🔯বঙাইগাঁৱত গণৰাজ্য দিৱস উদযাপন

🔯বঙাইগাঁৱত গণৰাজ্য দিৱস উদযাপন 

🔯মন্ত্ৰী পৰিমল শুক্লবৈদ্যই উত্তোলন কৰিলে ত্ৰিৰংগা পতাকা

📝বঙাইগাঁওঃ ২৬ জানুৱাৰীঃ বুধবাৰে দেশৰ ৭৩ সংখ্যক গণৰাজ্য দিৱস উপলক্ষ্যে বঙাইগাঁও জিলা প্ৰশাসনৰ উদ্যোগত উদযাপিত অনুষ্ঠানত ৰাষ্ট্ৰীয় ত্ৰিৰংগা পতাকা উত্তোলন কৰে অসম চৰকাৰৰ বন, আৱকাৰী আৰু মীন বিভাগৰ মন্ত্ৰী পৰিমল শুক্লবৈদ্যই । বঙাইগাঁও গান্ধী ময়দানত আনুষ্ঠানিকভাৱে উদযাপিত গণৰাজ্য দিৱসৰ পতাকা উত্তোলন কৰি দিয়া ভাষণৰ আৰম্ভণিতে মন্ত্ৰীগৰাকীয়ে স্বাধীনতা সংগ্ৰামীসকলৰ প্ৰতি গভীৰ শ্ৰদ্ধা জ্ঞাপন কৰাা লগতে উপস্থিত সমূহ ৰাইজক শুভেচ্ছা জনায়। মন্ত্ৰীগৰাকীয়ে ভাষণ প্ৰসংগত ৰাজ্যখনত বিভিন্ন বিভাগৰ অধীনত ৰূপায়ন কৰা তথা ৰূপায়ণ কৰিবলৈ লোৱা উন্নয়নমূলক কাম-কাজৰ লগতে বঙাইগাঁও জিলাত ৰূপায়ন কৰি থকা উন্নয়নমূলক কাম-কাজৰ বিষয়ে বিতংভাৱে উল্লেখ কৰে। মন্ত্ৰীগৰাকীয়ে গণৰাজ্য দিৱস উপলক্ষে কুচকাৱাজত অংশগ্ৰহণ কৰা আৰক্ষী, মহিলা আৰক্ষী,গৃহৰক্ষী বাহিনী আৰু অষ্টম অসম আৰক্ষী বেটেলিয়নৰ বেণ্ডপাৰ্টীৰ দলৰ কুচকাৱাজৰ অভিবাদনো গ্ৰহণ কৰে ৷

মন্ত্ৰীগৰাকীয়ে গণৰাজ্য দিৱসৰ অনুষ্ঠানত জিলাখনৰ স্বাধীনতা সংগ্ৰামী পঞ্চানন বৰুৱাৰ সহধৰ্মিনী ৰেণুকা বৰুৱাক এখন ফুলাম গামোচাৰে সম্বৰ্দ্ধনা জনায়।  বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰী,জিলা উপায়ুক্ত ডা:এম এছ লক্ষ্মী প্ৰিয়া, আৰক্ষী অধীক্ষক স্বপ্ননীল ডেকাকে ধৰি জিলা প্ৰশাসনৰ বিষয়া-কৰ্মচাৰীৰ লগতে আন আন গণ্যমান্য ব্যক্তিসকল তথা বঙাইগাঁওবাসী ৰাইজৰ উপস্থিতিত অনুষ্ঠিত গণৰাজ্য দিৱসৰ অনুষ্ঠানৰ পিছতে মন্ত্ৰীগৰাকীয়ে বীৰঝৰা ছোৱালী উচ্চ মাধ্যমিক বিদ্যালয়ত বঙাইগাঁও জিলা প্ৰশাসনৰ "প্ৰকল্প পুথিভঁৰাল"ৰ অধীনত 'জ্ঞান পখিলী' নামেৰে এটি পুথিভঁৰাল উদ্বোধন কৰে। এই অনুষ্ঠানত মন্ত্ৰীগৰাকীয়ে জিলা প্ৰশাসন তথা বঙাইগাঁৱৰ শিক্ষা বিভাগৰ উক্ত ব্যৱস্থাপনাক প্ৰশংসা কৰে আৰু এইক্ষেত্ৰত চৰকাৰে সহায়-সহযোগিতা আগবঢ়াই যাব বুলি উল্লেখ কৰে। সেইদৰে মন্ত্ৰী শুক্লবৈদ্যই জিলাখনৰ পালপাৰা নেতাজী নগৰৰ বাসিন্দা তথা ৰাজ্য চৰকাৰৰ দ্বাৰা শিল্পী পেঞ্চনৰ বাবে নিৰ্বাচিত শিল্পী নন্দ কিশোৰ চৌধুৰীৰ ঘৰত উপস্থিত হৈ শিল্পীগৰাকীক সম্বৰ্দ্ধনা জ্ঞাপন কৰে। এই কাৰ্যসূচীত জিলা উপায়ুক্ত আৰু আৰক্ষী অধীক্ষকদ্বয়ে মন্ত্ৰীগৰাকীক সংগ দিয়ে।🔯