🔯বঙাইগাঁও জিলাৰ মালেগড় গাঁও পঞ্চায়ত

🔯বঙাইগাঁও জিলাৰ মালেগড় গাঁও পঞ্চায়ত

🔯উত্থাপিত দুৰ্নীতিৰ অভিযোগ অসত্য --পঞ্চায়ত  সভাপতি

📝বঙাইগাঁওঃ২৩ জানুৱাৰীঃ বঙাইগাঁও জিলাৰ মালেগড় গাঁও পঞ্চায়তত মহিলা স্ব-নিৰ্ভৰ আঁচনি ৰূপায়ণৰ ক্ষেত্ৰত তথা চি চি ব্লক পথ নিৰ্মাণত দুৰ্নীতিৰ অভিযোগ উত্থাপিত হোৱাৰ সময়তে এই অভিযোগক ভিত্তিহীন আৰু অসত্য বুলি মন্তব্য কৰিছে গাঁও পঞ্চায়তখনৰ সভাপতি ছাইফুল ইছলামে ৷ এই সন্দৰ্ভত দেওবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত সভাপতিগৰাকীয়ে তেওঁৰ বিৰুদ্ধে উত্থাপিত দুৰ্নীতিৰ অভিযোগক অসত্য বুলি দাবী কৰি সকলো নথি পত্ৰ পৰীক্ষা কৰি চাবলৈকো অনুৰোধ জনায় ৷ পঞ্চায়ত সভাপতিগৰাকীয়ে প্ৰকাশ কৰা মতে মালেগড় গাঁও পঞ্চায়তৰ অন্তৰ্গত তিনকোণীয়া দ্বিতীয় খণ্ডত তামোল বাগিছাৰ নামত হিতাধিকাৰীৰ ধন আত্মসাৎ কৰাৰ যি অভিযোগ উত্থাপিত হৈছে সেয়া সত্য নহয় ৷ সভাপতিগৰাকীয়ে কয় যে গাঁওখনৰ সাজেদা খাতুনে মহিলা স্ব-নিৰ্ভৰ আঁচনিৰ সুবিধা লাভ কৰিছিল ৷ এই আঁচনিবোৰৰ হিতাধিকাৰীসকলক অন লাইনযোগে ধন মোকোলাই দিয়া হয় ৷ জিআৰএচ আৰু ইঞ্জিনীয়াৰৰ দ্বাৰা কামৰ পৰ্যবেক্ষণ কৰাৰ পিছতহে ধন মোকোলাই দিয়া হয় ৷ ইতিমধ্যে গাঁও পঞ্চায়তৰ তৰফৰ পৰা টাপাট্টাৰী উন্নয়ন খণ্ডৰ যোগেদি সাজেদা খাতুনৰ নামত থকা জব কাৰ্ডৰ একাউণ্টত ৪,৯২০ টকা মোকোলাই দিয়া হৈছে ৷ ইয়াৰ পিছত তামোল বাগিছাৰ কামৰ অগ্ৰগতিৰ ওপৰত ভিত্তি কৰি হিতাধিকাৰীক ধন মোকোলাই দিয়া হ'ব ৷ গতিকে ইয়াত কোনো ধন আত্মসাৎ বা হৰলুকী হোৱাৰ প্ৰশ্নই আহিব নোৱাৰে বুলি স্পষ্ট কৰি দিয়ে ৷ সেইদৰে পঞ্চায়তখনৰ তিনকোণীয়া দ্বিতীয় খণ্ডৰ এটা চি চি ব্লক পথ নিৰ্মাণৰ নামত উত্থাপিত দুৰ্নীতিৰ অভিযোগ সন্দৰ্ভত পঞ্চায়ত সভাপতি ছাইফুল ইছলামে সংবাদ মেলত কয় যে চতুৰ্দশ বিত্তীয় আয়োগৰ অধীনত ২০১৯-২০ বিত্তীয় বৰ্ষৰ এই পথটো গাঁওখনৰ গড়কাপ্তানি পথৰ পৰা বানেৰা খাতুনৰ গৃহলৈ সংযোগী এটা চি চি ব্লক পথ ৷ এই পথটো নিৰ্মাণ কৰা ঠাইখিনি বান পানী হোৱা ঠাই ৷ পথটো নিৰ্মাণ কৰাৰ পিছতেই বান পানী হৈছিল ৷ তাৰোপৰি পথটোৰ এফালে ৫০ ফুটমান দ' পুখুৰী এটা আছে ৷ যেতিয়া বান পানীৰ সময়ত প্ৰৱল বৰষুণ হয়, তেতিয়া পথৰ ওপৰেদি পানী গৈ পুখুৰীটোত জমা হ'বলৈ ধৰাত উক্ত পথৰ অলপ ঠাইত বালি মাটি থকাৰ ফলত খহি পৰে ৷ কিন্তু ইতিমধ্যে ক্ষতিগ্ৰস্ত হোৱা পথৰ অংশখিনি মেৰামতি কৰি দিয়াৰ বাবে সভাপতিগৰাকীয়ে আলোচনা কৰা বুলিও জনায় ৷ লগতে তেওঁৰ বিৰুদ্ধে উত্থাপিত দুৰ্নীতিৰ অভিযোগক অসত্য বুলি দাবী কৰে ৷🔯