🔯নলবাৰীত অসম প্ৰদেশ সাংবাদিক সন্থাৰ উদ্যোগত স্মৃতিচাৰণ সভা🔯

🔯নলবাৰীত অসম প্ৰদেশ সাংবাদিক সন্থাৰ উদ্যোগত স্মৃতিচাৰণ সভা 

🔯সাংবাদিক দণ্ডীৰাম দাসক 'অপূৰ্ব কুমাৰ শৰ্মা স্মাৰক বঁটা' প্ৰদান 

📝বঙাইগাঁওঃ ১১ ফেব্ৰুৱাৰীঃ অসম প্ৰদেশ সাংবাদিক সন্থাৰ নলবাৰী জিলা সমিতিৰ উদ্যোগত বিশিষ্ট সাংবাদিক, শিক্ষাবিদ, ক্ৰীড়া সংগঠক, লেখক অপূৰ্ব কুমাৰ শৰ্মাৰ স্মৃতিত আজি স্মৃতিচাৰণ আৰু স্মাৰক বঁটা প্ৰদান অনুষ্ঠান অনুষ্ঠিত হয়। অসম প্ৰদেশ সাংবাদিক সন্থাৰ জিলা সমিতিৰ সভাপতি চম্পক বৈশ্যৰ পৌৰোহিত্যত অনুষ্ঠিত আৰু সম্পাদক শশাংক শৰ্মাই উদ্দ্যেশ্য বাখ্যা কৰা সভাখন আনুষ্ঠানিকভাবে উদ্বোধন কৰে জিলা অতিৰিক্ত উপায়ুুুক্ত চয়নিকা ঠাকুৰীয়াই। সাংবাদিক অপূৰ্ব কুমাৰ শৰ্মাৰ সপ্তম মৃত্যু বাৰ্ষিকী উপলক্ষে নলবাৰী নাট্য মন্দিৰ চৌহদত থকা নন্দেশ্বৰ শইকীয়া ভৱনত মফছলীয় সাংবাদিক সকলৰ উমৈহতীয়া মঞ্চ 'অসম প্ৰদেশ সাংবাদিক সন্থা' (আপজু)ৰ নলবাৰী জিলা সমিতিৰ উদ্যোগত অনুষ্ঠিত সভাখনত মুখ্য অতিথি হিচাপে উপস্থিত থাকি কামৰূপ মহাবিদ্যালয়ৰ ইংৰাজী বিভাগৰ মুৰব্বী অধ্যাপক সঞ্জীৱ গোস্বামীয়ে প্ৰয়াত সাংবাদিক অপূৰ্ব কুমাৰ শৰ্মাৰ স্মৃতি ৰোমন্থন কৰে। তেওঁ প্ৰয়াত শৰ্মা এগৰাকী নিয়মানুৱৰ্তিতা ৰক্ষা কৰা আৰু সততাৰে কাম কৰা সংবাদদাতা আছিল বুলি উল্লেখ কৰে ৷ লগতে শৰ্মাৰ সাংবাদিকতাৰ সততাক তেওঁ শ্ৰদ্ধাৰে স্মৰণ কৰে। বৰ্তমান সময়ত সাংবাদিকতাৰ কাৰ্ডখনৰ জৰিয়তে একাংশ লোকে দাবী ধমকি দি ধন আহৰণৰ বাট উলিয়াই লয় বুলিও তেওঁ মন্তব্য কৰে।তেওঁ মফচলীয় সাংবাদিক সকলক উৎসাহিত কৰাৰ বাবে চৰকাৰে মাহেকীয়া বৃত্তি প্ৰদানৰ ব্যৱস্থা ল'লে সাংবাদিকতাৰ সততা বৃদ্ধি পাব বুলিও তেওঁ আশা প্ৰকাশ কৰে।

ভাষণৰ মাজতে অসম প্ৰদেশ সাংবাদিক সন্থাৰ নলবাৰী জিলা সমিতিৰ হৈ সভাপতি চম্পক বৈশ্যই সভাত উপস্থিত থকা অতিৰিক্ত উপায়ুক্ত চয়নিকা ঠাকুৰীয়াক সংগঠনৰ নামত নলবাৰী চহৰত এটুকুৰা ভূমি আৱণ্টন দিয়াৰ ব্যৱস্থা কৰিবলৈ অনুৰোধ জনাই উক্ত ভূমিতে প্ৰয়াত সাংবাদিক গৰাকীৰ স্মৃতি সজীৱ কৰি ৰখাৰ স্বাৰ্থত এটা আৱক্ষ মূৰ্তি স্থাপন কৰিব পাৰি। এনে প্ৰস্তাৱৰ মৌখিক সমৰ্থন জনাই অতিৰিক্ত উপায়ুক্ত গৰাকীয়ে ইয়াৰ বাবে যাৱতীয় ব্যৱস্থা আগবঢ়াই নিবলৈ সংগঠনটোক আহ্বান জনায়। অনুষ্ঠানত বিশিষ্ট অতিথিৰূপে অংশ লৈ অসম প্ৰদেশ সাংবাদিক সন্থাৰ সভাপতি কুঞ্জ মোহন ৰায়ে সাংবাদিক অপূৰ্ব শৰ্মাৰ জীৱন আৰু কীৰ্তিৰ ওপৰত স্মৃতিচাৰণ কৰাৰ লগতে আপজুৰ নীতি আদৰ্শৰ বিষয়ে উল্লেখ কৰে। আমন্ত্ৰিত অতিথি হিচাপে উপস্থিত থাকি জিলা তথ্য আৰু জন সংযোগ বিষয়া চুম্পী চুতীয়াই প্ৰয়াত সাংবাদিক অপূৰ্ব কুমাৰ শৰ্মাৰ স্মৃতি ৰোমন্থন কৰে৷ সভাত প্ৰয়াত সাংবাদিক গৰাকীৰ জ্যেষ্ঠ ভ্ৰাতৃ জীতেন শৰ্মাাকে ধৰি কেইবাজনো বিশিষ্ট ব্যক্তি উপস্থিত থাকে৷ উল্লেখ্য যে বিশিষ্ট সংগীত শিল্পী ৰঞ্জিত কুমাৰ শৰ্মাই অপূৰ্ব কুমাৰ শৰ্মাৰ স্মৃতিত স্বৰচিত গীত পৰিবেশন কৰা অনুষ্ঠানটোত সাংবাদিক, কবি দণ্ডীৰাম দাসক তৃতীয় বৰ্ষৰ বাবে সাংবাদিক অপূৰ্ব কুমাৰ শৰ্মা স্মাৰক বঁটা প্ৰদান কৰা হয়। উক্ত বঁটাত আছে গামোছা, জাঁপি, স্মাৰক, সম্বৰ্ধনা পত্ৰ, গ্ৰন্থ, কলম আৰু নগদ ধন। সভাৰ আৰম্ভণিতে অপূৰ্ব কুমাৰ শৰ্মাৰ প্ৰতিচ্ছবিৰ সন্মুখত বন্তি প্ৰজ্বলন কৰে সহধৰ্মিণী গীতাঞ্জলি গোস্বামীয়ে। ইয়াৰ পিছত প্ৰয়াত সাংবাদিক গৰাকীৰ প্ৰতিচ্ছবিত অসম প্ৰদেশ সাংবাদিক সন্থাৰ কাৰ্যকৰী সভাপতি অৰূপ ৰঞ্জন বৰ্মন, সহকাৰী সম্পাদক প্ৰণৱ কুমাৰ ডেকা, কোষাধ্যক্ষ হীৰক জ্যোতি মেধী, কাৰ্যালয় সম্পাদক মনোজ কুমাৰ শৰ্মা, সদৌ নলবাৰী জিলা ছাত্ৰ সন্থাৰ সভাপতি গুণজ্যোতি পাঠক, সাধাৰণ সম্পাদক অক্ষয় ডেকা, সদৌ অসম ছাত্ৰ সন্থাৰ শিক্ষা সম্পাদক ভৱজিৎ বেজবৰুৱা, অসম জাতীয়তাবাদী যুৱ ছাত্ৰ পৰিষদৰ নলবাৰী জিলা সমিতিৰ সভাপতি পাৰ্থপ্ৰতীম শৰ্মা, সাধাৰণ সম্পাদক কৌশিক বৰ্মন, জ্যেষ্ঠ সাংবাদিক এম মহিবৰ ৰহমান, ৰমেন কলিতা, নলবাৰী জিলা সাহিত্য সভাৰ সম্পাদক পংকজ বেজবৰুৱাই শ্ৰদ্ধাঞ্জলি জনায় ৷🔯