🔯কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ প্ৰতিষ্ঠা আৰু অস্তিত্ব ৰক্ষাৰ সংগ্ৰামত প্ৰাণ আহুতি দিয়া শ্বহীদৰ তালিকাত ভুৱা শ্বহীদৰ নাম অন্তৰ্ভুক্তি🔯

🔯কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ প্ৰতিষ্ঠা আৰু অস্তিত্ব ৰক্ষাৰ সংগ্ৰামত প্ৰাণ আহুতি দিয়া শ্বহীদৰ তালিকাত ভুৱা শ্বহীদৰ নাম অন্তৰ্ভুক্তি🔯

🔯মুখ্যমন্ত্ৰী ড° হিমন্ত বিশ্ব শৰ্মাৰ ব্যক্তিত্ব আৰু তেওঁৰ দুৰ্নীতিমুক্ত নিকা প্ৰশাসনত কালিমা সানিলে - বিশ্বজিৎ ৰায়🔯

🔯সমগ্ৰ বিষয়টোৰ উচ্চ পৰ্যায়ৰ তদন্ত কৰি দোষী সকলোৰ বিৰুদ্ধে কঠোৰ আইনী ব্যৱস্থা গ্ৰহণ কৰিবলৈ দাবী🔯  

📝বঙাইগাওঁঃ ২০ ফ্ৰেব্ৰুৱাৰীঃ কেএচিৰ তথাকথিত নেতৃবৃন্দ আৰু দুই অসাংবিধানিকভাবে বিভাজিত কোচ ৰাজবংশী ছাত্ৰ সন্থাই কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ প্ৰতিষ্ঠা আৰু অস্তিত্ব ৰক্ষাৰ সংগ্ৰামত প্ৰাণ আহুতি দিয়া শ্বহীদৰ তালিকাত কোচ ৰাজবংশী জাতীয় সংগ্ৰামত মৃত্যুবৰণ নকৰা ব্যক্তিকো জাতীয় শ্বহীদৰ স্বীকৃতি প্ৰদান আৰু চৰকাৰী সাহাৰ্য প্ৰদানৰ নামত দুস্কাৰ্য্য সংঘটিত কৰা বুলি গুৰুতৰ অভিযোগ উত্থাপন কৰিছে কোচ ৰাজবংশী জাতীয় পৰিষদৰ সাধাৰণ সম্পাদক তথা আক্ৰাছুৰ প্ৰাক্তন সভাপতি বিশ্বজিৎ ৰায়, প্ৰাক্তন আক্ৰাছু নেতা মনোৰঞ্জন ৰায় আৰু চিৰাং জিলাৰ হাশ্ৰাওবাৰী নিবাসী শম্ভু ৰায়ে ৷ দেওবাৰে গ্ৰেটাৰ বঙাইগাঁও প্ৰেছ ক্লাবত অনুষ্ঠিত কৰা এক সংবামেলত কোচ ৰাজবংশী জাতীয় সংগ্ৰামৰ চিৰ নমস্য শ্বহীদ সকলোক লৈ যোৱা ৭ জানুৱাৰীত ধুবুৰী জিলাৰ গোলকগঞ্জত ক্ষিতীশ বৰ্মন নেতৃত্বাধীন বিভাজিত সদৌ কোচ ৰাজবংশী ছাত্ৰ সন্থা (আক্ৰাছু)ৰ শ্বহীদ দিৱসত কমতাপুৰ স্বায়ত্ত্বশাসিত পৰিষদৰ তথাকথিত অধ্যক্ষ হিতেশ্বৰ বৰ্মন আৰু মুখ্য কাৰ্যবাহী সদস্য গোকুল বৰ্মনে অসম চৰকাৰৰ মন্ত্ৰী ৰণোজ পেগু আৰু মুখ্যমন্ত্ৰীৰ ৰাজনৈতিক সচিব তথা বিধায়ক জয়ন্ত মল্ল বৰুৱাৰ উপস্থিতিত জাতীয় শ্বহীদৰ স্বীকৃতি আৰু শ্বহীদ পৰিয়াললৈ অসম চৰকাৰৰ পৰা পাঁচ লাখ টকা আৰ্থিক সাহাৰ্য প্ৰদানৰ নামত অতি ঘৃণনীয় কদৰ্য খেল খেলি প্ৰকৃত জাতীয় শ্বহীদৰ চৰম ত্যাগক ভুলন্ঠিত আৰু উপলুঙা কৰি কোচ ৰাজবংশী জাতিটোৰ বাবে এক কলংকিত অধ্যায় লিপিবদ্ধ কৰি জাউতি যুগলৈ খ্যাতি ৰখা বুলিও দোহৰে ৷ উল্লেখ্য যে কোচ  ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ প্ৰতিষ্ঠা আৰু অস্তিত্ব ৰক্ষাৰ সংগ্ৰামত প্ৰাণ আহুতি দিয়া শ্বহীদৰ তালিকাত বঙাইগাঁও শোধনাগাৰত কোম্পানী এটাৰ অধীনত কাম কৰা অৱস্থাত দুৰ্ঘটনাত পতিত হৈ মৃত্যুবৰণ কৰা চিৰাং জিলাৰ হাশ্ৰাওবাৰীৰ প্ৰয়াত হৰিপ্ৰসাদ বৰ্মন নামৰ ব্যক্তি এজনকো শ্বহীদ সজোৱা হৈছে বুলি সংবাদ মেলত অভিযোগ উত্থাপন কৰে ৷ প্ৰয়াত হৰি প্ৰসাদ বৰ্মন শ্বহীদ নহয় বুলিও দাবী কৰে ৷ সংবাদ মেলত কোচ ৰাজবংশী জাতীয় পৰিষদৰ সাধাৰণ সম্পাদক তথা সদৌ কোচ ৰাজবংশী ছাত্ৰ সন্থাক দীৰ্ঘদিন নেতৃত্ব দিয়া প্ৰাক্তন সভাপতি বিশ্বজিৎ ৰায়, চিৰাং জিলা কোচ ৰাজবংশী ছাত্ৰ সন্থাৰ প্ৰাক্তন সাধাৰণ সম্পাদক মনোৰঞ্জন ৰায় আৰু ভুৱা শ্বহীদ হৰিপ্ৰসাদ বৰ্মনৰ সতে বঙাইগাঁও শোধনাগাৰত ব্যক্তিগত কোম্পানীত একেলগে কাম কৰা শম্ভু ৰায়ে কয় যে প্ৰকৃত জাতীয় শ্বহীদক সন্মান জনাই অসম চৰকাৰে শ্বহীদৰ পৰিয়ালক পাঁচ লাখ টকা দিয়া কাৰ্য সচাকৈয়ে আদৰণিও আৰু তাৰবাবে মুখ্যমন্ত্ৰী ড° হিমন্ত বিশ্ব শৰ্মালৈ ধন্যবাদ আৰু তেওঁক কোচ ৰাজবংশী সমাজ আৰু জাতীয় শ্বহীদৰ পৰিয়ালে সদায় স্মৰণ কৰিব । কিন্তু কেএচিৰ তথাকথিত নেতৃবৃন্দ আৰু দুই অসাংবিধানিক ভাবে বিভাজিত কোচ ৰাজবংশী ছাত্ৰ সন্থাই কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ প্ৰতিষ্ঠা আৰু অস্তিত্ব ৰক্ষাৰ সংগ্ৰামত প্ৰাণ আহুতি দিয়া শ্বহীদৰ তালিকাত কোচ ৰাজবংশী জাতীয় সংগ্ৰামত মৃত্যুবৰণ নকৰা ব্যক্তিকো জাতীয় শ্বহীদৰ স্বীকৃতি প্ৰদান আৰু চৰকাৰী সাহাৰ্য প্ৰদানৰ নামত দুস্কাৰ্য্য সংঘটিত কৰা কাৰ্য অতি ঘৃণনীয় ৷ সংবাদমেল যোগে আক্ৰাছুৰ নেতাত্ৰয়ে কেএচিৰ অধ্যক্ষ হিতেশ্বৰ বৰ্মন, মুখ্য কাৰ্যবাহী পাৰিষদ গোকুল বৰ্মন আৰু দুই বিভাজিত আক্ৰাছুৰ তথাকথিত নেতাই সদৌ কোচ ৰাজবংশী ছাত্ৰ সন্থাই ৰাজহুৱাকৈ স্বীকৃতি নিদিয়া ব্যক্তিক সম্ভৱতঃ কমিছনৰ অংক আগত ৰাখি জাতীয় শ্বহীদৰ তালিকাত নাম সন্নিবিষ্ট কৰি কেইবা লাখ টকা আত্মসাৎ কৰা বুলিও সন্দেহ প্ৰকাশ কৰে। নেতাত্ৰয়ে উল্লেখ কৰে য়ে কাৰোবাক জাতীয় শ্বহীদ ঘোষণা কৰিব লাগিলে সংশ্লিষ্ট আঞ্চলিক বা জিলা আক্ৰাছুৰ পৰা কেন্দ্ৰীয় কমিটিলৈ প্ৰস্তাৱ আহিব লাগে আৰু কেন্দ্ৰীয় কমিটিয়ে বিষয়টো চালিজাৰি চাই কাৰোবাক জাতীয় শ্বহীদ হিচাবে ঘোষণা কৰে । আক্ৰাছু কৰিলেই যদি জাতীয় শ্বহীদৰ মৰ্য়াদা পায় তেতিয়াহলে বিভিন্ন কাৰণত মৃৃৃৃত্যু হোৱা নিষ্ঠাবান আক্ৰাছু নেতা- কৰ্মী কিয় জাতীয় শ্বহীদৰ তালিকাত স্থান নাপালে বুলিও প্ৰশ্ন উত্থাপন কৰে ৷ জাতীয় শ্বহীদৰ স্বীকৃতি ইমান সাধাৰণ বা ধেমালিৰ বিষয় নহয় যে আক্ৰাছু কৰিলে বুলি ব্যক্তিগত কামত, পথ দুৰ্ঘটনা, বেমাৰ-আজাৰ হৈ আৰু কোম্পানীত শ্ৰমিক হিচাপে কাম কৰি মৃত্যু হোৱা লোকো জাতীয় শ্বহীদৰ তালিকাত স্থান পাব। কিন্তু অৱশেষত সেয়াই হ'ল ৷ উদাহৰণস্বৰূপে কয় যে চিৰাং জিলাৰ হাশ্ৰাওবাৰী নিবাসী প্ৰয়াত হৰিপ্ৰসাদ বৰ্মন বঙাইগাঁও শোধনাগাৰৰ ডি এইছ ডি টি (DHDT) প্লাণ্টৰ আই টি এম ( ITM ) কোম্পানীৰ ৰিগাৰ হিচাবে কাম কৰোতে টেংকিৰ পৰা পৰি মৃত্যু হৈছিল আৰু কোম্পানীৰ পৰা ক্ষতিপূৰণ হিচাপে কেবালাখ টকা পৰিয়ালে পাইছিল । গতিকে তেওঁ কেনেকৈ জাতীয় শ্বহীদ হ'ব পাৰে আৰু তেওঁক কোনে জাতীয় শ্বহীদৰ স্বীকৃতিৰ প্ৰমাণপত্ৰ দি জাতীয় শ্বহীদ সজালে সেয়া তদন্ত কৰিলেই ওলাই পৰিব ৷ দুৰ্ভাগ্যজনক কথাতো হ'ল ভুৱা শ্বহীদৰ বিষয়টো ৰাজহুৱা হোৱাৰ পিচতো কেএচিৰ ভুৱা ঠিকনাধাৰী দুই শীৰ্ষ নেতা আৰু বিভাজিত দুই আক্ৰাছু গোটে বিষয়টো তদন্ত কৰিবলৈ দাবী কৰাৰ বিপৰীতে চালেবেৰে কোবাই বিষটো গাপ দিয়াৰ বাবে উঠিপৰি লাগিছে বুলিহে অভিযোগ কৰে ৷ 

সংবাদ মেলত কোচ ৰাজবংশী জাতীয় পৰিষদৰ সাধাৰণ সম্পাদক তথা আক্ৰাছুৰ প্ৰাক্তন সভাপতি বিশ্বজিৎ ৰায় আৰু চিৰাং জিলা আক্ৰাছুৰ প্ৰাক্তন সাধাৰণ সম্পাদক মনোৰঞ্জন ৰায়ে কয় যে, আমি সুদীৰ্ঘকাল আক্ৰাছুত থাকোতে হৰিপ্ৰসাদ বৰ্মনৰ লগতে জাতীয় শ্বহীদৰ তালিকাত ২৫ জনৰ নাম কেতিয়াও দেখা নাছিলো আৰু ভুৱা শ্বহীদৰ নামত শ্বহীদ দিৱস পাতি শ্ৰদ্ধাঞ্জলি জনোৱা হোৱা নাছিল। এতিয়া ৰাতিটোৰ ভিতৰতে ইমান দীঘলীয়া শ্বহীদ তালিকা ক'ৰ পৰা আহিল সেয়া উচ্চ পৰ্যায়ৰ তদন্ত কৰিলে ওলাই পৰিব। বৰ্তমানৰ আক্ৰাছু নেতৃত্বৰ দিনত এজনো জাতীয় শ্বহীদ হোৱা নাই ৷ গতিকে এতিয়া কেএচি আৰু আক্ৰাছুৰ নেতৃত্বই ক'ৰ পৰা ২৫ জনক জাতীয় শ্বহীদৰ স্বীকৃতি দি চৰকাৰৰ পৰা পাঁচ লাখকৈ টকা প্ৰদান কৰিলে সেয়া বৰ্তমানৰ বিভাজিত আক্ৰাছু গোটক ৰাজহুৱাকৈ প্ৰকাশ কৰিবলৈ প্ৰত্যাহ্বান জনায় ৷ বিশ্বজিৎ ৰায় আৰু মনোৰঞ্জন ৰায়ে উত্থাপন কৰা অভিযোগ যদি মিছা হয় দুয়োগৰাকী প্ৰাক্তন আক্ৰাছু নেতাই ৰাজহুৱা জীৱন ত্যাগ কৰিব বুলিও দোহাৰে । বৰ্তমানৰ দুই বিভাজিত আক্ৰাছু নেতৃত্ব আৰু কেএচিৰ তথাকথিত অধ্যক্ষ আৰু মুখ্য কাৰ্যবাহী পাৰিষদে ভুৱা শ্বহীদৰ পৰিয়ালৰে অশুভ বুজাবুজি কৰি শ্বহীদৰ তালিকাত নাম সন্নিবিষ্ট কৰি মুখ্যমন্ত্ৰী ড° হিমন্ত বিশ্ব শৰ্মাৰ ব্যক্তিত্ব আৰু তেওঁৰ দুৰ্নীতিমুক্ত নিকা প্ৰশাসনত কালিমা সানিলে বুলিও কয় ৷ গতিকে অসম চৰকাৰক মুখ্যমন্ত্ৰীক কালিমা সনা বিষয়টো উচ্চ পৰ্যায়ৰ তদন্ত কৰি দোষী সকলোৰ বিৰুদ্ধে কঠোৰ আইনী ব্যৱস্থা গ্ৰহণ কৰিবলৈ দাবী জনায় । বিশ্বজিৎ ৰায় আৰু মনোৰঞ্জন ৰায়ে লগতে কয় যে নিজৰ ব্যক্তিগত ঠিকনা জালিয়াতি কৰি পিছ দুৱাৰেদি কেএচিৰ বিষয়বাব গ্ৰহণ কৰা ব্যক্তিয়ে জাতীয় শ্বহীদৰ ক্ষেত্ৰতো জালিয়াতি সংঘটিত কৰি কমিছন খোৱাতো স্বাভাৱিক কথা। এনে নেতৃত্বৰ বিৰুদ্ধে অসমৰ মুখ্যমন্ত্ৰী ড° হিমন্ত বিশ্ব শৰ্মা, মুখ্যমন্ত্ৰীৰ ৰাজনৈতিক উপদেষ্টা তথা বিধায়ক জয়ন্ত মল্ল বৰুৱা আৰু মন্ত্ৰী ৰণোজ পেগুৰ দৃষ্টি আকৰ্ষণ কৰাৰ লগতে ভুৱা শ্বহীদৰ নামত প্ৰদান কৰা পাঁচ লাখ টকা ওভতাই ল'বলৈ অসম চৰকাৰক দাবী জনায় । বিশ্বজিৎ ৰায় আৰু মনোৰঞ্জন ৰায়ে সজোৰে কয় যে তথাকথিত কোচ ৰাজবংশী দৰদী হিতেশ্বৰ বৰ্মন আৰু গোকুল বৰ্মনে কেএচিৰ বিষয়বাব গ্ৰহণ কৰা ৪ (চাৰি) মাহ নৌহওঁতেই কি যাদু মন্ত্ৰৰে কেইবাখনো বিলাসী গাড়ী, ঘৰ ,নামে বেনামী সম্পত্তিৰ পাহাৰ গঢ়ি তুলিবলৈ সক্ষম হ'ল আৰু কেএচিৰ মুখ্য কাৰ্যনিৰ্বাহক পাৰিষদক চিৰাং জিলাৰ বসুমতাৰী উপাধিৰ ঠিকাদাৰে কি স্বাৰ্থত প্ৰায় ৪০ লাখ টকাৰ 'কিয়া কোম্পানী'ৰ গাড়ী উপহাৰ হিচাপে দিলে সেয়াও ৰাজহুৱা কৰক । আক্ৰাছু আৰু কেএচিৰ বিষয়বাব গ্ৰহণ কৰাৰ আগতে হিতেশ্বৰ বৰ্মন আৰু গোকুল বৰ্মনৰ পৰিয়ালৰ আৰ্থিক অবস্থা কি আছিল সকলোৱে জ্ঞাত । বিশ্বজিৎ ৰায় আৰু মনোৰঞ্জন ৰায়ে অনুকিয়াই কয় যে কোচ ৰাজবংশী জনগোষ্ঠীৰ উন্নয়নৰ হকে কাম কৰিম বুলি ফিতাহি মাৰি শ্বহীদৰ নামতো কলংকিত কৰা কেএচিৰ দুই নেতা আৰু বিভাজিত আক্ৰাছুৰ বয়োবৃদ্ধ নেতাই কোচ ৰাজবংশী জনগোষ্ঠীৰ কি উন্নয়ন সাধিব সেয়া ৰাইজে বিচাৰ কৰক ৷ আক্ৰাছু আৰু কোচ ৰাজবংশী জনগোষ্ঠীক কলংকিত কৰা কেএচিৰ দুই শীৰ্ষ নেতা আৰু আক্ৰাছুৰ বয়োবৃদ্ধ নেতাৰ বিৰুদ্ধে জাতিৰ স্বাৰ্থত সময় থাকোতে কেএচিৰ নিষ্ঠাবান  পাৰিষদ, সদস্য আৰু আক্ৰাছুৰ তৃণমূল নেতা-কৰ্মীক মাত মাতিবলৈকো আহ্বান জনায়।🔯