🔯বঙাইগাঁও জিলাৰ হাপাছাৰা গাঁও পঞ্চায়ত চৌহদত বান-খহনীয়া গ্ৰস্তৰ অৱস্থান ধৰ্মঘট

🔯বঙাইগাঁও জিলাৰ হাপাছাৰা গাঁও পঞ্চায়ত চৌহদত বান-খহনীয়া গ্ৰস্তৰ অৱস্থান ধৰ্মঘট

🔯বান সাহাৰ্য বিতৰণৰ ক্ষেত্ৰত কেলেংকাৰী সংঘটিত হোৱাৰ অভিযোগ 

🔯মুখ্যমন্ত্ৰীলৈ আঠ দফীয়া দাবী সম্বলিত স্মাৰক পত্ৰ প্ৰেৰণ

📝বঙাইগাঁওঃ ১০ ফেব্ৰুৱাৰীঃ ভাৰতৰ গণতান্ত্ৰিক যুৱ ফেডাৰেচন(ডি ৱাই এফ আই)ৰ ২ আৰু ৩ নং জাৰাগুৰী শাখা কমিটিৰ উদ্যোগত বুধবাৰে বঙাইগাঁও জিলাৰ ২ নং জাৰাগুৰীস্থিত হাপাছাৰা গাঁও পঞ্চায়ত চৌহদত আই নদীৰ প্ৰলয়ংকাৰী বান-গৰাখহনীয়া প্ৰতিৰোধৰ দাবীত পুৱা ১১ বজাৰ পৰা দিনৰ ১ বজালৈকে তিনি ঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে। উল্লেখ্য যে প্ৰায় তিনিটাতকৈ অধিক দশকজু্ৰি আই নদীৰ প্ৰলয়ংকাৰী বান আৰু খহনীয়াই বঙাইগাঁও জিলাৰ উত্তৰ অভয়াপুৰী সমষ্টিৰ জাৰাগুৰী, বালাজানী-চেচাঁপানী, বটগুৰী, হুৰামাৰা, ভাণ্ডাৰা, বাঁশবাৰী, নধীয়াপাৰা, কীৰ্তনপাৰা, নাচনকুৰী, গৰাইমাৰী আদিকে ধৰি নদীখনৰ দুয়োপাৰে বসবাস কৰা বাসিন্দা সকলৰ ব্যাপক ক্ষতিসাধন কৰি আহিছে। হাজাৰ-হাজাৰ বিঘা কৃষিভূমি বালিয়ে পুতি পেলোৱাৰ লগতে মানুহৰ ঘৰ-বাৰী, ভেটি উচন কৰি জীৱিকা নিৰ্বাহৰ ক্ষমতা নাইকীয়া কৰি পেলাইছে ৷ যাৰ ফলশ্ৰুতিত দীৰ্ঘদিন ধৰি মানুহবোৰ মথাউৰিৰ দাঁতিৰ অস্বাস্থ্যকৰ পৰিৱেশৰ মাজত জুপুৰি সাঁজি বসবাস কৰি আহিছে। এই সন্দৰ্ভত ভাৰতৰ গণতান্ত্ৰিক যুৱ ফেডাৰেচনৰ ২ আৰু ৩ নং জাৰাগুৰী শাখা কমিটিৰ নেতা মজিবৰ ৰহমান আৰু নাজিমুল ইছলামে এক প্ৰেছ বিবৃতিত অভিযোগ কৰা মতে বানপানীৰ সময়ত বহুকেইবাৰ মন্ত্ৰী-বিধায়কে নৌকাবিহাৰ কৰাৰ লেখীয়াকে অঞ্চলবোৰ পৰিদৰ্শন কৰি বহু আশ্বাস দিয়া স্বত্তেও আজিকোপতি চৰকাৰে তেওঁলোকৰ সংস্থাপন তথা নদীখনক নিয়ন্ত্ৰণ কৰাৰ ফলপ্ৰসু ব্যৱস্থা গ্ৰহণ কৰাৰ পৰিকল্পনা গ্ৰহণ কৰা পৰিলক্ষিত হোৱা নাই। ইপিনে বানপানীৰ সময়ত নদীখনৰ বাঢ়নী পানীৰ সমান্তৰালভাৱে গৰাখহনীয়াই ৰাস্তা-ঘাট, দলংবোৰ উটুৱাই লৈ যোৱাৰ পাছত কিছু মেৰামতি কৰাৰ বাহিৰে বাকীবোৰৰ মেৰামতি আৰু পুনৰ নিৰ্মাণ আজিলৈকেও হৈ উঠা নাই বাবে অঞ্চলবাসীয়ে যমৰ যাতনা ভোগ কৰিবলগীয়া পৰিৱেশৰ সৃষ্টি হৈ আহিছে। বান-বিধ্বস্ত ভুক্তভোগী পৰিয়ালবোৰৰ বাবে চৰকাৰে প্ৰদান কৰা সাহাৰ্য বিতৰণৰ ক্ষেত্ৰতো কেলেংকাৰী সংঘটিত হোৱাৰ অভিযোগ উত্থাপন কৰিছে প্ৰতিবাদকাৰীসকলে। লক্ষ্যণীয় যে বঙাইগাঁও জিলা দুৰ্যোগ ব্যৱস্থাপনা কৰ্তৃপক্ষই বান-গৰাখহনীয়াত ক্ষতিগ্ৰস্ত পৰিয়ালবোৰক আৱণ্টন দিয়া সাহাৰ্যৰ ক্ষেত্ৰতো একাংশ স্বাৰ্থন্বেষী জনপ্ৰতিনিধি, বিষয়াই স্থানীয় একাংশ দালালৰ সৈতে মিলি ব্যাপক লুন্ঠন চলোৱাৰো অভিযোগ ব্যক্ত কৰে। বানপীড়িত সকলৰ পৰা ভোটাৰ কাৰ্ড, পান কাৰ্ড, ফটো আদি যাৱতীয় নথি কৌশলেৰে সংগ্ৰহ কৰি বেংকৰ গ্ৰাহক সেৱা কেন্দ্ৰত হিতাধিকাৰীসকলৰ অজ্ঞাতে একাউন্ট খুলি সেইবোৰত সাহাৰ্যৰ ধন সোমোৱাই গ্ৰাহক সেৱা কেন্দ্ৰৰ মালিকৰ সৈতে মিলি অতি সংগোপনে তাৰ পৰা ধনখিনি আত্মসাৎ কৰাৰো বহু অভিযোগ উল্লেখ কৰে। উক্ত ঘটনা তেওঁলোকৰ দৃষ্টিগোচৰ হোৱাত তেওঁলোকৰ মাজৰে এগৰাকী সতীৰ্থই যোৱা বছৰৰ জুন মাহত তথ্য জনাৰ অধিকাৰ আইনৰ অধীনত জিলাখনৰ তথ্য বিষয়াৰ ওচৰত ২০১৫ চনৰ পৰা ২০২০ চনলৈকে ডিডিএমএ (DDMA ) ই বিতৰণ কৰা সাহাৰ্যৰ তথ্য বিচাৰি আবেদন দাখিল কৰে যদিও আজিলৈকে বিচৰা তথ্য অভিযোগকাৰীক প্ৰদান কৰা হোৱা নাই। এই লুণ্ঠন প্ৰক্ৰিয়াত মাণিকপুৰ ৰাজহ চক্ৰৰ বিষয়া আৰু স্থানীয় লাট মণ্ডলৰ সক্ৰিয় অংশগ্ৰহণ থকাৰ সন্দেহৰ কথা ব্যক্ত কৰে। এনে ধৰণৰ বহু অভিযোগেৰে পৰিৱেশ উত্তাল কৰি তোলে আৰু এই সমগ্ৰ বিষয়ত মুখ্যমন্ত্ৰীগৰাকীৰ হস্তক্ষেপ বিচাৰি নিম্ন উল্লেখিত দাবীসমুহৰ ভিত্তিত অসমৰ মুখ্যমন্ত্ৰীলৈ এখন স্মাৰক পত্ৰ প্ৰেৰণ কৰিছে। বঙাইগাঁও জিলা উপায়ুক্তৰ জৰিয়তে প্ৰেৰণ কৰা আঠ দফীয়া দাবী সম্বলিত স্মাৰক পত্ৰত আই নদীৰ দুয়োপাৰত বিজ্ঞানসন্মতভাৱে মথাউৰি নিৰ্মাণ কৰা আৰু নদীখনৰ বক্ষ খান্দি নিয়ন্ত্ৰণৰ ব্যৱস্থা কৰা, বান-গৰাখহনীয়াত ক্ষতিগ্ৰস্ত পৰিয়ালবোৰক উপযুক্ত ক্ষতিপূৰণ আৰু পুণৰ সংস্থাপন দিয়াৰ ব্যৱস্থা কৰা, বান-গৰাখহনীয়া পীড়িতসকলক জিলা দুৰ্যোগ ব্যৱস্থাপনা কৰ্তৃপক্ষই প্ৰদান কৰা সাহাৰ্য বিতৰণৰ ক্ষেত্ৰত সংঘটিত হোৱা অনিয়মৰ উপযুক্ত নিৰপেক্ষ তদন্ত কৰি সাহাৰ্য পুঁজিৰ হিচাপ ৰাজহুৱা কৰা, ৩১ নং ৰাষ্ট্ৰীয় ঘাইপথৰ পৰা ২-৩ নং জাৰাগুৰীৰ মাজেৰে যোৱা মথাউৰি অতি শীঘ্ৰে পুণৰ নিৰ্মাণ কৰা, ৮ নং হাপাছৰা গাঁও পঞ্চায়তৰ অধীনত হোৱা উন্নয়ণমূলক কাম-কাজত সংঘটিত দুৰ্নীতি ৰোধ কৰা, তথ্য জনাৰ আইনৰ অধীনত বিচৰা তথ্যসমূহ ক্ষীপ্ৰতাৰে প্ৰদান কৰা, মহাত্মা গান্ধী এনৰেগা(MGNREGA )ৰ অধীনৰ কামবোৰ যন্ত্ৰৰ পৰিৱৰ্তে শ্ৰমিকৰ দ্বাৰা সম্পাদন কৰাৰ জৰিয়তে তেওঁলোকক বছৰি ১০০ (এশ) দিনৰ কাম দিয়াৰ ব্যৱস্থা কৰা, দীৰ্ঘদিন ধৰি বালাজানী-চেচাঁপানী, ২-৩ নং জাৰাগুৰীত আই নদীৰ চৰত বসবাস কৰা শিশুসকলৰ পঢ়া-শুনাৰ সুবিধাৰ্থে একোখনকৈ প্ৰাথমিক আৰু মাধ্যমিক বিদ্যালয় স্থাপন কৰাৰ ব্যৱস্থা কৰাৰ দাবী জনায় । ইপিনে  অসমৰ মুখ্যমন্ত্ৰীয়ে তেওঁলোকৰ দাবীসমূহ নিষ্পত্তি নকৰিলে পৰৱৰ্তী সময়ত ইয়াতকৈও তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ দিছে প্ৰতিবাদকাৰীসকলে । পৰৱৰ্তী সময়ত চৰকাৰে কি ব্যৱস্থা গ্ৰহণ কৰে সেয়া হ'ব লক্ষণীয়।🔯