🔯চিৰাঙত সাংবাদিকক আৰক্ষীৰ প্ৰহাৰ

🔯চিৰাঙত সাংবাদিকক আৰক্ষীৰ প্ৰহাৰ

🔯দুই আৰক্ষী কনিষ্টবলক নিলম্বন

🔯গ্ৰেপ্তাৰৰ দাবীত অটল চিৰাং জিলা প্ৰেছ ক্লাব 

📝বঙাইগাঁওঃ ৯ ফেব্ৰুৱাৰীঃ অৱশেষত সাংবাদিকৰ তীব্ৰ প্ৰতিবাদত সেও মানি চিৰাং জিলাৰ বাসুগাঁৱত সাংবাদিকক প্ৰহাৰ কৰা ঘটনাৰ লগত জড়িত দুই আৰক্ষীক নিলম্বন কৰিবলৈ বাধ্য হ'ল আৰক্ষী বিভাগে ৷ উল্লেখ্য যে যোৱা ৭ ফেব্ৰুৱাৰীত বাসুগাঁৱত কৰ্তব্যৰত  অৱস্থাত থকা সাংবাদিক জয়ন্ত জদেৱনাথক আৰক্ষীয়ে প্ৰহাৰ কৰি আহত কৰা ঘটনাকলৈ ৰাজ্যজুৰি সাংবাদিকমহলৰ মাজত তীব্ৰ প্ৰতিক্ৰিয়াৰ সৃষ্টি কৰাৰ লগতে  প্ৰতিবাদী কাৰ্যসূচী ৰূপায়ণ কৰি আহিছিল সাংবাদিকসকললে ৷ এনে অৱস্থাত অৱশেষত ঘটনাৰ লগত জড়িত দুই আৰক্ষীক নিলম্বন কৰিবলৈ বাধ্য হয় আৰক্ষী বিভাগে ৷ ঘটনাৰ লগত জড়িত বাসুগাঁও থানাত কৰ্মৰত  প্ৰদীপ সাহা আৰু তেওঁক উচটনি দিয়া এল আৰ বৰ্মন নামৰ কনিষ্টবল দুজনক চিৰাং আৰক্ষীয়ে ঘটনাৰ পিছতে  প্ৰথমে ৰিজাৰ্ভ ক্ল'জ কৰিছিল। কিন্তু চিৰাঙৰ লগতে ‌‌‌‌‌‌‌‌সমগ্ৰ ৰাজ্যজুৰি হোৱা সাংবাদিকৰ তীব্ৰ প্ৰতিবাদত সেও মানি কনিষ্টবল দুজনক নিলম্বন কৰিবলৈ বাধ্য হয় চিৰাং আৰক্ষী প্ৰশাসন। 

ইপিনে চিৰাং জিলা সাংবাদিক সন্থাই দোষী কনিষ্টবল দুজনৰ লগতে উচটনি দিয়া আন এজন কনিষ্টবল অৰবিন্দ চৌধুৰীক ৪৮ ঘণ্টাৰ ভিতৰত গ্ৰেপ্তাৰ কৰাৰ বাবে  দাবী জনাই চিৰাং জিলা প্ৰশাসনৰ ওচৰত মঙলবাৰে স্মাৰকপত্ৰ প্ৰদান কৰিছিল। কনিষ্টবলকেইজনৰ গ্ৰেপ্তাৰৰ দাবীত এতিয়াও অটল আছে বুলি জিলা প্ৰেছ ক্লাবৰ সভাপতি আবু বক্কৰ ছিদ্দিকে জানিবলৈ দিছে। অন্যথা বড়োলেণ্ড সাংবাদিক সন্থাৰ সহযোগত তীব্ৰ গণতান্ত্ৰিক আন্দোলন গঢ়ি তুলিব বুলি প্ৰশাসনক সকিয়াই দিয়ে সভাপতিগৰাকীয়ে। ইপিনে আজি বিয়লি  চিদলী বিধানসভা সমষ্টিৰ বিধায়ক জয়ন্ত বসুমতাৰী, বড়োলেণ্ড সাংবাদিক সন্থাৰ সাধাৰণ সম্পাদক হান্তিগিৰি নাৰ্জাৰী আৰু কাৰ্যালয় সম্পাদক ৰবিৰাম বৰগয়াৰীয়ে বঙাইগাঁৱৰ এখন ব্যক্তিগত চিকিৎসালয়ত  চিকিৎসাধীন হৈ থকা আঘাতপ্ৰাপ্ত সাংবাদিক  জয়ন্ত দেৱনাথৰ স্বাস্থ্যৰ বুজ লয়। সেইদৰে অসম প্ৰদেশ কংগ্ৰেছ কমিটিৰ প্ৰশাসনিক সাধাৰণ সম্পাদক তথা মুখপাত্ৰ অপূৰ্ব কুমাৰ ভট্টাচাৰ্য আৰু মুখপাত্ৰ ৰাকেশ চক্ৰৱৰ্তী,  জিলা কংগ্ৰেছৰ সভাপতি মৃণাল অধিকাৰী, প্ৰদেশ কংগ্ৰেছৰ সম্পাদক জ্যোতিৰ্ময় বৈশ্যকে ধৰি কেইবাগৰাকীও নেতাইও চিকিৎসাধীন হৈ থকা আহত সাংবাদিকগৰাকীৰ স্বাস্থ্যৰ বুজ লয় ৷ অৱশ্যে সাংবাদিকগৰাকীৰ স্বাস্থ্যৰ সামান্য উন্নতি হোৱাত আজি সন্ধিয়া চিকিৎসালয়ৰ পৰা যাবলৈ দিয়া হয় ৷🔯