🔯বঙাইগাঁৱত বিধায়ক ফনীভূষণ চৌধুৰী আছে, কিন্তু আমাক পৌৰসভা লাগিব- ভৱেশ কলিতা🔯

🔯বঙাইগাঁৱত বিধায়ক ফনীভূষণ চৌধুৰী আছে, কিন্তু আমাক পৌৰসভা লাগিব- ভৱেশ কলিতা🔯

🔯ৰাইজে পৰিৱৰ্তন বিচাৰিছে🔯

🔯ৰাজ্যৰ ৮০ খন পৌৰসভাৰ ৮০ খনেই বিজেপিয়ে লাভ কৰাৰ দাবী🔯

📝বঙাইগাঁওঃ ২৩ ফেব্ৰুৱাৰীঃ বঙাইগাঁৱত বিধায়ক ফনীভূষণ চৌধুৰী আছে ৷ কিন্তু বঙাইগাঁও পৌৰসভা বিজেপিক লাগিব ৷ সেই কাৰণে ৰাইজ ওলাই আহিছে ৷ এজিপিক বাৰে বাৰে চালে,  বিজেপিক এইবাৰ চাওক ৷ এবাৰ বিজেপিক চাওক দেখিব পৰিৱৰ্তন কি দৰে হয় ৷ এই মন্তব্য ৰাজ্যিক বিজেপিৰ সভাপতি ভৱেশ কলিতাৰ ৷ সমাগত পৌৰসভা নিৰ্বাচনৰ বাবে বুধবাৰে বঙাইগাঁও চহৰত দলীয় প্ৰাৰ্থীৰ হৈ নিৰ্বাচনী প্ৰচাৰ সভাত অংশগ্ৰহণ কৰি  সভাপতিগৰাকীয়ে এই মন্তব্য কৰে ৷ বিজেপিৰ ৰাজ্যিক সভাপতিগৰাকীয়ে আবেলিৰ ভাগত উত্তৰ বঙাইগাঁও,  লেচুতোলা আৰু ভাকাৰিভিটাত অনুষ্ঠিত তিনিখন নিৰ্বাচনী প্ৰচাৰ সভাত অংশগ্ৰহণ কৰি দলীয় প্ৰাৰ্থীসকলৰ হৈ নিৰ্বাচনী প্ৰচাৰ চলায়৷ উত্তৰ বঙাইগাঁৱত সভাপতিগৰাকীয়ে ১৩ নম্বৰ ৱাৰ্ডৰ দলীয় প্ৰাৰ্থী জয়শ্ৰী বৰদলৈৰ হৈ অনুষ্ঠিত কৰা এখন নিৰ্বাচনী প্ৰচাৰ সভাত সমবেত ৰাইজক উদ্দেশ্যি কয় যে বিজেপিয়ে সদায় উন্নয়নৰ ৰাজনীতি কৰে ৷ জাত - পাত আৰু সম্প্ৰদায়ৰ ৰাজনীতি বিজেপিয়ে নকৰে ৷ সেয়ে যদি উন্নয়ন লাগে, তেতিয়াহলে বিজেপিক ভোট দিব লাগিব ৷ মোৰ খুব লাজ লাগিছে যে ১৩ নম্বৰ ৱাৰ্ডত বাট- পথ নাই, বানপানী হয় ৷ বিজেপিৰ প্ৰাৰ্থীক জয়ী কৰিলে এই সমস্যা সমাধান কৰি দিব ৷ বিজেপিয়ে পৌৰসভা দখল কৰিলে চিলনী চোৰৰ উৎপাত তথা ধন লুটৰ ঘটনা ৰোধ কৰাৰ বাবে চহৰখনৰ গুৰুত্বপূৰ্ণ ঠাইসমূহত চিচিটিভি লগোৱা হ'ব ৷ সেইদৰে ৱাৰ্ডে ৱাৰ্ডে এহেজাৰ মানুহ বহিব পৰা শীত তাপ নিয়ন্ত্ৰিত একোটাকৈ সভা গৃহ নিৰ্মাণ কৰি দিয়া হ'ব বুলিও প্ৰতিশ্ৰুতি দিয়ে ৷ সভাপতি কলিতাই কয় যে বঙাইগাঁও পৌৰসভাত ২৫ টা ৱাৰ্ড আছে ৷ তাৰে অগপ বিধায়ক ফনীভূষণ চৌধুৰীৰ ৱাৰ্ডটো তেওঁক বনাচ পইন্ট হিচাবে দি দিছো ৷ আমি সেইটো ৱাৰ্ডত প্ৰতিদ্বন্দ্বিতা নকৰিলো ৷ বাকী ২৪ টা ৱাৰ্ডেই বিজেপিয়ে দখল কৰিব ৷ ৰাজ্যিক সভাপতিগৰাকীয়ে সভাত বিজেপি চৰকাৰৰ বিভিন্ন উন্নয়নমূলক আঁচনিসমূহৰ বিষয়েও কৈ ৰাইজৰ উন্নয়ন কৰিব লাগিলে দলটোৰ প্ৰাৰ্থীসকলক ভোট দি জয়ী কৰিবলৈ আহ্বান জনায় ৷ 

সভাত বিটিচিৰ স্বাস্থ্য বিভাগৰ কাৰ্যবাহী সদস্য অৰূপ দে উপস্থিত থাকি নিজৰ ভাষণত দেশক ভালপোৱা, আগবঢ়াই নিয়া আৰু ৰাইজৰ কথা চিন্তা কৰা দলটোৱে হ'ল বিজেপি বুলি কৈ ৰাইজৰ উন্নয়নৰ বাবে দলৰ প্ৰাৰ্থীক ভোট দিবলৈ আহ্বান জনায় ৷ আনহাতে জিলা বিজেপিৰ সভানেত্ৰী হিমানী অধিকাৰীয়ে কয় যে বঙাইগাঁও জিলাখনত যদি কোনোবাই উন্নয়নমূলক কাম কৰিছে, তেতিয়াহলে বিজেপি নেতৃত্বাধীন চৰকাৰখনে কৰিছে ৷ ৩৫ বছৰ ধৰি অগপ দলৰ বিধায়ক ফনীভূষণ চৌধুৰীয়ে বঙাইগাঁও সমষ্টিটো দখল কৰি আহিছে যদিও এখন চিকিৎসা মহাবিদ্যালয়েই নে এখন অভিযান্ত্ৰিক মহাবিদ্যালয়েই নিৰ্মাণ কৰিলে  ?  আজি যি হৈছে বিজেপি চৰকাৰৰ দিনত উন্নয়ন হৈছে ৷ ৱাৰ্ডত নলাৰ সুব্যৱস্থা নাই ৷ বাট - পথ নাই ৷ বৰষুণ হলেই বানপানী হয় ৷ গতিকে পৰিৱৰ্তন আৰু উন্নয়ন যদি বিচাৰে, তেতিয়াহলে বিজেপিক ভোট দিয়ক ৷ সভাত ৰাজ্যিক মহিলা মৰ্চাৰ সম্পাদিকা মনালিছা কোঁচ, জিলা প্ৰভাৰী ব্ৰজ কুমাৰ দাস,  টাউন উত্তৰ মণ্ডলৰ সভাপতি প্ৰদীপ ঘোষ আদিৰ লগতে ৱাৰ্ডকেইটাৰ পৰা প্ৰতিদ্বন্দ্বিতা কৰা প্ৰাৰ্থী কেইগৰাকীও উপস্থিত থাকে ৷ ইয়াৰ পিচতে ৰাজ্যিক সভাপতিগৰাকীয়ে লেচুতোলাত অনুষ্ঠিত দ্বিতীয়খন নিৰ্বাচনী সভাত অংশগ্ৰহণ কৰি ১ নম্বৰ ৱাৰ্ডৰ প্ৰাৰ্থী সংগীতা দাস, ২ নম্বৰ ৱাৰ্ডৰ প্ৰাৰ্থী সৰস্বতী সৰকাৰ, ৩ নম্বৰ ৱাৰ্ডৰ প্ৰাৰ্থী সুব্ৰত ৰায়, ৪ নম্বৰ ৱাৰ্ডৰ প্ৰাৰ্থী স্বাতী আগৰৱালা, ৫ নম্বৰ ৱাৰ্ডৰ প্ৰাৰ্থী চিত্ৰা দাস আৰু ২৪ নম্বৰ ৱাৰ্ডৰ প্ৰাৰ্থী জবা দাসৰ হৈ নিৰ্বাচনী প্ৰচাৰ চলায় ৷ আনহাতে তৃতীয়খন নিৰ্বাচনী সভা ভাকাৰিভিতাত অনুষ্ঠিত হয় ৷ ইয়াত ৰাজ্যিক সভাপতিগৰাকীয়ে ১৭ নম্বৰ ৱাৰ্ডৰ দলীয় প্ৰাৰ্থী মহিলা বৰ্মন, ১৮ নম্বৰ ৱাৰ্ডৰ প্ৰাৰ্থী সংগীতা ৰায় আৰু ১৯ নম্বৰ ৱাৰ্ডৰ প্ৰাৰ্থী গৌৰাংগ দাসৰ হৈ নিৰ্বাচনী প্ৰচাৰ চলায় ৷ প্ৰচাৰ সভাত বিটিচিৰ স্বাস্থ্য বিভাগৰ কাৰ্যবাহী সদস্য অৰূপ দে,  জিলা বিজেপিৰ সভানেত্ৰী হিমানী অধিকাৰী আদি উপস্থিত আছিল ৷ 

ইপিনে সংবাদ মাধ্যমৰ আগত ৰাজ্যিক বিজেপিৰ সভাপতি কলিতাই কয় যে ৰাজ্যখনত যি ৮০ খন পৌৰসভাৰ নিৰ্বাচন হ'বলৈ গৈ আছে, সেই ৮০ খনতেই ভাৰতীয় জনতা পাৰ্টি নিৰ্বাচিত হ'বলৈ সক্ষম হ'ব ৷ তাত কোনো দ্বিমত নাই ৷ ইতিমধ্যে আমি ৬০ টাকৈ ৱাৰ্ডত বিনা প্ৰতিদ্বন্দ্বিতাৰে জয়ী হ'বলৈ সক্ষম হৈছো ৷ তিনিখনকৈ পৌৰসভা নিৰ্বাচন অনুষ্ঠিত নোহোৱাকৈয়ে আমাৰ দখলত আহিছে ৷ আজি মুখ্যমন্ত্ৰীগৰাকীয়ে অসমখনত যিদৰে সংস্কাৰ যাত্ৰা আৰম্ভ কৰিছে আৰু এক বিৰামহীন যাত্ৰাৰে অসমখনত আগুৱাই নিয়াৰ কাৰণে যি মানসিকতাৰে কাম কৰি আছে তাৰ বাবে পৌৰসভা এলেকাৰ ৰাইজ সন্তুষ্ট আছে ৷ পৌৰসভা এলেকাত যিখিনি কাম হোৱা নাই সেই কামখিনি কৰিবলৈ আমাৰ চৰকাৰ প্ৰতিশ্ৰুতিবদ্ধ ৷ নিশ্চিতভাৱে এই পৌৰসভা অঞ্চলত সামগ্ৰীক বিকাশ যেনে খোৱা পানীৰ সমস্যা,  নলি- নাদৰ সমস্যা, নলাৰ সমস্যা, ষ্ট্ৰীট লাইটৰ সমস্যা সমাধান কৰাৰ বাবে চৰকাৰে এক্সন প্লেন তথা ৰোড মেপ প্ৰস্তুত কৰি উলিয়াইছে ৷ অহা ৬ মাৰ্চত অনুষ্ঠিত হ'বলগীয়া পৌৰসভা নিৰ্বাচনত ভোট দিবলৈ ৰাইজ প্ৰস্তুত হৈ আছে ৷ বঙাইগাঁৱত অসম গণ পৰিষদৰ নেতৃত্বত দীৰ্ঘদিন ধৰি শাসন চলাই আহিছিল ৷ কিন্তু মই ইয়ালৈ আহি গম পালো যে ৰাইজে পৰিৱৰ্তন বিচাৰিছে ৷ গতিকে এই পৰিৱৰ্তন সাপেক্ষে ৰাইজে ভোট দিবলৈ প্ৰস্তুত হৈছে ৷ বিজেপিৰ ৰাজ্যিক সভাপতিগৰাকীয়ে বঙাইগাঁৱৰ পূৰ্বে অভয়াপুৰীত উপস্থিত হৈ অভয়াপুৰী পৌৰসভা নিৰ্বাচনৰ দলীয় প্ৰাৰ্থীৰ হৈ নিৰ্বাচনী প্ৰচাৰ চলায় ৷ সভাপতিগৰাকীয়ে বঙাইগাঁৱৰ লগতে অভয়াপুৰী পৌৰসভাও এইবাৰ বিজেপিয়ে দখল কৰিব বুলি কয় ৷🔯