🔯বঙাইগাঁও জিলাৰ সন্তোষপুৰত স্বাস্থ্য মেলা

🔯বঙাইগাঁও জিলাৰ সন্তোষপুৰত স্বাস্থ্য মেলা 

📝বঙাইগাঁওঃ ১৮ ফেব্ৰুৱাৰীঃ সৰ্বসাধাৰণ ৰাইজৰ স্বাস্থ্যৰ প্ৰতি লক্ষ্য ৰাখি বঙাইগাঁও জিলা স্বাস্থ্য বিভাগৰ উদ্যোগত শুকুৰবাৰে সৃজনগ্ৰাম খণ্ড প্ৰাথমিক চিকিৎসালয়ৰ অধীনত সন্তোষপুৰ মজলীয়া বিদ্যালয়ত এখন স্বাস্থ্য মেলা অনুষ্ঠিত কৰা হয়। স্বাস্থ্য মেলাখনি যুটীয়া স্বাস্থ্য সেৱা সঞ্চালক ডা:ভূপেন বৈশ্য, ৰাষ্ট্ৰীয় স্বাস্থ্য মিছনৰ জিলা আঁচনি প্ৰবন্ধক, সৃজনগ্ৰাম আৰু উত্তৰ শালমাৰা মহকুমাৰ মহকুমা চিকিৎসা তথা স্বাস্থ্য বিষয়া তথা আন আন চিকিৎসা আৰু স্বাস্থ্য বিষয়াসকলৰ উপস্থিতিত উত্তৰ শালমাৰা মহকুমাধিপতি কাৰ্যালয়ৰ অধীনৰ সহকাৰী আয়ুক্ত আশীষ কলিতাই শুভ উদ্বোধন কৰে।স্বাস্থ্য মেলাখনিৰ প্ৰধান উদ্দেশ্য হৈছে চিকিৎসকৰ জৰিয়তে ৰোগ চিনাক্তকৰণৰ লগতে চৰকাৰৰ বিভিন্ন আঁচনিসমূহৰ ক্ষেত্ৰত ৰোগীসকলৰ মাজত সজাগতাৰ সৃষ্টি কৰা।

আজিৰ স্বাস্থ্য মেলাখনত সাধাৰণ মেডিচিন, প্ৰসূতি, দন্ত, চকু, সংক্ৰামক আৰু অসংক্ৰামক ৰোগ, পৰিয়াল পৰিকল্পনা, ৰাষ্ট্ৰীয় বাল স্বাস্থ্য কাৰ্যক্ৰমৰ ডায়েটিচিয়ানৰ লগতে বিভিন্ন বিভাগৰ অভিজ্ঞ চিকিৎসকসকলৰ উপস্থিতিত সাধাৰণ ৰাইজৰ স্বাস্থ্য সম্পৰ্কীয় পৰীক্ষাসমূহ কৰোৱা হয়। ইয়াৰোপৰি ভ্ৰাম্যমান চিকিৎসা কোষ(মোবাইল মেডিকেল ইউনিট) আৰু সঞ্জীৱনী কোষৰ জৰিয়তে উচ্চ ৰক্তচাপ, মধুমেহ আদিৰ সাধাৰণ পৰীক্ষাসমূহ কৰা হয় যাৰ ফলত অতি ভিতৰুৱা অঞ্চলৰ লোকসকল যথেষ্ট উপকৃত হয়।🔯