🔯বঙাইগাঁও শাখা সাহিত্য সভাৰ বাৰ্ষিক অধিৱেশন সম্পন্ন🔯

🔯বঙাইগাঁও শাখা সাহিত্য সভাৰ বাৰ্ষিক অধিৱেশন সম্পন্ন🔯

🔯সাহিত্য সভাৰ প্ৰাচীৰ পত্ৰিকা 'উকি' চাৰিটা সংস্কৰণত সংকলিত ৰূপত উন্মোচন🔯

📝বঙাইগাঁওঃ ২০ ফেব্ৰুৱাৰীঃ বঙাইগাঁও  শতদল শাখা সাহিত্য সভাৰ বাৰ্ষিক অধিৱেশনখন দেওবাৰে বঙাইগাঁও শাখা সাহিত্য সাহিত্য ভৱন প্ৰাংগণত অনুষ্ঠিত হৈ যায় ৷ বঙাইগাঁও শাখা সাহিত্য সভাৰ ভাৰপ্ৰাপ্ত সভানেত্ৰী জ্যোৎস্নাপ্ৰিয়া দেৱীয়ে পতাকা উত্তোলনেৰে কাৰ্যসূচীৰ শুভাৰম্ভ কৰাৰ পিছতে স্মৃতি তৰ্পণ কৰে শাখা সাহিত্য সভাৰ জ্যেষ্ঠ আৰু সক্ৰিয় সদস্য কুঞ্জ নাৰায়ণ দেৱে ৷ ইয়াৰ পিছতে বঙাইগাঁও শাখা সাহিত্য সভাৰ ভাৰপ্ৰাপ্ত সভানেত্ৰী জ্যোৎস্নাপ্ৰিয়া দেৱীৰ পৌৰহিত্যত অনুষ্ঠিত হয় সাধাৰণ সভা ৷ সভাৰ আৰম্ভণিতে শাখাৰ সদস্যাসকলে 'চিৰ চেনেহী মোৰ ভাষা জননী' শীৰ্ষক গীতটি পৰিৱেশন কৰে ৷ সভাত সম্পাদিকা মীনা দেৱীয়ে উদ্দেশ্য ব্যাখ্যা কৰাৰ লগতে ২০২১ বৰ্ষৰ বাৰ্ষিক প্ৰতিবেদন আৰু ২০২০-২১ বৰ্ষৰ হিচাব দাখিল কৰে ৷ ইপিনে সভাত চৰ চাপৰি ভাষা বিকাশ সমিতিৰ আহ্বায়ক ড°আব্দুছ ছবুৰে মুখ্য বক্তা হিচাপে উপস্থিত থাকি নিজৰ ভাষণত কয় যে  সাহিত্য সভাৰ জৰিয়তে আমাৰ সমাজত সম্প্ৰতিৰ বান্ধোন হয় ৷ কিন্ত বৰ্তমান সময়ত সাহিত্য সভা মন্থৰ হৈ পৰিছে ৷ কেৱল ধনৰ অংকহে কৰে ৷ প্ৰকৃততে ইয়াৰ সফলতা অৰ্জনৰ মূলমন্ত্ৰ গ্ৰন্থ অধ্যয়ন আৰু বিশ্লেষণহে ৷ আনহাতে সভাত বিশিষ্ট অতিথি হিচাপে উপস্থিত থাকি বিপুলানন্দ শৰ্মাই তেওঁৰ ভাষণত মাধৱ কন্দলীয়েই অসমীয়া ভাষাৰ সৃষ্টিকৰ্তা বুলি উল্লেখ কৰাৰ লগতে শংকৰদেৱ মাধৱদেৱে ভাষা সাহিত্যৰ প্ৰাণ প্ৰতিষ্ঠা কৰি থৈ গৈছে বুলি কয় ৷ সভাত বৃহত্তৰ বঙাইগাঁও প্ৰেছ ক্লাবৰ সভাপতি তথা জ্যেষ্ঠ সাংবাদিক ৰঞ্জিত কুমাৰ শৰ্মাই চাৰিটা সংস্কৰণত সংকলিত ৰূপত পুথি আকাৰে প্ৰকাশ কৰা শাখা সাহিত্য সভাৰ প্ৰাচীৰ পত্ৰিকা 'উকি' উন্মোচন কৰে ৷ তেওঁ নিজৰ ভাষণত কয় যে বহুতো কথিত ভাষা চৰ্চাৰ অভাৱৰ ফলত এই সময়ত ভাষাবিলাক বিলুপ্তিৰ পথত উপনীত হয় ৷ সেয়ে ভাষাৰ চৰ্চা কৰাৰ ওপৰত গুৰুত্বাৰোপ কৰে ৷ তেওঁ লগতে সকলো প্ৰতিষ্ঠানতে পুথিভঁৰালৰ প্ৰয়োজনীয়তা আছে বুলিও দোহাৰে ৷ কিয়নো পুথি প্ৰকাশ হৈ আছে যদিও সংৰক্ষণৰ অভাৱ হৈছে বুলি কয় ৷ প্ৰেছ ক্লাবৰ সভাপতি গৰাকীয়ে প্ৰতি বছৰে বিভিন্ন গল্পবোৰৰ একোখন সংকলিত গল্পপুথি প্ৰকাশ কৰিবলৈকো সাহিত্য সভালৈ এটি প্ৰস্তাৱ আগবঢ়ায় ৷ সভাত অসম সাহিত্য সভাৰ মুখপাত্ৰ অমৰেন্দ্ৰ বৰুৱাই গ্ৰন্থমেলাৰ প্ৰয়োজনীয়তা, ৰমেন দাসে অসম সাহিত্য সভাৰ ভূমিকাত ক্ষোভ প্ৰকাশ, গণেশ্বৰ দেৱশৰ্মাই স্বীকৃতি আৰু প্ৰচাৰৰ বাবে বহু সাহিত্যিক অনাদৃত হোৱাৰ কথা ব্যক্ত কৰি বক্তব্য ৰাখে ৷ আনহাতে সাহিত্য সভাৰ গীত- মাত অনুষ্ঠানত ডাঃ ৰজনী কুমাৰ শৰ্মা, বিনীতা শৰ্মা আৰু নন্দলাল বৰ্মনে গীত পৰিৱেশন কৰাৰ বিপৰীতে বনলতা দাসে অনুগল্প আৰু যামিনী দেৱী আৰু নগেন হাজৰিকাই স্বচৰিত কবিতা পাঠ কৰে ৷ সভাৰ শেষৰফালে সভাপতিয়ে চমু বক্তব্য ৰখাৰ পিছতে ভাৰতৰত্ন কোকিলকণ্ঠী গায়িকা লতা মংগেশকাৰ, বাপ্পী লাহেড়ী, অপূৰ্ব বেজবৰুৱা, অৰূপ বৰঠাকুৰ, প্ৰতাপ বৰদলৈ, পংকজ পূজাৰী আদি বিভিন্ন ক্ষেত্ৰত অৰিহণা যোগোৱা জ্ঞাত অজ্ঞাত ব্যক্তিৰ মৃত্যুত গভীৰ শোক প্ৰকাশ কৰি এক মিনিট সময় মৌনতা অৱলম্বব কৰে  আৰু সভাৰ সামৰণি পৰে ৷🔯