🔯বঙাইগাঁও জিলা উন্নয়ন আয়ুক্তৰ কৃষি, বন, ৰেচম, হস্ততাঁত-বস্ত্ৰশিল্প আদি বিভাগৰ উন্নয়নমূলক কামৰ পৰ্যালোচনা🔯

🔯বঙাইগাঁও জিলা উন্নয়ন আয়ুক্তৰ কৃষি, বন, ৰেচম, হস্ততাঁত-বস্ত্ৰশিল্প আদি বিভাগৰ উন্নয়নমূলক কামৰ পৰ্যালোচনা🔯 

📝বঙাইগাঁওঃ ২২ ফেব্ৰুৱাৰীঃ বঙাইগাঁও জিলা উন্নয়ন আয়ুক্ত ভাস্কৰ দাসে মঙলবাৰে কেবাটাও উন্নয়নমূলক বিভাগৰ কাম-কাজৰ পৰ্যালোচনা কৰে। বঙাইগাঁও জিলা উপায়ুক্ত কাৰ্যালয়ৰ সভাকক্ষত অনুষ্ঠিত সভাত সমবায়, ভূমি সংৰক্ষণ, সামাজিক বনানিকৰণ, ৰেচম, কৃষি, পশুপালন, ৰাষ্ট্ৰীয় গ্ৰামীণ জীৱিকা মিছন, ৰাষ্ট্ৰীয় নগৰ জীৱিকা মিছন,দক্ষতা বিকাশ, জিলা উদ্যোগ আৰু বাণিজ্য বিভাগ আদি বিভাগৰ বিষয়াৰ লগত জিলা উন্নয়ন আয়ুক্তগৰাকীয়ে বিভাগৰ কাম-কাজৰ পৰ্যালোচনা কৰে। সভাত জিলা উন্নয়ন আয়ুক্তগৰাকীক কৃষি বিষয়া সঞ্জয় সেনগুপ্তই জনায় যে বৰ্তমানে কৃষি বিভাগৰ অধীনত ৫ টা ধান ক্ৰয় কেন্দ্ৰৰ জৰিয়তে ভাৰতীয় খাদ্য নিগমে ধান ক্ৰয় কৰি আছে। বৰ্তমানলৈকে ৫৪০ মেট্ৰিক টন ধান ক্ৰয় কৰিছে। মুখ্যমন্ত্ৰীৰ সমগ্ৰ গ্ৰাম্য উন্নয়ন যোজনাৰ অধীনত জিলাখনত এতিয়ালৈকে ৪৭২ খন ৰাজহ গাঁৱে এখনকৈ ট্ৰেক্টৰ লাভ কৰিছে আৰু জিলাখনৰ ১,৩৬৩ গৰাকী কৃষকে কিষাণ ক্ৰেডিট কাৰ্ড ঋণ পাইছে । সভাত সমবায় বিভাগৰ পঞ্জীয়কক তেওঁলোকৰ বিভাগৰ বিষয়াক কৃষি বিভাগৰ ধান ক্ৰয় কামত সহায় কৰিবলৈ জিলা উন্নয়ন আয়ুক্তই নিৰ্দেশ দিয়ে। আনহাতে ভূমি সংৰক্ষণ বিভাগৰ বিষয়াক বান আৰু গৰাখহনীয়া ৰোধত সহায়ক হোৱাকৈ কেইটামান আঁচনি যুগুতাবলৈ পূৰ্ৱৰ পৰ্যালোচনা সভাত উপায়ুক্ত ডা:এম এছ লক্ষ্মী প্ৰিয়াই ইতিমধ্যে নিৰ্দেশ দিছিলে। সভাত ভূমি সংৰক্ষণ বিভাগৰ কাৰ্যবাহী অভিযন্তাই জিলা উন্নয়ন আয়ুক্তক জনায় যে ইতিমধ্যে উক্ত আঁচনি যুগুতাই দাখিল কৰিছে। একেদৰে ৰেচম বিভাগ আৰু দক্ষতা বিকাশ বিভাগৰ যুটীয়া উদ্যোগত এড়ী পলুৰ এবিধ আচাৰ বনোৱাৰ বাবে প্ৰক্ৰিয়া চলি আছে বুলি সংশ্লিষ্ট বিষয়াই জানিবলৈ দিয়ে। আনহাতে হস্ততাঁত-বস্ত্ৰশিল্প বিভাগৰ অধীক্ষকে জনায় যে স্বনিৰ্ভৰ নাৰী আঁচনিৰ অধীনত থলুৱা গামোচা ক্ৰয়ৰ এটা অভিযান চলি আছে। অধীক্ষকগৰাকীয়ে জনায় যে মুদ্ৰা ঋণৰ অধীনত ৯৪ গৰাকী হিতাধিকাৰীৰ আবেদন বেংকলৈ মঞ্জুৰীৰ বাবে তেওঁ ইতিমধ্যে পঠাইছে।ইপিনে পশুপালন বিষয়াই জনায় যে পশুৰ নিয়মীয়া টিকাকৰণ চলি আছে  ৷ জিলা উদ্যোগ আৰু বাণিজ্য বিভাগৰ মহাপ্ৰন্ধকে সভাত প্ৰধানমন্ত্ৰী নিয়োগ সৃষ্টি আঁচনিৰ অধীনত অলপতে তেওঁৰ কাৰ্যালয়ৰ পৰা বিভিন্ন বেংকলৈ ২৩ গৰাকী নিবনুৱা হিতাধিকাৰীৰ আবেদন পঠোৱা হৈছিলে আৰু সেইখিনিৰ এতিয়া মঞ্জুৰী প্ৰক্ৰিয়া কৰি থকা হৈছে বুলি জনায় ৷ সেইদৰে সামাজিক বনানিকৰণ বিভাগৰ অধীনত নগৰাঞ্চলত থলুৱা ঔষধি গছ ৰোপণ সম্পৰ্কীয় বনানীকৰণ "মিয়াৱাকি"(Japanese Scientist -Miyawaki ৰ নামেৰে নামাকৰণকৃত)ৰ আৰ্হিত বৃক্ষৰোপণ সম্পৰ্কত পূৰ্ৱৰ সভাত উপায়ুক্ত ডা:এম এছ লক্ষ্মী প্ৰিয়াৰ নিৰ্দেশনামৰ্মে প্ৰকল্প যুগুত কৰা বুলি সামাজিক বনানীকৰণৰ সংমণ্ডল বন বিষয়াই জানিবলৈ দিয়ে। সভাত ৰাষ্ট্ৰীয় গ্ৰামীণ জীৱিকা মিছন আৰু ৰাষ্ট্ৰীয় নগৰীয়া জীৱিকা মিছনৰ অধীনৰ আত্ম-সহায়ক গোটকো উদ্যোগীকৰণৰ অন্তৰ্গত কৰাৰ বাবে জিলা প্ৰকল্প প্ৰবন্ধকে অনুৰোধ জনায়।উল্লেখ্য যে সোমবাৰে জিলা উন্নয়ন আয়ুক্ত ভাস্কৰ দাসে সমাজ কল্যাণ বিভাগৰ খতিয়ান লৈছিল।🔯