🔯বঙাইগাঁৱত গণৰাজ্য দিৱসৰ অনুষ্ঠানত মন্ত্ৰী পৰিমল শুক্লবৈদ্যই দিলে ২ ঘণ্টাৰো অধিক সময় ধৰি ভাষণ

🔯বঙাইগাঁৱত গণৰাজ্য দিৱসৰ অনুষ্ঠানত মন্ত্ৰী পৰিমল শুক্লবৈদ্যই দিলে ২ ঘণ্টাৰো অধিক সময় ধৰি ভাষণ

🔯ভাষণ শেষ নৌপাওতেই অধিকাংশ লোক হ'ল ঘৰমুৱা 

🔯থিয় হৈ থাকি থাকি অসুস্থ হৈ ময়দানতে বাগৰি পৰিল পেৰেডত অংশগ্ৰহণ কৰা পাঁচজনকৈ আৰক্ষী- গৃহৰক্ষী জোৱান 

📝বঙাইগাঁওঃ ২৬ জানুৱাৰীঃ বঙাইগাঁৱত অনুষ্ঠিত দেশৰ ৭৩ সংখ্যক গণৰাজ্য দিৱসৰ অনুষ্ঠানত বুধবাৰে ৰাজ্য চৰকাৰৰ বন, আৱকাৰী আৰু মীন বিভীগৰ মন্ত্ৰী পৰিমল শুক্লবৈদ্যৰ দীঘলীয়া ভাষণে অনুষ্ঠানত উপস্থিত সকলোকে বিৰক্ত কৰা পৰিলক্ষিত হয় ৷ যাৰ বাবে মন্ত্ৰীগৰাকীয়ে ৰাষ্ট্ৰীয় পতাকা উত্তোলন কৰি উপস্থিত ৰাইজক উদ্দেশ্যি দিয়া ভাষণ শেষ নৌপাওতেই অধিকাংশ লোক ঘৰমুৱা হয় ৷ বাকীসকলে হামিয়াই হিকিতিয়াই শুনিলে মন্ত্ৰীগৰাকীৰ ভাষণ ৷ কাৰণ প্ৰশাসনীয় বিষয়া- কৰ্মচাৰী, আমন্ত্ৰিত অতিথি, ৰাজনৈতিক দলৰ প্ৰতিনিধি, শাসকীয় দলৰ কৰ্মী- সমৰ্থকসকলে অনুষ্ঠান এৰি যায় কেনেকৈ ? সেইদৰে ভাষণ শুনিলে সংবাদ মাধ্যমৰ লগত জড়িতসকলেও ৷ অতিথিৰ আসনত বহি থকা স্থানীয় বিধায়ক, আৰক্ষী বিভাগৰ শীৰ্ষ বিষয়াকে ধৰি বহুতকে ভাষণ শুনাৰ পৰিৱৰ্তে মোবাইল চাই সময় পাৰ কৰা পৰিলক্ষিত হয় সেই সময়ত ৷ আনহাতে বহুতৰ বাবে এইবাৰৰ গণৰাজ্য দিৱসৰ অনুষ্ঠানটো হেনো চিৰস্মৰণীয় হৈ ৰ'ব বুলিও ক'বলৈ নেপাহৰিলে ৷ 

উল্লেখ্য যে মন্ত্ৰী শুক্লবৈদ্যই অনুষ্ঠানত ভাষণ দিলে ২ ঘণ্টা ১৭ মিনিটজুৰি ৷ মন্ত্ৰীগৰাকীয়ে এই সময়ত পাঠ কৰিলে প্ৰায় ৩৬ পৃষ্ঠাজোৰা লিখিত ভাষণ ৷ ইয়াৰে ২২ পৃষ্ঠা দিছপুৰৰ ৷ অৰ্থাৎ এইখন চৰকাৰে শাসনৰ গাদীত বহাৰ পৰা বৰ্তমান সময়লৈ বিভিন্ন বিভাগৰ দ্বাৰা ৰূপায়ণ কৰা উন্নয়নৰ খতিয়ান তথা আত্মপ্ৰচাৰ কৰাৰ পিচত পুনৰ প্ৰায় ১৪ পৃষ্ঠাজোৰা কেৱল বঙাইগাঁও জিলাৰ বিভিন্ন বিভাগৰ উন্নয়নৰ খতিয়ান দাঙি ধৰে ৷ ইপিনে চৰকাৰৰ সফলতাৰ প্ৰচাৰ শুনি শুনি বিৰক্ত হৈ পৰে গণৰাজ্য দিৱসৰ অনুষ্ঠান উপভোগ কৰিবলৈ অহা দৰ্শক ৰাইজ ৷ যাৰ ফলত এটা সময়ত ভাষণ শুনি শুনি অধৈৰ্য হৈ পৰি মন্ত্ৰীৰ ভাষণ শেষ নৌপাওতেই অধিকাংশ লোক ঘৰমুৱা হয় ৷ সেইদৰে মন্ত্ৰীয়ে ভাষণ দি থকা অৱস্থাতে গণৰাজ্য দিৱসৰ পেৰেডত অংশ লোৱা আৰক্ষী আৰু গৃহৰক্ষী বাহিনীৰ পাঁচজনকৈ জোৱান শীতৰ ৰ’দত থিয় হৈ থাকিয়েই অসুস্থ হৈ বাগৰি পৰে ৷ অসুস্থ হৈ বাগৰি পৰা জোৱানকেইজনক ময়দানৰ মাজৰ পৰা উদ্ধাৰ কৰি লগতে থকা অস্থায়ী স্বাস্থ্য শিবিৰলৈ আনি চিকিৎসাৰ ব্যৱস্থা কৰা হয় ৷ জানিব পৰা মতে পুৱা পাঁচ বজাতে গণৰাজ্য দিৱসৰ অনুষ্ঠানৰ পেৰেডত অংশগ্ৰহণৰ বাবে ওলাই আহিছিল আৰক্ষী আৰু গৃহৰক্ষী বাহিনীৰ পুৰুষ - মহিলাসকল ৷ যাৰ বাবে এটা সময়ত থিয় হৈ হৈ থাকি ইয়াৰে পাঁচজন অসুস্থ হৈ পৰে ৷ ইয়াৰ পিছতে মন্ত্ৰীয়ে ভাষণ দি থকাৰ মাজতে পেৰেডত অংশ লোৱাসকলক ময়দানতে যোগান ধৰা হয় খোৱা পানীৰ ৷ খাই লয় সকলোৱে পানী ৷ কিন্তু পেৰেডত অংশগ্ৰহণ কৰা মহিলা আৰক্ষীকেইগৰাকীয়ে নিজৰ শক্তি দেখুৱাবলৈ সক্ষম হয় ৷ এগৰাকীও অসুস্থ হৈ পৰা নাছিল ৷ একেদৰে মঞ্চত মন্ত্ৰীৰ পিচফালে থিয় হৈ থকা জিলা উপায়ুক্ত, আৰক্ষী অধীক্ষকে ধৰি সকলোৱে পানী খাই লয় ৷ কিন্তু মন্ত্ৰীৰ ভাষণ শেষ নহয় হে নহয় ৷ 

এটা সময়ত মন্ত্ৰীৰ ভাষণ শেষ হয় আৰু লগে লগে উপস্থিত থকা আমন্ত্ৰিত অতিথি আৰু যিসংখ্যক দৰ্শক আছিল হাত চাপৰি বজায় ৷ যেন সকলোৱে এই মুহুৰ্তলৈকেহে অপেক্ষা কৰি আছিল ৷ লগতে শুনা গ'ল ৰক্ষা ৷ এনে দীঘলীয়া ভাষণ জীৱনত এইবাৰেই শুনাৰ সৌভাগ্য হ'ল ৷ দহ বছৰ ধৰি স্বাধীনতা দিৱস, গণৰাজ্য দিৱসৰ অনুষ্ঠানলৈ আহি আছো যদিও এনে ভাষণ শুনাৰ সৌভাগ্য হোৱা নাছিল ৷ এইবাৰ সৌভাগ্য ঘটিল ৷ সদায় মনত থাকিব ৷ ইপিনে গণৰাজ্য দিৱসৰ অনুষ্ঠানৰ বাবে গান্ধী ময়দানত অসুস্থ হৈ পৰা সকলক চিকিৎসাৰ বাবে এটা অস্থায়ী চিকিৎসা শিবিৰ স্থাপন কৰা হয় যদিও তাত স্বাস্থ্য কৰ্মীসকলক প্ৰয়োজনীয় খোৱা পানীও যোগান ধৰাৰ পৰা বিৰত থাকে ৷ ফলত অসুস্থ হৈ পৰা লোকক পানী এটুপী দিবলৈকো সমস্যাত পৰে স্বাস্থ্যকৰ্মীসকল ৷ পিচত এই কথা জানিব পাৰি এজন সাংবাদিকে প্ৰশাসনৰ লোকক বিষয়টো অৱগত কৰাত হে খোৱা পানীৰ ব্যৱস্থা গ্ৰহণ কৰে ৷ কেৱল মন্ত্ৰীকলৈয়ে যেন সকলো ব্যস্ত তেনে পৰিলক্ষিত হয় ৷ মন্ত্ৰীক সন্তুষ্ট কৰিব পাৰিলেই হ'ল ৷ এইদৰেই বঙাইগাঁৱত উদযাপিত হ'ল গণৰাজ্য দিৱস ৷🔯