🔯অচিৰেই বঙাইগাঁও স্বাস্থ্য বিভাগৰ অধীনত আৰম্ভ হ'ব মিছন পৰিৱাৰ, শাচ-বহু সন্মীলন, নয়ে পেহেলি , সাৰ্থী আদি প্ৰকল্প

🔯অচিৰেই বঙাইগাঁও স্বাস্থ্য বিভাগৰ অধীনত আৰম্ভ হ'ব মিছন পৰিৱাৰ, শাচ-বহু সন্মীলন, নয়ে পেহেলি , সাৰ্থী আদি প্ৰকল্প

📝বঙাইগাঁওঃ ২৪ ফেব্ৰুৱাৰীঃ বঙাইগাঁও জিলাৰ  অতিৰিক্ত উপায়ুক্ত(স্বাস্থ্য)শ্যামল ক্ষেত্ৰ গগৈয়ে বৃহস্পতিবাৰে জিলা স্বাস্থ্য সমিতিৰ বিভিন্ন বিভাগৰ কাম-কাজৰ পৰ্যালোচনা কৰে ৷ জিলা উপায়ুক্ত কাৰ্যালয়ৰ সভাকক্ষত অনুষ্ঠিত এই সভাত প্ৰসূতি মাতৃ আৰু নৱজাত শিশুৰ মৃত্যুৰ হাৰ হ্ৰাস কৰা, চিকিৎসালয়ত প্ৰসৱ, শিশুৰ নিয়মীয়া টিকাকৰণ, কোভিডৰ দ্বিতীয় পালি টিকা প্ৰদান, সংক্ৰামক আৰু অসংক্ৰামক ৰোগৰ প্ৰতিৰোধৰ বাবে গ্ৰহণ কৰা ব্যৱস্থাৱলী, নতুনকৈ শুভাৰম্ভ কৰিবলগীয়া পৰিয়াল পৰিকল্পনা বিষয়ক আঁচনি মিছন পৰিৱাৰ, শাচ-বহু সন্মীলন, নয়ে পেহেলি কীট, সাৰথি আদি সন্দৰ্ভত আলোচনা কৰা হয়। সভাৰ আৰম্ভণীতে জিলাখনত মৃত্যু হোৱা নৱজাত শিশু আৰু প্ৰসূতি মাতৃৰ মৃত্যুৰ কাৰণসমূহ বিশ্লেষণ কৰা হয়।এই ক্ষেত্ৰত সংশ্লিষ্ট মহকুমা চিকিৎসা তথা স্বাস্থ্য বিষয়া, শিশুৰোগ বিশেষজ্ঞ, এ এন এম নাৰ্চ আৰু আশা কৰ্মীয়ে কাৰণসমূহ ব্যাখ্যা কৰাৰ পিছত আগলৈ যেন এনেকুৱা নহয় তাৰ বাবে অতিৰিক্ত উপায়ুক্ত(স্বাস্থ্য) গগৈয়ে পৰামৰ্শ দিয়ে।  তদুপৰি চিকিৎসালয়ত যাতে প্ৰসৱ হোৱাটো ব্যৱস্থা কৰে আৰু ঘৰত যাতে প্ৰসৱ নহয় তাৰ বাবে সংশ্লিষ্ট এ এন এম নাৰ্চ আৰু আশা কৰ্মীসকলে যথাযথ ব্যৱস্থা গ্ৰহণ কৰে তাৰ বাবে অতিৰিক্ত উপায়ুক্ত শ্যামল ক্ষেত্ৰ গগৈয়ে পৰামৰ্শ দিয়ে। শিশুৰ নিয়মীয়া টিকাকৰণ ঠিকেঠাকে চলি থকা বুলি জিলা টিকাকৰণ বিষয়াই সভাত জানিবলৈ দিয়ে।আনহাতে কোভিড -১৯ ৰ দ্বিতীয় পালি টিকা ল'বলৈ এতিয়ালৈ যিসকল লোক বাকী আছে বিশেষকৈ শাৰীৰিকভাৱে বাধাগ্ৰস্ত বা ৰোগাক্ৰান্ত বা বয়সস্থ লোক আছে তেওঁলোকক আশা কৰ্মীৰ জৰিয়তে যথা সম্ভৱ সোনকালে চিনাক্ত কৰি কোভিডৰ দ্বিতীয় পালি টিকা প্ৰদান সম্পূৰ্ণ কৰা হ'ব বুলি জিলা টিকাকৰণ বিষয়াই জানিবলৈ দিয়ে। আনহাতে সংক্ৰামক আৰু অসংক্ৰামক ৰোগ সন্দৰ্ভত সংশ্লিষ্ট বিষয়াই কয় যে বৰ্তমানে জাপানী এনকেফেলাইটিছ ৰোগাক্ৰান্ত লোক তেনেকৈ চিনাক্ত হোৱা নাই আৰু এই ৰোগৰ নতুন এটা প্ৰতিষেধক টিকা আৰম্ভ কৰা হৈছে। সংক্ৰামক ৰোগ যক্ষ্মাৰ ক্ষেত্ৰত ইয়াক নিৰ্মূল কৰিবলৈ মহকুমা চিকিৎসা ও স্বাস্থ্য বিষয়াসকলৰ সহায়-সহযোগ কামনা কৰে জিলা যক্ষ্মা নিয়ন্ত্ৰণ বিষয়াই।বিশেষকৈ ভিতৰুৱা অঞ্চলৰ লোক যক্ষ্মা আক্ৰান্ত হোৱাৰ লক্ষণ দেখিলে তেওঁলোকক যাতে যক্ষ্মা ৰোগৰ নিৰ্ণয় আৰু চিকিৎসাৰ বাবে উপযুক্ত স্থানলৈ যাবলৈ পৰামৰ্শ দিয়ে তাৰ বাবে অনুৰোধ জনায়।তেতিয়াহে ২০২৫ বৰ্ষৰ ভিতৰত যক্ষ্মা নিৰ্মূলৰ লক্ষ্যত উপনীত হ'ব পৰা যাব বুলি জিলা যক্ষ্মা নিয়ন্ত্ৰণ বিষয়াই উল্লেখ কৰে ৷ ইপিনে বঙাইগাঁও জিলাক ধঁপাতমুক্ত জিলা হিচাপে গঢ়িবলৈ বিদ্যালয়-মহাবিদ্যালয় পৰিসীমাৰ পৰাই কাম আৰম্ভ কৰিব লাগিব বুলি উল্লেখ কৰে মহামাৰী ৰোগ বিভাগৰ ন'ডেল বিষয়া আনন্দ শৰ্মাই। কেন্দ্ৰীয় চৰকাৰৰ পৰিয়াল-পৰিকল্পনা আঁচনি সম্পৰ্কীয় প্ৰকল্প মিছন পৰিৱাৰ , শাচ-বহু সন্মীলন, নয়ে পেহেলি আৰু সাৰ্থী আদি অহা বিত্তীয় বৰ্ষত বঙাইগাঁও জিলাত শুভাৰম্ভ কৰা হ'ব বুলি সংশ্লিষ্ট বিষয়াই জানিবলৈ দিয়ে। উল্লেখনীয় যে অসমৰ হাইলাকান্দি আৰু কৰিমগঞ্জ জিলাত ইতিমধ্যে আৰম্ভ কৰা হৈছে এই প্ৰকল্পসমূহ।🔯