🔯পাটাছাৰকুছিৰ জাতীয়তাবাদী নেতা তথা বিশিষ্ট সমাজকৰ্মী মনোমোহন গোস্বামীৰ মৃত্যু🔯

🔯পাটাছাৰকুছিৰ জাতীয়তাবাদী নেতা তথা বিশিষ্ট সমাজকৰ্মী মনোমোহন গোস্বামীৰ মৃত্যু🔯 

🔯শোকস্তব্ধ পাটাছাৰকুছি🔯

📝পাটাছাৰকুছিঃ ২০ ফেব্ৰুৱাৰীঃ  বজালী জিলাৰ পাটাছাৰকুছিৰ বিশিষ্ট সমাজকৰ্মী তথা  জাতীয়তাবাদী নেতা মনোমোহন গোস্বামী (৬৫)  ৰ শনিবাৰে নিশা আকস্মিক মৃত্যু হয় । জানিব পৰা মতে সন্ধিয়া লোকজনে পাটাছাৰকুছিত প্ৰাগজ্যোতি ক্লাৱৰ উদ্যোগত অনুষ্ঠিত হোৱা উপহাৰ কুপনৰ খেলত ব্যস্ত আছিল । খেল চলি থকাৰ মাজতে গোস্বামীয়ে তাৰ পৰা ওলাই আহে । কিন্তু হঠাৎ কিছু সময় পিছতে নিশা দহ মান বজাত সম্মুখৰে ৰাষ্ট্ৰীয় ঘাইপথত গোস্বামীক মূমূৰ্ষ অৱস্থাত পৰি থকা অৱস্থাত প্ৰত্যক্ষ কৰে স্থানীয় লোকে । লগে লগে চৌদিশে হুৱাদুৱা লাগে আৰু ৰাইজে পাঠশালা চিকিৎসালয়লৈ প্ৰেৰণ কৰে । কিন্তু চিকিৎসালয়ত তেওঁক চিকিৎসকে মৃত ঘোষণা কৰে । আৰক্ষীয়ে কোনো বাহনে দুৰ্ঘটনা কৰাৰ সন্দেহ কৰিছে যদিও আৰক্ষী থানাৰ নিলগতে হোৱা উক্ত ঘটনাত কি বাহন জড়িত আছিল তাৰ কোনো তথ্য দিব নোৱাৰাত সমগ্ৰ ঘটনাটো ৰহস্যৰ আৱৰ্তত সোমাই পৰিছে ।  উল্লেখ্য যে তেওঁ আগন্তুক পাটাছাৰকুছি পৌৰসভা নিৰ্বাচনৰ ৭ নং ৱাৰ্ডৰ  জাতীয় পৰিষদ দলৰ প্ৰক্ষেপিত প্ৰাৰ্থী আছিল । কেইদিনমান পূৰ্বে নিৰ্বাচনৰ মনোনয়ন দাখিল কৰা প্ৰাৰ্থীজনৰ এনেধৰণৰ আকস্মিক ৰহস্যজনক  মৃত্যুত ম্ৰিয়মান পাটাছাৰকুছিবাসী ।  তেওঁৰ মৃত্যুৰ  লগে লগে সামৰণি পৰিল এক বৰ্ণিল জীৱন পৰিক্ৰমাৰ । ছাত্ৰ অৱস্থাতে ছাত্ৰ ৰাজনীতিৰ সৈতে জড়িত আছিল গোস্বামী । অসম আন্দোলনৰ অগ্ৰনী নেতা আছিল গোস্বামী ।  অসম জাতীয়তাবাদী যুৱ ছাত্ৰ পৰিষদৰ বৰপেটা জিলাৰ সভাপতিৰ পদ অলংকৃত কৰাৰ উপৰি কেন্দ্ৰীয় সমিতিতো গুৰু দায়িত্ব পালন কৰিছিল । পিছলৈ অসম গন পৰিষদত যোগদান কৰি বৰপেটা তথা বজালী জিলা অগপৰ নেতৃত্ব লোৱাৰ উপৰি অগপৰ সাধাৰণ পৰিষদৰ সদস্য তথা কেন্দ্ৰীয় কাৰ্যনিৰ্বাহক সদস্য আদি নিৰ্বাচিত হৈছিল । অগপত দীৰ্ঘবছৰ সেৱা আগবঢ়োৱাৰ পিছত অগপ নেতৃত্বই কা আইনৰ বলবৎ কে ধৰি আন ক্ষেত্ৰত লোৱা ভূমিকাত ক্ষুন্ন হৈ যোৱা বছৰ নৱগঠিত অসম জাতীয় পৰিষদত যোগদান কৰে । মৃত্যুৰ সময়লৈ তেওঁ অসম জাতীয় পৰিষদৰ পাটাছাৰকুছি বিধানসভা সমিতিৰ সভাপতিৰ দায়িত্বত আছিল । কোনো দিন আঞ্চলিকতাবাদী চৰিত্ৰৰ পৰা আঁতৰি অহা নাছিল । তাৰ উপৰি পাটাছাৰকুছিৰ প্ৰতিটো অনুষ্ঠান-প্ৰতিষ্ঠানৰ লগত জড়িত আছিল । ইফালে দেওবাৰে মৃতদেহৰ মৰণোত্তৰ পৰীক্ষা সম্পন্ন কৰি দুপৰীয়া নশ্বৰদেহ পাটাছাৰকুছিত উপস্থিত হোৱাৰ লগে লগে অৰ্ধশতাধিক দল-সংগঠন তথা অনুষ্ঠানে শেষ শ্ৰদ্ধাঞ্জলি নিবেদন কৰে । পিছত বাসগৃহত পৰিয়াল তথা আত্মীয়-স্বজনে শেষ শ্ৰদ্ধা জনোৱাৰ পিছত বিয়লি অলেখ গুণমুগ্ধৰ উপস্থিতিত পাটাছাৰকুছি শ্মশানত শেষ কৃত্য সম্পন্ন হয় । মৃত্যুৰ সময়ত গোস্বামীয়ে বৃদ্ধা মাতৃ, পত্নী, দুই পুত্ৰ তথা বহু আত্মীয় স্বজনক এৰি থৈ যায় ।🔯