🔯বঙাইগাঁও জিলাৰ বইটামাৰীত স্বাস্থ্য মেলা🔯

🔯বঙাইগাঁও জিলাৰ বইটামাৰীত স্বাস্থ্য মেলা🔯

📝বঙাইগাঁওঃ ২২ফেব্ৰুৱাৰীঃ বঙাইগাঁও জিলা স্বাস্থ্য বিভাগৰ উদ্যোগত মঙলবাৰে জিলাখনৰ বইটামাৰী খণ্ড প্ৰাথমিক চিকিৎসা কেন্দ্ৰৰ অন্তৰ্গত বিষ্ণুপুৰৰ দীনবন্ধু উচ্চ মাধ্যমিক বিদ্যালয়ত এখন স্বাস্থ্য মেলা অনুষ্ঠিত কৰা হয়। সাধাৰণ ৰাইজৰ সুবিধাৰ্থে বিভিন্ন ৰোগৰ চিনাক্তকৰণ, চৰকাৰী আঁচনিসমূহৰ প্ৰচাৰ আৰু প্ৰসাৰৰ জৰিয়তে সাধাৰণ ৰাইজক সজাগ কৰাৰ উদ্দেশ্যে এই স্বাস্থ্য মেলাৰ আয়োজন কৰা হৈছে।তদুপৰি  বিভিন্ন ৰোগ সন্দৰ্ভত উপযুক্ত চিকিৎসকৰ জৰিয়তে চিকিৎসা প্ৰদান কৰাও এই স্বাস্থ্য মেলাৰ উদ্দেশ্য। স্বাস্থ্য মেলাখনত মেডিচিন, প্ৰসূতি, দন্ত, চকু, সংক্ৰামক আৰু অসংক্ৰামক ৰোগ,পৰিয়াল পৰিকল্পনা, ৰাষ্ট্ৰীয় বাল স্বাস্থ্য কাৰ্যক্ৰমৰ অভিজ্ঞ চিকিৎসকৰ লগতে ভ্ৰাম্যমান চিকিৎসা কোষ আৰু সঞ্জীৱনীৰ কৰ্মকৰ্তাসকল উপস্থিত থাকে ৷

প্ৰায় তিনি শতাধিক লোকে অংশগ্ৰহণ কৰা এই স্বাস্থ্য মেলাখনি অতিৰিক্ত উপায়ুক্ত(স্বাস্থ্য) শ্যামল ক্ষেত্ৰ গগৈ আৰু অতিৰিক্ত উপায়ুক্ত তথা উত্তৰ শালমাৰা মহকুমাৰ মহকুমাধিপতি  (ভাৰপ্ৰাপ্ত) পাৰ্থ সাৰথি জহৰীয়ে শুভ উদ্বোধন কৰে। অতিৰিক্ত উপায়ুক্তদ্বয়ে ভাষণ প্ৰসংগত কয় যে এনেধৰণৰ অনুষ্ঠানসমূহে সাধাৰণ ৰাইজক চৰকাৰৰ বিভিন্ন আঁচনিসমূহৰ বিষয়ে সজাগ কৰাৰ লগতে দুৱাৰদলিত পোৱা এই সুবিধাৰ জৰিয়তে সাধাৰণ ৰাইজক যথেষ্ট উপকৃত কৰে। স্বাস্থ্য মেলাৰ লগতে আয়োজন কৰা সজাগতা সভাত মুখ্য চিকিৎসা আৰু স্বাস্থ্য বিষয়া ডা:পৰেশ ৰয়, জিলা চাৰ্ভিলেন্স বিষয়া ডা: বাদল সৰকাৰ, মহকুমা চিকিৎসা তথা স্বাস্থ্য বিষয়া ডা: মুস্তাফিজুৰ ৰহমানে বিভিন্ন ৰোগ সন্দৰ্ভত ল'বলগা আগতীয়া সজাগতাসমূহৰ বিষয়ে বিস্তৃতভাৱে দাঙি ধৰে। এই স্বাস্থ্য মেলা তথা সজাগতা সভাত ন'ডেল বিষয়া ডা: হৰিদাস সৰকাৰ, মহকুমা চিকিৎসা তথা স্বাস্থ্য বিষয়া ডা: দাৰা সিং ৰায়ৰ লগতে ৰাষ্ট্ৰীয় স্বাস্থ্য মিছনৰ জিলা আঁচনি প্ৰবন্ধক কোষৰ কৰ্মচাৰীসকল উপস্থিত থাকে।🔯