🔯শিক্ষক, সাহিত্যিক তথা সমাজকৰ্মী প্ৰসন্ন নাৰায়ণ বৰুৱাৰ বিয়োগ

🔯শিক্ষক, সাহিত্যিক তথা সমাজকৰ্মী প্ৰসন্ন নাৰায়ণ বৰুৱাৰ বিয়োগ

📝বঙাইগাঁওঃ ২৩ জানুৱাৰীঃ বঙাইগাঁও জিলাৰ উত্তৰ শালমাৰাৰ অৱসৰপ্ৰাপ্ত শিক্ষক, সাহিত্যিক তথা বিশিষ্ট সমাজ সেৱক প্ৰসন্ন নাৰায়ণ বৰুৱাৰ আজি নিজ বাসগৃহত বাৰ্ধক্যজনিত কাৰণত মৃত্যু হয় ৷ মৃত্যৰ সময়ত তেওঁৰ বয়স ৯৪ বছৰ হৈছিল ৷ বিগত ১৯৫০ চনত নয়াগাঁও প্ৰাথমিক বিদ্যালয়ত শিক্ষক হিচাপে চাকৰি জীৱন আৰম্ভ কৰা কৃতী শিক্ষক প্ৰসন্ন নাৰায়ণ বৰুৱাই চৰকাৰী চাকৰিৰ মাজতেই সাহিত্য আৰু সমাজৰ বাবে নিৰলস সেৱা আগবঢ়াই আহিছিল ৷১৯৮৬ চনত তেওঁ দেওহাটী প্ৰাথমিক বিদ্যালয়ৰ পৰা চাকৰি জীৱনৰ অৱসৰ গ্ৰহণ কৰিছিল ৷ বঙাইগাঁও শাখা সাহিত্য সভা প্ৰতিষ্ঠাৰ লগত নিবিড় ভাবে জৰিত বৰুৱাই উত্তৰ শালমাৰাতো উত্তৰ শালমাৰা শাখা সাহিত্য সভা প্ৰতিষ্ঠা কৰি নিজে বহুবছৰ সভাপতিৰ দায়িত্ব নিষ্ঠাৰে পালন কৰিছিল ৷ উল্লেখ্য যে অসম সাহিত্য সভাৰ ১৮৬১ চনত অনুষ্ঠিত গোৱালপাৰা অধিৱেশনৰ 'বুৰঞ্জী সন্মিলন'ত তেখেতে উত্তৰ শালমাৰাৰ ঐতিহ্যমণ্ডিত মহাদেৱ পাহাৰৰ বহু তথ্য দাঙি ধৰি বুৰঞ্জীবিদসকলৰ দৃষ্টি আকৰ্ষণ কৰি প্ৰশংসা বুটলিবলৈ লক্ষম হৈছিল ৷ জিলাখনৰ বিভিন্ন প্ৰান্তৰ পৰা প্ৰকাশিত ভালেমান আলোচনী, স্মৃতিগ্ৰন্থ আদিত ভালেমান লিখনি প্ৰকাশ কৰিছে যদিও সেই লেখাসমূহ গ্ৰন্থাকাৰে প্ৰকাশ কৰিব পৰা নাছিল ৷ তেওঁ উত্তৰ শালমাৰা মহাদেৱ পাহাৰৰ মন্দিৰ পৰিচালনা সমিতিৰ সুদীৰ্ঘ ২৩ বছৰ সম্পাদকৰ দায়িত্ব পালন কৰিছিল ৷ অসম সাহিত্য সভা, বঙাইগাঁও জিলা সাহিত্য সভা, বঙাইগাঁও শাখা সাহিত্য সভা, উত্তৰ শালমাৰা স্বৰ্ণ শাখা সাহিত্য সভা, উত্তৰ শালমাৰা চৰকাৰী পেন্সনাৰ সন্থা, অভয়াপুৰী জ্যেষ্ঠ নাগৰিক সন্থা আদি বিভিন্ন অনুষ্ঠানে তেওঁক বিভিন্ন সময়ত সম্বৰ্ধনা জনাইছে ৷ তেওঁৰ মৃত্যুত অঞ্চলটোত শোকৰ ছাঁ পৰিছে৷ ইপিনে তেওঁৰ বিয়োগত অসম সাহিত্য সভাৰ মুখপাত্ৰ অমৰেন্দ্ৰ বৰুৱা, কেন্দ্ৰীয় কাৰ্যনিৰ্বাহক সদস্য কামাখ্যা প্ৰসাদ ৰায়, বঙাইগাঁও জিলা সাহিত্য সভাৰ ভাৰপ্ৰাপ্ত সভাপতি বিক্ৰম মেধি, উত্তৰ শালমাৰা স্বৰ্ণ শাখা সাহিত্য সভা আদিয়ে গভীৰ শোক প্ৰকাশ কৰিছে ৷🔯