🔯কোভিডৰ তৃতীয় ঢৌৰ পৰিপ্ৰেক্ষিতত বঙাইগাঁৱত প্ৰশাসনৰ সজাগতা

🔯কোভিডৰ তৃতীয় ঢৌৰ পৰিপ্ৰেক্ষিতত বঙাইগাঁৱত প্ৰশাসনৰ সজাগতা 

📝বঙাইগাঁওঃ ১৩ জানুৱাৰীঃ বঙাইগাঁও জিলাত কোভিড-১৯ ৰ তৃতীয় ঢৌত অমিক্ৰণৰ বৰ্ধিত সংক্ৰমণৰ বাবে বঙাইগাঁও জিলাত জিলা প্ৰশাসন তথা জিলা দুৰ্যোগ ব্যৱস্থাপনা প্ৰাধিকৰণৰ তৰফৰ পৰা বিভিন্ন ব্যৱস্থা গ্ৰহণ কৰা হৈছে। ঠায়ে ঠায়ে মাইক্ৰ' কণ্টেইনমেণ্ট জ'ন ঘোষণা কৰা হৈছে।ৰাজহ চক্ৰ পৰ্যায়ৰ গৃহ আছুতীয়াকৰণ নিৰীক্ষণ কমিটী গঠন কৰা হৈছে, দৈনিক আৰু সাপ্তাহিক বজাৰ পুৱা ৬ বজাৰ পৰা দিনৰ ১২  বজালৈহে খোলা ৰাখিব দিয়া হৈছে। ৰাজহুৱা স্থানত মাস্ক,সামাজিক দূৰত্ব আৰু সঘনাই হাত ধোৱাটো বাধ্যতামূলক কৰা হৈছে ৷ ৰাইজৰ মাজত কোভিড-১৯ ৰ অমিক্ৰণ প্ৰজাতি সন্দৰ্ভত সজাগতা সৃষ্টিৰ বাবে আজি বীৰঝৰা পাব্লিক লাইব্ৰেৰীত দিনৰ এখন সজাগতা সভা অনুষ্ঠিত কৰা হয়।বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰী, জিলা আৰক্ষী অধীক্ষক স্বপ্ননীল ডেকা, অতিৰিক্ত আৰক্ষী অধীক্ষক লুনা সোনোৱাল, অতিৰিক্ত উপায়ুক্ত পংকজ চমুৱা, দুৰ্যোগ ব্যৱস্থাপনা বিভাগৰ জিলা প্ৰকল্প বিষয়া, বঙাইগাঁৱৰ বিভিন্ন বেচৰকাৰী সংগঠনৰ বিষয়ববীয়া, জ্যেষ্ঠ নাগৰিক সন্থাৰ লোক ,ব্যৱসায়ী সন্থাৰ লোক, জিলাখনৰ স্বাস্থ্য বিষয়া তথা বিভাগীয় মুৰব্বী বিষয়াসকলৰ উপস্থিতিত সজাগতা সভাখনি অনুষ্ঠিত কৰা হয়। বিধায়ক ফণীভূষণ চৌধুৰীয়ে ভাষণ প্ৰসংগত উপস্থিত বিশিষ্ট নাগৰিকসকলক কোভিড-১৯ ৰ নতুন প্ৰজাতি অমিক্ৰণ সন্দৰ্ভত সজাগ হৈ কোভিড বিধি মানি নিজৰ জীৱন সুস্থ কৰি ৰাখিবলৈ আহ্বান জনায়। 

অতিৰিক্ত উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া পংকজ চমুৱাই সভাৰ উদ্দেশ্য ব্যাখ্যা কৰাৰ লগতে কোভিডৰ নীতি-নিয়মসমূহ উল্লেখ কৰে আৰু এই নীতি-নিয়মসমূহ কঠোৰভাৱে পালন কৰিবলৈ উপস্থিত সকলোকে আহ্বান জনায়। তদুপৰি নিজকে সম্পূৰ্ণৰূপে টিকাকৰণৰ জৰিয়তে কোভিডৰ পৰা সুৰক্ষিত কৰিবলৈও আহ্বান জনায়।কোভিডৰ বিৰুদ্ধে যুঁজখনত জিলা প্ৰশাসনক সকলো ধৰণেৰে সহযোগিতা আগবঢ়াই এই যুঁজত জয়ী কৰাবলৈও অতিৰিক্ত উপায়ুক্ত পংকজ চমুৱাই আহ্বান জনায় ৷ সভাত আৰক্ষী অধীক্ষক তথা যুটীয়া স্বাস্থ্য সেৱা সঞ্চালকেও কোভিড সন্দৰ্ভত সজাগ হোৱা অতীব প্ৰয়োজন বুলি বক্তব্য আগবঢ়ায়। সভাত উপস্থিত জ্যেষ্ঠ নাগৰিকে জিলা প্ৰশাসনক কোভিডৰ বিৰুদ্ধে যুঁজখনত সহযোগিতা আগবঢ়াই যাব বুলি বক্তব্যত প্ৰকাশ কৰে।🔯