🔯কোচ ৰাজবংশী জনগোষ্ঠীৰ জনজাতিকৰণৰ ক্ষেত্ৰত চৰকাৰৰ হোঁহকা পিছলা নীতিত ক্ষুদ্ধ আক্ৰাছু🔯

🔯কোচ ৰাজবংশী জনগোষ্ঠীৰ জনজাতিকৰণৰ ক্ষেত্ৰত চৰকাৰৰ হোঁহকা পিছলা নীতিত ক্ষুদ্ধ আক্ৰাছু🔯

🔯কোচ ৰাজবংশী ছাত্ৰ সন্থাই জংগী আন্দোলন গঢ়ি তুলিলে  অসম আৰু পশ্চিম বংগ জ্বলিব🔯

📝বঙাইগাঁওঃ ৫ মাৰ্চঃ প্ৰধানমন্ত্ৰী আৰু মুখ্যমন্ত্ৰীৰ যদি সঁচাকৈ জনগোষ্ঠীৰ জনজাতিকৰণৰ সমস্যা আৰু পৃথক কমতাপুৰ ৰাজ্য গঠনৰ সমস্যা সমাধান কৰাৰ সদ্দিচ্ছা আছে অতিশীঘ্ৰে সমাধান কৰিব লাগে ৷ আভুৱাভাৰা মন্তব্য শুনিবলৈ আৰু মন নাই ৷ এই মন্তব্য কৰিছে সদৌ কোচ ৰাজবংশী ছাত্ৰ সন্থাৰ নেতৃত্বই ৷ শনিবাৰে সংগঠনটোৰ বঙাইগাঁও চহৰৰ বৰপাৰাস্থিত মুখ্য কাৰ্যালয়ত আয়োজিত এখন সংবাদ মেলত কোচ ৰাজবংশী জনগোষ্ঠীৰ জনজাতিকৰণ আৰু পৃথক কমতাপুৰ ৰাজ্য পুনৰ গঠনৰ ক্ষেত্ৰত কেন্দ্ৰীয় আৰু ৰাজ্য চৰকাৰৰ ভূমিকাত ক্ষোভ উজাৰি আক্ৰাছুৰ সভাপতি ক্ষীতিশ বৰ্মন আৰু যুটীয়া সাধাৰণ সম্পাদক কপিলদেৱ সিংহই এই মন্তব্য কৰে ৷ সংগঠনটোৰ সভাপতি আৰু যুটীয়া সাধাৰণ সম্পাদকগৰাকীয়ে ক্ষোভ প্ৰকাশ কৰি কয় যে চৰকাৰে যদিহে জনগোষ্ঠীটোৰ সমস্যা সমাধানৰ বাবে অতিশীঘ্ৰে কোনো পদক্ষেপ গ্ৰহণ নকৰে, তেতিয়াহলে কোচ ৰাজবংশী ছাত্ৰ সন্থা আৰু জনগোষ্ঠীটোৰ ৰাইজ কেতিয়াও হাত সাৱতি বহি নাথাকো ৷  সংবাদ মেলত নেতাদ্বয়ে জনজাতিকৰণ সন্দৰ্ভত অসম চৰকাৰৰ হোঁহকা পিছলা নীতিক তীব্ৰ সমালোচনা কৰি এলানি আন্দোলনৰ কাৰ্যসূচীও ঘোষণা কৰে ৷ উল্লেখ্য যে শুকুৰবাৰে আক্ৰাছুৰ এখন কাৰ্যনিৰ্বাহক সভা অনুষ্ঠিত হৈছিল আৰু সেই সভাত সংগঠনটোৱে সাংগঠনিক দিশৰ লগতে জনজাতিকৰণ সন্দৰ্ভত চৰকাৰৰ শেহতীয়া ভূমিকাক সমালোচনা কৰি এলানি আন্দোলনৰ কাৰ্যসূচী গ্ৰহণ কৰে ৷ সেই অনুসৰি অসম চৰকাৰৰ বাজেট অধিৱেশনৰ প্ৰথম দিনটোতে দিছপুৰ লাষ্ট গেটতত তিনি ঘণ্টীয়া অনশন কাৰ্যসূচী ৰূপায়ণ কৰাৰ লগতে তাৰ পৰৱৰ্তী সপ্তাহত প্ৰতিখন জিলাত প্ৰতিবাদী পদযাত্ৰা কৰি জিলা উপায়ুক্তৰ জৰিয়তে দেশৰ প্ৰধানমন্ত্ৰী আৰু মুখ্যমন্ত্ৰীক স্মাৰক পত্ৰ প্ৰদান কৰিব ৷ সেইদৰে সংসদৰ গ্ৰীষ্মকালিন অধিৱেশনৰ সময়ত দিল্লীৰ মন্তৰ - মন্তৰত অনশন কাৰ্যসূচী গ্ৰহণ কৰিব বুলিও কয় ৷ ইয়াৰ পিচতো যদি চৰকাৰে আমাৰ দাবী মানি নলয়, তেতিয়াহলে আমি কোচ ৰাজবংশী ছাত্ৰ সন্থাই কিন্তু জংগী আন্দোলন গঢ়ি তুলিম ৷ এই জংগী আন্দোলনত কিন্তু অসম আৰু পশ্চিম বংগ জ্বলিব পাৰে ৷ তাৰ বাবে কিন্তু প্ৰধানমন্ত্ৰী আৰু মুখ্যমন্ত্ৰী দায়ী হ'ব ৷

ঐতিহাসিক কমতাপুৰ ৰাজ্যৰ ভূমি অসম, মেঘালয়, পশ্চিমবংগ আৰু বাংলাদেশলৈকে আছিল ৷ আমি পৃথক কমতাপুৰ ৰাজ্য পুনৰ গঠনৰ বাবে আন্দোলন কৰি আছো আৰু পশ্চিম বংগলৈকে ইয়াৰ পৰিসীমা যিহেতু পৰে ,সেয়ে কমতাপুৰৰ আন্দোলনটো পশ্চিম বংগলৈকে আছে ৷ যাৰ বাবে আমি জংগী আন্দোলন গঢ়ি তুলিলে অসম জ্বলিব আৰু পশ্চিম বংগও জ্বলিব বুলি কয় ৷ কাৰণ কোচ ৰাজবংশী জাতিটোকলৈ বাৰে বাৰে প্ৰতিটো ৰাজনৈতিক দলে খেলা খেলি আছে ৷ এইবাৰ আমি সকিয়াই দিছো যে জাতিটোকলৈ আৰু বাৰে বাৰে খেলা কৰি নাথাকিব ৷ কোচ ৰাজবংশীসকল মহাবীৰ চিলাৰায় আৰু ৰজা নৰনাৰায়ণৰ বংশধৰ ৷ সেয়ে যেতিয়া আমি চৰকাৰৰ বিৰুদ্ধে গুজৰি গুমৰি উঠিম তেতিয়া কিন্তু চৰকাৰে প্ৰতিশ্ৰুতি ৰক্ষা কৰিবলৈ বাধ্য হ'ব  ৷ সংবাদ মেলত আক্ৰাছুৰ নেতাদ্বয়ে লগতে কয় যে বিজেপি নেতৃত্বাধীন অসম চৰকাৰৰ এবছৰ পূৰ্ণ হ'বলৈ মাজত মাথো এটা মাহ বাকী  আছে ৷ অসমৰ মুখ্যমন্ত্ৰীৰ আসন অলংকৃত কৰা ডঃ হিমন্ত বিশ্ব শৰ্মাৰ নেতৃত্বতে অসমৰ কোচ ৰাজবংশীকে ধৰি ছয় জনগোষ্ঠীৰ জনজাতিকৰণৰ বাবে মন্ত্ৰীগোট গঠন কৰা হৈছিল ৷ কিন্তু আজি সেই একেগৰাকী ব্যক্তি মুখ্যমন্ত্ৰী হোৱা প্ৰায় এবছৰ পূৰ্ণ হোৱাৰ দিশে গতি কৰিছে যদিও কোচ ৰাজবংশী জনগোষ্ঠীৰ জনজাতিকৰণৰ সমস্যাটো সমাধানৰ বাবে অলপো আগবঢ়া নাই বুুলি প্ৰতিক্ৰিয়া প্ৰকাশ কৰে সদৌ কোচ ৰাজবংশী ছাত্ৰ সন্থাই ৷ সংগঠনটোৱে কেইবাবাৰো অসমৰ মুখ্যমন্ত্ৰীক সাক্ষাৎ কৰি জনগোষ্ঠীটোৰ মূল দাবী  জনজাতিকৰণ আৰু পৃথক কমতাপুৰ ৰাজ্য পুনৰ গঠনৰ দাবী জনাই অহাৰ পিছত মুখ্যমন্ত্ৰীগৰাকীয়ে পদক্ষেপ ল'ব বুলি কৈছিল যদিও কাৰ্যত সেয়া হৈ উঠা নাই বুলিও ক্ষোভ প্ৰকাশ কৰে ৷ অসম চৰকাৰৰ যদি সঁচাকৈ সদ্দিচ্ছা আছে তেন্তে এইক্ষেত্ৰত বাস্তৱ সন্মত ব্যৱস্থা গ্ৰহণ কৰিবলৈ দাবী জনায় ৷ আভুৱাভাৰা মন্তব্য শুনিবলৈ মন নাই বুলি দোহাৰি সংগঠনটোৱে জনজাতিকৰণ আৰু পৃথক কমতাপুৰ ৰাজ্যৰ দাবীৰ বাবে তীব্ৰ আন্দোলনৰ কাৰ্যসূচী ল'বলৈ বাধ্য হ'ব বুলি সকিয়াই দিয়ে ৷ সংবাদ মেলত বহাগ মাহত সংগঠনটোৱে বঙাইগাঁৱত কেন্দ্ৰীয়ভাৱে বিষুৱা উৎসৱ অনুষ্ঠিত কৰিব বুলিও কয় ৷ সংবাদ মেলত আক্ৰাছুৰ উপদেষ্টা শিৱানন বৰ্মনকে ধৰি কেইবাগৰাকীও নেতা উপস্থিত আছিল ৷🔯