🔯বঙাইগাঁৱৰ নিউ বঙাইগাঁৱত ৰে'লৱে ফুৱেল ষ্টেচনত ধনদাবীৰ অভিযোগ🔯

🔯বঙাইগাঁৱৰ নিউ বঙাইগাঁৱত ৰে'লৱে ফুৱেল ষ্টেচনত ধনদাবীৰ অভিযোগ🔯

🔯আক্ৰাছু নেতাসহ ৭ জনক কৰায়ত্ত🔯

📝বঙাইগাঁওঃ ২৪ ফেব্ৰুৱাৰীঃ ধন দাবী কৰাৰ অভিযোগত আজি আক্ৰাছুৰ কেন্দ্ৰীয় সমিতিৰ এগৰাকী নেতাসহ ৭ জনক বঙাইগাঁও আৰক্ষীয়ে আটক কৰিছে ৷ ঘটনা সন্দৰ্ভত বঙাইগাঁও জিলাৰ উপ আৰক্ষী অধীক্ষক মণিকান্ত চমুৱাই সংবাদ মাধ্যমক জানিবলৈ দিয়া মতে আজি পুৱা প্ৰায় ৮ বজাত এএছ১৯ এইচ ৯৬৭১ নম্বৰৰ এখন ইন’ভা গাড়ীৰে নিউ বঙাইগাঁও ৰে'লৱে জংচনৰ সমীপত থকা ৰে'লৱেৰ ফুৱেল ষ্টেচনত ৭ জনীয়া দল এটি উপস্থিত হয় ৷ দলটোৱে নিজকে জিলা উপায়ুক্তৰ কাৰ্যালয়ৰ পৰা অহা বুলি পৰিচয় প্ৰদান কৰি এই দলটোত ভিজিলেঞ্চৰ মানুহ থকা বুলিও জনায় ৷ এই দলটোৱে ফুৱেল ষ্টেচনৰ দায়িত্বত থকা বিষয়া সকলোক জনায় যে ইয়াত তেলৰ চোৰাং কাৰবাৰ কৰা হয় ৷ তেলৰ টেংকাৰত কম তেল আনি ইয়াত বেছি দেখুৱাই অহা হৈছে ৷ এই খবৰ পায়ে তেওঁলোকে উপস্থিত হৈছে ৷ ইয়াৰ পিছত ধনদাবী কৰি কয় যে দাবী কৰা ধন প্ৰদান কৰিলে বিষয়টো নিস্পত্তি কৰা যাব ৷ নহলে ধৰি লৈ যাব ৷ দলটোৱে দাবী কৰা ধনৰ পৰিমাণ  নিৰ্দিষ্টকৈ ক'ব পৰা নাই যদিও এই দাবীৰ পৰিমাণ আনুমানিক ১০ লক্ষাধিক টকা হ'ব বুলি উপ আৰক্ষী অধীক্ষকগৰাকীয়ে জানিবলৈ দিয়ে ৷ লগতে তেওঁ জনোৱা মতে ৭ জনীয়া দলটোৱে নিজৰ ভুৱা পৰিচয় প্ৰদান কৰা তথা ধনদাবী কৰাৰ পাছতে ফুৱেল ষ্টেচনৰ দায়িত্বত থকা ৰে'লৱে বিভাগৰ বিষয়াজনে ভয় খাই বিভাগৰ উৰ্ধতম কৰ্তৃপক্ষৰ লগত যোগাযোগ কৰাৰ লগতে আৰক্ষী বিভাগৰ লগতো যোগাযোগ কৰে ৷ ইয়াৰ পাছতে ঘটনাস্থলীত আৰক্ষীৰ দল উপস্থিত হৈ এই ৭ জনীয়া দলটোক ইন'ভা বাহনখনৰ সৈতে কৰায়ত্ত কৰে ৷ দলটোৱে ভিডিঅ ৰেকৰ্ডিঙ কৰিছিল ৷ আৰক্ষীয়ে দলটোৱে ব্যৱহাৰ কৰা এটা ভিডিঅ কেমেৰা আৰু ম'বাইলকেইটাও জব্দ কৰে ৷ আৰক্ষীৰ জালত পৰা এই সাতজন হৈছে বঙাইগাঁৱৰ দোলাইগাঁও ভাটিপাৰাৰ মনোৰঞ্জন বৰ্মন ( ৩৪ ) , ঢালিগাঁৱৰ মনোজ বৰুৱা ( ৫০ ) , প্ৰশান্ত ৰায় ( ৪৪ ) আৰু সঞ্জীৱ ৰামছিয়াৰী ( ৪৬ ) , পুৰণি বঙাইগাঁৱৰ ধীৰাজ পাঠক ( ৩৯ ) কাকৰাগাঁৱৰ সঞ্জয় কুমাৰ সিংহ ( ৪২ ) আৰু আনজন  পুৰণি বঙাইগাঁৱৰ মানৱ বৰ্মন ৷ দলটোৰ ভিতৰত সাংবাদিক থকা বুলিও পৰিচয় দিয়া হৈছিল বুলিও অভিযোগ উত্থাপিত হৈছে ৷ আৰক্ষীয়ে আটক কৰা এই ৭ জনীয়া দলটোৰ ভিতৰত ধীৰাজ পাঠক ক্ষীতিশ বৰ্মন নেতৃত্বাধীন সদৌ কোচ-ৰাজবংশী ছাত্ৰ সন্থা চমুকৈ আক্ৰাছুৰ কেন্দ্ৰীয় সমিতিৰ প্ৰচাৰ সম্পাদক বুলি জানিব পৰা গৈছে । 

ঘটনা সন্দৰ্ভত ইতিমধ্যে ৰে'লৱে বিভাগৰ তৰফৰ পৰা বঙাইগাঁও সদৰ থানাত এখন এজাহাৰ দাখিল কৰিছে ৷ এই এজাহাৰৰ ভিত্তিত আৰক্ষীয়ে গোচৰ পঞ্জীয়ণ কৰা বুলিও জানিবলৈ দি শুকুৰবাৰে আটকাধীন কেইজনক আদালতত হাজিৰ কৰোৱা হ'ব বুলিও কয় উপ আৰক্ষী অধীক্ষকগৰাকীয়ে ৷ ইপিনে আৰক্ষীয়ে আটক কৰা আক্ৰাছুৰ প্ৰচাৰ সম্পাদক ধীৰাজ পাঠকে সংবাদ মাধ্যমৰ আগত কয় যে ৰে'লত যোগান ধৰা তেলৰ নামত বহুদিন ধৰি চিণ্ডিকেট চলি আহিছে আৰু এই খবৰ পোৱাৰ পিচত উক্ত বিষয়টো তথ্যসহকাৰে উদঘাটন কৰাৰ বাবে গৈছিল ৷ আনকি ৰে'লৱেৰ উক্ত ফুৱেল ষ্টেচনলৈ তেল সৰবৰাহ কৰা টেংকাৰৰ চালক আদিৰ ভাষ্যও তেওঁলোকে ৰেকৰ্ডিং কৰিছিল বুলিও কৈ ধন দাবী কৰা নাছিল বুলি কয় ৷ আনহাতে আটকাধীন ধীৰাজ পাঠকে তেলৰ চিণ্ডিকেট চলি থকাৰ অভিযোগ কৰা সন্দৰ্ভত আৰক্ষীয়ে বিষয়টো তদন্ত কৰিব নেকি বুলি উপ আৰক্ষী অধীক্ষকগৰাকীক সাংবাদিকে প্ৰশ্ন কৰাত কয় যে যদি বিষয়টো সত্য হয় তেতিয়াহলে আমি ৰে'লৱে বিভাগক জনাম ৷ কাৰণ ফুৱেল ষ্টেচনটো যিহেতু ৰে'লৱে চৌহৰ ভিতৰত, সেয়ে আৰ পি এফ,  জি আৰ পি আৰু ৰে'লৱে বিভাগে তদন্ত কৰক ৷  যদি তেওঁলোকে বিষয়টো আমাক দিয়ে তেতিয়াহলে আমি তদন্ত কৰিম ৷ অথবা আমাৰ যদি সহায় বিচাৰে আমি কৰিম ৷ বৰ্তমান আমি প্ৰথমে তদন্ত আৰম্ভ কৰিম আৰু ৰে'লৱে বিভাগক  জনাম ৷ যদি তেওঁলোকে তদন্ত নকৰে তেতিয়াহলে আমি কৰিম ৷ যিহেতু গোচৰ পঞ্জীয়ণ হৈছে ৷🔯