🔯বঙাইগাঁৱত অসমৰ ভিতৰত প্ৰথম ঘৰুৱা পদ্ধতিত জাৱৰ নিষ্কাষন পদ্ধতি প্ৰয়োগ

🔯বঙাইগাঁৱত অসমৰ ভিতৰত প্ৰথম ঘৰুৱা পদ্ধতিত জাৱৰ নিষ্কাষন পদ্ধতি প্ৰয়োগ 

🔯বঙাইগাঁও পৌৰসভাৰ কেবাটাও প্ৰকল্প মুকলি কৰিলে বিধায়ক ফণীভূষণ চৌধুৰীয়ে 

📝বঙাইগাঁওঃ ২৫ জুলাইঃ স্বচ্ছতাৰ ক্ষেত্ৰত বিশেষ পদক্ষেপ গ্ৰহণ কৰি ৰাজ্যখনৰ ভিতৰত প্ৰথম বাৰৰ বাবে বঙাইগাঁও পৌৰসভা এলেকাৰ এটা ৱাৰ্ডত পাইলট প্ৰজেক্ট হিচাপে ঘৰুৱা ভাবে জাৱৰ নিস্কাষন কৰি জৈৱিক সাৰ বনোৱা পদ্ধতি প্ৰয়োগ কৰা হৈছে ৷ উল্লেখ্য যে এই জাৱৰ নিষ্কাষন পদ্ধতি বা ব্যৱস্থাৰ বাবে মাটিৰ সঁজুলি ব্যৱহাৰ কৰা হ'ব আৰু সঁজুলিসমূহ পৌৰসভাৰ তৰফৰ পৰা বিনামূলীয়াকৈ যোগান ধৰা হৈছে ৷ সাধাৰণতে ৰন্ধা আৰু খোৱাৰ বাবে ব্যৱহাৰ কৰা শাক- পাচলি তথা ফল মূলৰ বাকলি তথা আৱৰ্জনা পেলাই দিয় হয় ৷ কিন্তু এতিয়াৰে পৰা বঙাইগাঁওবাসীয়ে পেলাব লগীয়া নহ'ব এই জাৱৰ- আৱৰ্জনা ৷ কোনোবাই ইচ্ছা কৰিলেই এই জাৱৰ তথা আৱৰ্জনাৰ ব্যৱহাৰ কৰি বনাব পাৰিব এই জৈৱিক সাৰ ৷ বঙাইগাঁও পৌৰসভা অন্তৰ্গত ৪ নং ৱাৰ্ডত দেওবাৰে এই পদ্ধতিৰ উদ্বোধন কৰা হয় ৷ এই পদ্ধতিৰ বন্তি প্ৰজ্বলন কৰি উদ্বোধন কৰে বঙাইগাঁৱৰ বিধায়ক ফণীভূষণ চৌধুৰীয়ে ৷ অনুষ্ঠানত বঙাইগাঁও জিলাৰ উপায়ুক্ত ডাঃ এম এচ লক্ষ্মীপ্ৰিয়া আৰু বঙাইগাঁও  পৌৰসভাৰ কাৰ্যবাহী বিষয়া পুৰুষোত্তম দাসো উপস্থিত থাকি বন্তি প্ৰজ্বালন কৰে ৷

উল্লেখ্য যে  বঙাইগাঁও পৌৰসভাৰ দ্বাৰা ৰূপায়ণ কৰা কেইবাটাও উল্লেখনীয় প্ৰকল্পৰো বিধায়ক ফণীভূষণ চৌধুৰীয়ে জিলা উপায়ুক্তগৰাকীৰ উপস্থিতিত শুভ উদ্বোধন কৰি ৰাইজৰ বাবে মুকলি কৰে ৷ সাম্প্ৰতিক সময়ত স্বচ্ছতা আৰু অনাময় ব্যৱস্থাৰ ওপৰত অধিক গুৰুত্বাৰোপ কৰাত তাৰ প্ৰতি লক্ষ্য ৰাখি বঙাইগাঁও চহৰৰ চিলাৰায় উৰণীয়া সেতু আৰু হৰিৰাম মহেশ্বৰী বিদ্যালয়ৰ ওচৰত পৌৰ সভাৰ দ্বাৰা নিৰ্মাণ কৰি উলিওৱা দুটা অত্যাধুনিক সুলভ শৌচালয় ৰাইজলৈ বুলি মুকলি কৰা হয় ৷ ইয়াৰ উপৰিও উত্তৰ বঙাইগাঁৱৰ নতুন বজাৰ আৰু চিলাৰায় সাপ্তাহিক বজাৰত শাক-পাচলি বজাৰ গৃহ, বঙাইগাঁও পৌৰসভাৰ কাৰ্যালয়ৰ দ্বিতীয় মহলাত ব্যবসায়ীক ভৱন আৰু অনলাইন অনুজ্ঞাপত্ৰৰ ব্যবস্থাৰ শুভ উদ্বোধন কৰা হয় ৷ লগতে প্ৰধানমন্ত্ৰী আৱাস যোজনাৰ অধীনত চহৰ খনৰ ৫  নং ৱাৰ্ডত লিলি ৰায়ৰ ঘৰৰ আধাৰশিলা স্থাপন কৰাৰ লগতে ১ নং ৱাৰ্ডত নিৰ্মলা ৰায়ৰ ঘৰৰ গৃহ প্ৰৱেশ অনুষ্ঠানত উপস্থিত থাকে বিধায়ক ফণীভূষণ চৌধুৰী, জিলা উপায়ুক্ত ডাঃ এম এচ লক্ষীপ্ৰিয়া আৰু কাৰ্যবাহী বিষয়া পুৰুষোত্তম দাস ৷ ইপিনে আজি বঙাইগাঁও পৌৰসভাত নতুকৈ তিনিখন আৱৰ্জনা সংগ্ৰহ তথা পেলোৱা বাহন বিধায়ক গৰাকীয়ে ফ্লেগ অব কৰি যাত্ৰাৰ শুভাৰম্ভ কৰে ৷ এই অনুষ্ঠানত পৌৰসভাৰ বিষয়া- কৰ্মচাৰী আৰু স্থানীয় লোক উপস্থিত থাকে ৷ 🔯