱাৰ দিশত আগবাঢ়িছে বুলি উল্লেখ কৰি চৰকাৰৰ সদিচ্ছা আৰু সন্মুখত থাকি দিয়া নেতৃত্ব আৰু বিষয়া -কৰ্মচাৰী সকলৰ ঐকান্তিক প্ৰচেষ্টাৰে মৃত্যুমুখী উদ্যোগকো যে  পুনৰ জীৱন দিব পাৰি ইয়াতকৈ সুন্দৰ উদাহৰণ কি হ'ব পাৰে  বুলি পাৱাৰ ৱ'কাৰ্চ ইউনিয়নে মত প্ৰকাশ কৰে ৷ সেয়ে উদ্যোগিকৰণেৰেহে ৰাজ্যখনৰ অৰ্থনৈতিক বুনিয়াদ গঢ়ি তুলিলে নিবনুৱাৰ কৰ্ম সংস্থাপনৰ ক্ষেত্ৰত বিল্পৱৰ সূচনা কৰিব পাৰিব আৰু ৰাজ্যখনলৈ সুস্থিৰ বাতাবৰণ ঘূৰাই অনাত সহায়ক হ'ব আৰু তেহে শ্ৰেষ্ঠ ৰাজ্যৰ সপোন বাস্তবায়িত হ'ব বুলি পাৱাৰ ৱ'ৰ্কাচ ইউনিয়নে বিশ্বাস কৰে বুলি বিবৃতিটোত উল্লেখ কৰে।গতিকে নগাওঁ আৰু পাঁচগ্ৰাম কাগজ কল , ৰঙিয়াৰ এপল' কাপোৰ কল পুনৰ জীৱিত কৰিবলৈ আৰু নামৰূপ সাৰকাৰখানৰ ৪ৰ্থ গোট স্থাপন , শিলঘাট সমবায় মৰাপাট কল সম্প্ৰসাৰণ ,বয়ণ উদ্যোগ , কৃষি উদ্যোগেৰে ৰাজ্যখন কৰ্মমুখৰ কৰি তুলিবলৈ অসম চৰকাৰক পাৱাৰ ৱ'ৰ্কাচ ইউনিয়য়ে বিবৃতিটোৰ জৰিয়তে  আহ্বান জনায় ৷ লগতে  ইউনিয়নৰ সকলো শাখাক ক'ভিড প্ৰ'টকল মানি ইউনিয়নৰ পতাকা উত্তোলনেৰে জাতীয় উদ্যোগ বচাওক দিৱস পালন কৰিবলৈ অনুৰোধ জনোৱা বুলি প্ৰচাৰ সম্পাদক উৎপল শইকীয়া আৰু প্ৰণৱ খাটনিয়াৰে জানিবলৈ দিয়ে ।🔯