🔯পৌৰসভা নিৰ্বাচনঃ বঙাইগাঁৱত অগপৰে আসন বুজাপৰাৰ অংক নিমিলিল বিজেপিৰ🔯

🔯পৌৰসভা নিৰ্বাচনঃ বঙাইগাঁৱত অগপৰে আসন বুজাপৰাৰ অংক নিমিলিল বিজেপিৰ 

🔯নহ'ল মিত্ৰতাঃ দুই দলে অকলে অকলে খেলিব নিৰ্বাচন 

🔯পূৰ্বৰ ২০ খন আসনতকৈ এইবাৰ বাঢ়িবহে,নকমে- ফনীভূষণ চৌধুৰী

🔯বঙাইগাঁও সমষ্টিত আমি ৰাজনীতি কৰা নাই, সমাজ সেৱাহে কৰিছো  

📝বঙাইগাঁওঃ ১৪ ফেব্ৰুৱাৰীঃ পৌৰসভা নিৰ্বাচনৰ দিন ক্ৰমাৎ চমু চাপি অহাৰ সময়তে বঙাইগাঁৱত অগপ - বিজেপিৰ মাজত আসনৰ বুজাপৰাৰ অংকত কেণা লগাত দুয়োটা দলে অকলে অকলে নিৰ্বাচনত প্ৰতিদ্বন্দ্বিতা কৰিবলৈ ওলাইছে ৷ শাসকীয় বিজেপি আৰু অগপ দলৰ মাজত পৌৰসভা নিৰ্বাচনত মিত্ৰতা হ'ব বুলি বিজেপি দলৰ ৰাজ্যিক সভাপতি ভৱেশ কলিতাই মন্তব্য কৰিছিল যদিও শেষ মুহূৰ্তত বঙাইগাঁৱত দুই দলৰ মাজত আসনৰ ভাগ বতৰাকলৈ দুই দলে সঠিক সিদ্ধান্তত উপনীত হ'ব নোৱাৰৰ ফলতে দুই দলৰ মাজত মিত্ৰতা নহ'ল ৷ অগপ দলে শাসকীয় দল তথা মিত্ৰ দল বিজেপিক ২৫ টা ৱাৰ্ডযুক্ত বঙাইগাঁও পৌৰসভাৰ কেৱল মাত্ৰ ৫ টা ৱাৰ্ডহে এৰি দিবলৈ বিচৰাত জিলা বিজেপি দলৰ নেতৃত্ব অসন্তুষ্টহৈ পৰে আৰু অগপ দলৰ প্ৰস্তাৱ মানি লোৱা নহ'ব বুলি জনাই দিয়ে ৷ লগতে নিজাববীয়াকৈ ২৪ টা ৱাৰ্ডৰ প্ৰাৰ্থী তালিকা ঘোষণা কৰিছে ৷ ইয়াৰ পিচতে সোমবাৰে অগপ - বিজেপিৰ মিত্ৰতা সন্দৰ্ভত অগপ বিধায়ক ফনীভূষণ চৌধুৰীয়ে সংবাদ মাধ্যমৰ আগত কয় যে আজিলৈকে যিমানবাৰ পৌৰ সভা নিৰ্বাচন অনুষ্ঠিত হৈছে সিমানবাৰে পৌৰসভাখন অগপ দলে দখল কৰিবলৈ সক্ষম হৈছো ৷ যোৱা পৌৰসভা নিৰ্বাচনত ২৫ টা ৱাৰ্ডৰ ভিতৰত ২০ টা ৱাৰ্ডতে আমাৰ অসম গণ পৰিষদৰ প্ৰাৰ্থী জয়ী হৈছে ৷ আমি বিজেপি দলক কৈছিলো যে আমাৰ যিহেতু ২০ টা ৱাৰ্ড কমিচনাৰ আছে, সেয়ে এই ২০ টা ৱাৰ্ডত আমাৰ ফালৰ পৰাই প্ৰাৰ্থী থাকক ৷ আনহাতে বাকী যি পাঁচটা ৱাৰ্ড আছে, সেই ৱাৰ্ডকেইটা বিজেপিয়ে লওক ৷ তাৰে তিনিটাত বিজেপি আৰু দুটা ৱাৰ্ডত কংগ্ৰেছ প্ৰাৰ্থী জয়ী হৈছিল ৷ এই পাঁচটা ৱাৰ্ডতে আমি অগপ দলে বিজেপিক পূৰ্ণ সমৰ্থন আগবঢ়াম ৷ দুদিনমান আগতে বঙাইগাঁও জিলা অগপৰ সভাপতি বিজয় সিংহই জিলা বিজেপি কাৰ্যালয়লৈ গৈ এই প্ৰস্তাৱ আগবঢ়াইছিল ৷ কিন্তু জিলা বিজেপিৰ তৰফৰ পৰা এই প্ৰস্তাৱ মানি লোৱা নহ'ব বুলি আমাক জনাইছিল ৷ আমি আশা কৰি আছিলো যে বিজেপিৰ তৰফৰ পৰা আমাৰ সৈতে যোগাযোগ কৰিব, কিন্তু কোনো যোগাযোগ নকৰিলে ৷ যাৰ ফলত আমিও কিছু বিপাঙত পৰিছো ৷ এই কাৰণে বিপাঙত পৰিছো যে আমি ভাৱিছিলো ২০ টা ৱাৰ্ডত নিৰ্বাচন খেলিম ৷ কাৰণ অগপ - বিজেপিৰ যিহেতু মিত্ৰতা হ'ব সেয়ে পূৰ্বে আমাৰ দখলত থকা ২০ টা ৱাৰ্ডতে প্ৰাৰ্থী দিম আৰু বাকী ৫ টা ৱাৰ্ডত আমি প্ৰাৰ্থী নিদিও ৷ এনে ধৰণৰ চিন্তা - চৰ্চালৈ আমি অগপ দল বহি আছিলো ৷

ইতিমধ্যে আমাৰ ২০ টা ৱাৰ্ডৰ বাবে প্ৰাৰ্থী প্ৰায় বাচনি হৈ গৈছে ৷ কিন্তু  শেহতীয়াভাৱে আমি দেখিবলৈ পাইছো যে আমাৰ লগত যিহেতু বিজেপি দলে যোগাযোগ কৰা নাই, সেয়েহে বিজেপিয়ে যদি মিত্ৰতাত আৱদ্ধ নহয় নিশ্চিতভাৱে বাকী পাঁচটা ৱাৰ্ডটো অৰ্থাৎ ২৫ টা ৱাৰ্ডতে আমি প্ৰাৰ্থী দিয়াৰ বাবে যো- যা চলাইছো ৷ ইপিনে বিজেপি দলৰ সাংগঠনিক স্থিতি বঙাইগাঁৱত শক্তিশালী হোৱা বুলি দলে দাবী কৰা বিষয় সন্দৰ্ভত অগপ দলৰ বিধায়ক চৌধুৰীয়ে কয় যে বিজেপি দলৰ সাংগঠনিক স্থিতি বঙাইগাঁৱত শক্তিশালী হৈছে নে হোৱা নাই তেওঁলোকেহে বুজি পাব ৷ কিন্তু মই নিজে অসম গণ পৰিষদ দলৰ এজন সদস্য হিচাপে, অসম গণ পৰিষদ দলৰ এজন কৰ্মী হিচাপে যোৱা এটা মাহে বঙাইগাঁও পৌৰসভা এলেকাত ঘুৰি অনুভৱ আৰু উপলব্ধি কৰিছো যে বঙইগাঁৱত আৰু বঙাইগাঁও চহৰত পূৰ্বৰ তুলনাত অগপৰ সংগঠ অধিক শক্তিশালী হৈছে আৰু আমি অধিক শক্তিশালী স্থিতিত আজিৰ দিনটোত আছো ৷ বিজেপিয়ে পৌৰসভা দখল কৰিব নে নকৰে সেইটো কথা আমি আজিৰ দিনটোত নকও ৷ অহা ৯ তাৰিখে কম ৷ কিন্তু এটা কথা ঠিক যে যোৱাবাৰ আমি অগপই ২০ খন আসন পাইছিলো আৰু এইবাৰো আমাৰ ২০ খনতকৈ নকমে ৷ আপোনালোকে লেখি থব ৷ ২০ খন আসনতকৈটো এখনো নকমেই বৰং কেইখন বাঢ়ে সেইটো আজি নকও বুলিহে কয় বিধায়কগৰাকীয়ে ৷ আনহাতে বিজেপিৰ জিলা সভানেত্ৰী হিমানী অধিকাৰীয়ে অগপৰ দখলত থকা বঙাইগাঁও পৌৰসভাই পূৰ্বে বঙাইগাঁও চহৰত কোনো কাম কৰা নাই বুলি অভিযোগ উত্থাপন কৰি বিজেপি আহিলে কাম কৰিব বুলি কৰা মন্তব্য সন্দৰ্ভত বিধায়কগৰাকীয়ে নিজৰ প্ৰতিক্ৰিয়া প্ৰকাশ কৰি কয় যে অগপৰ দখলত থকা পৌৰসভাই কাম কৰিছে নে কৰা নাই এই কথাটো মই আজিৰ দিনত নকও ৷ অগপৰ পৌৰসভাই কাম কৰিছে নে কৰা নাই সেইটো অহা ৯ মাৰ্চত প্ৰমাণ হ'ব ৷ যেতিয়া নিৰ্বাচন আহে, তেতিয়া হিচাব নিকাচ কৰাৰো সময় আহে আৰু   এইটোৱে সময় ৷ যদি আমি অগপৰ পৌৰসভাই কাম কৰা নাই, তেতিয়া হলে নিশ্চিতভাৱে ৰাইজে আমাক ভোট নিদিব ৷ কিন্তু আমি ভাৱো যে বঙাইগাঁৱৰ প্ৰতিটো ৱাৰ্ডত যিমান কাম হৈছে, সেই প্ৰতিটো কামেই অলম গণ পৰিষদ দলৰ জৰিয়তে হৈছে ৷ সেইদৰে অগপ - বিজেপিৰ প্ৰতিদ্বন্দ্বিতা হলে কংগ্ৰেছ লাভাম্বিত হ'ব পাৰে নেকি বুলি সাংবাদিকৰ প্ৰশ্নোত্তৰত বিধায়ক চৌধুৰীয়ে কয় যে অগপ আৰু বিজেপিৰ মিত্ৰতা নহলেও ইয়াত কংগ্ৰেছ লাভাম্বিত হোৱাৰ প্ৰশ্নই নুঠে ৷ বঙাইগাঁও পৌৰসভাত অগপ - বিজেপিৰ মিত্ৰতা হওক বা নহওক কংগ্ৰেছে পৌৰসভা দখল কৰিব নোৱাৰে আৰু এইটো নিশ্চিত ৷ ইপিনে বিজেপি দলে ২৩ নম্বৰ ৱাৰ্ডটো বিধায়ক চৌধুৰীৰ ৱাৰ্ড বুলি সন্মান জনাই দলীয় প্ৰাৰ্থিত্ব নিদিয়াৰ প্ৰসংগত বিধায়ক চৌধুৰীয়ে কয় যে সন্মান জনোৱা নজনোৱা কথাটো নহয়৷ ঠিক আছে তেওঁলোকে প্ৰাৰ্থী ঘোষণা কৰিছে৷ কিন্ত আমি বন্ধুত্বপূৰ্ণ ভাৱে প্ৰতিদ্বন্দ্বিতাত নামিম ৷  আমি বঙাইগাঁৱত মিত্ৰ দল হিচাপে দুয়োটা দলে বন্ধুত্বমূলকভাৱে নিৰ্বাচন খেলিম ৷ আমি নিৰ্বাচন খেলিম ৰাইজৰ ওচৰলৈ গৈহে  ৷ আমি ইয়াত বিজেপিক গালি পৰা, বিজেপিয়ে অগপক গালি পৰা আৰু  সমালোচনা কৰাৰ প্ৰশ্নটো নাহে ৷ আমাৰ নীতি আৰু আদৰ্শৰে ৰাইজক কম যে আমি যদি আপোনালোকক সেৱা আগবঢ়াইছো আমাৰ পক্ষত থাকক ৷ 

আমি আচলতে অসম গণ পৰিষদ দলে বঙাইগাঁৱত ৰাজনীতি কৰা নাই ৷ বঙাইগাঁও সমষ্টিত আমি ৰাজনীতি কৰা নাই ৷ বঙাইগাঁও সমষ্টিত আমি সমাজ সেৱা কৰিছো ৷ ৰাইজৰ সেৱা কৰাৰ মানসিকতালৈ আমি আগবাঢ়ি গৈছো আৰু বঙাইগাঁৱৰ প্ৰতিগৰাকী অসম গণ পৰিষদ দলৰ কৰ্মী, প্ৰতিগৰাকী অসম গণ পৰিষদ দলৰ সদস্যই ৰাইজৰ সমস্যাসমূহ কেনেদৰে সমাধান কৰিব পাৰে তাৰ চিন্তাহে কৰে ৷ অন্য ৰাজনৈতিক দলবোৰৰ দৰে আমি অমুক দিম, তমুক দিম আদি এনেধৰণৰ প্ৰলোভনেৰে মিছা কথা কৈ অসম গণ পৰিষদ দলে কেতিয়াও ইয়াত৷ৰাজনীতি কৰা নাই আৰু ভৱিষ্যতেও নকৰে বুলি কয় বিধায়ক চৌধুৰীয়ে ৷ আনহাতে অগপ দলত বৰ্তমান তিনিগৰাকীকৈ প্ৰাক্তন পৌৰপতি নথকাত দলক কিবা দুৰ্বল কৰিব নেকি বুলি সাংবাদিকে বিধায়ক ফনীভূষণ চৌধুৰীক প্ৰশ্ন কৰাত তেওঁ কয় যে দললৈ মানুহ আহিব আৰু যাব ৷ বৰ্তমান দলত তিনিগৰাকী প্ৰাক্তন পৌৰপতি নাই ৷ সেই প্ৰাক্তন পৌৰপতিকেইগৰাকীৰ ৰাজনৈতিক স্থিতি আৰু শক্তি কিমান আছে যোৱা নিৰ্বাচনবিলাকে প্ৰমাণ কৰিছে ৷ প্ৰথমগৰাকী প্ৰাক্তন পৌৰপতিগৰাকী বৰ্তমান নিজকলৈয়ে ব্যস্ত হৈ আছে ৷দ্বিতীয়গৰাকী বঙাইগাঁও বিধান সভা সমষ্টিত দুবাৰ তিনিবাৰ নিৰ্বাচন খেলিছে ৷ নিৰ্বাচনৰ ফলাফলৰ পৰিসংখ্যা চালে দেখিব যে প্ৰাপ্ত ভোটৰ সংখ্যা শতকৰ ঘৰত আহি পাইছে ৷ গতিকে তেওঁৰ ৰাইজৰ মাজত কিমান জনপ্ৰিয়তা আছে সেয়ে সহজেই অনুমান কৰিব পাৰিব ৷ মই কৈছো যে বঙাইগাঁও পৌৰসভা নিৰ্বাচনত পৌৰসভাৰ ৰাইজ অসম গণ পৰিষদ দলৰ সপক্ষত ঠিয় হ'ব আৰু বঙাইগাঁৱত অসম গণ পৰিষদ দলে পৌৰসভাৰ কোনো মানুহক অন্যায় কৰা নাই, অত্যাচাৰ কৰা নাই ৷ বঙাইগাঁও পৌৰসভা এলেকাত বা বঙাইগাঁও বিধান সভা সমষ্টিত অসম গণ পৰিষদ দলে বঙাইগাঁওবাসী ৰাইজৰ উপকাৰ কৰিব পাৰিছে নে নোৱাৰিছে মই এই কথাটো আজিৰ দিনটোত নকও, ৰাইজে বিচাৰ কৰিব ৷ কিন্তু আমি স্পষ্টভাৱে কম যে বঙাইগাঁও পৌৰসভা এলেকা বা বঙাইগাঁও বিধান সভা সমষ্টি এলেকাৰ কোনো কোনো ব্যক্তি তথা জনসাধাৰণৰেই আমি অন্যায় কৰা নাই ৷ এই কথাটো আমি কম, কৈ আহিছো আৰু কৈ থাকিম ৷🔯