🔯আৰ্ন্তজাতিক নাৰী দিৱসৰ দিনা চিৰাং জিলা প্ৰশাসনৰ দ্বাৰা আত্ম-সহায়ক গোট সমূহক এৰি সূতা কটা প্ৰশিক্ষণ, এৰি সূতা কটা যন্ত্ৰ প্ৰদান

🔯আৰ্ন্তজাতিক নাৰী দিৱসৰ দিনা চিৰাং জিলা প্ৰশাসনৰ দ্বাৰা  আত্ম-সহায়ক গোট সমূহক এৰি সূতা কটা প্ৰশিক্ষণ, এৰি সূতা কটা যন্ত্ৰ প্ৰদান 

📝কাজলগাঁও, মার্চ ৮: আৰ্ন্তজাতিক নাৰী দিৱসৰ লগত সংগতি ৰাখি আজি নাৰী সবলীকৰণৰ উদ্দেশ্য  চিৰাং জিলা প্ৰশাসনৰ উদ্যোগত আৰু জিলা ৰেচম বিভাগৰ সহযোগত ভাৰতীয় ষ্টেট বেংকৰ কাজলগাঁওস্থিত গ্ৰামীণ স্বনিয়োজন প্ৰশিক্ষণ প্ৰতিষ্ঠানৰ সভাকক্ষত মহিলা আত্ম-সহায়ক গোট সমূহক এৰি সূতা কটা প্ৰশিক্ষণ আৰু এৰি সূতা কটা যন্ত্ৰ প্ৰদানৰ বাবে এখন সভা অনুষ্ঠিত হয় । সভাত সভাপতিত্বত কৰে চিৰাং জিলাৰ উপায়ুক্ত নৰেন্দ্ৰ কুমাৰ শ্বাহে । তেওঁ নিজৰ ভাষণত কয় নাৰী দিৱসৰ লগত সংগতি ৰাখি চিৰাং জিলাত এৰি পালনৰ যোগেদি নাৰীক সবলীকৰণ কৰাৰ উদ্দেশ্য এই প্ৰচেষ্টা গ্ৰহণ কৰা হৈছে। চিৰাঙত বিষেশকৈ এৰি সূতাৰ উৎপাদন সৰ্বাধিক হয়। ইয়াৰ উৎপাদন বঢ়াৰ বাবে আত্ম-সহায়ক গোট সমূহলৈ এই যন্ত্ৰসমূহ প্ৰদান কৰা হয়। যাৰ ফলস্বৰূপে আত্ম-সহায়ক গোট সমূহ পূৰ্বতকৈ অধিক আৰ্থিকভাৱে লাভান্বিত হব। তেওঁ লগতে কয় যে পৰিয়ালত মহিলাই যদি উপাৰ্জনৰ কেন্দ্ৰ বিন্দু হয় তেন্তে পৰিয়ালটো সুচাৰুৰূপে উন্নতিৰ দিশত আগবাঢ়ি যাব পাৰে। সভাত এৰি সূতাৰ বাণিজ্যিক দিশতোৰ বিষয়ে বিশদভাৱে আলোচনা কৰে চিৰাং জিলাৰ উদ্যোগ আৰু বাণিজ্যিক কেন্দ্ৰৰ সহকাৰী সঞ্চালক গোপীনাথ বসুমতাৰীয়ে। 

আজিৰ সভাত ৬ টা মহিলা আত্ম-সহায়ক গোটৰ প্ৰতিটো গোটক ৫ টাকৈ মুঠ ৩০ টা সূতা কটা যন্ত্ৰৰ লগতে আত্ম-সহায়ক গোটৰ সদস্য সকলক এদিনীয়া সূতা কটা প্ৰশিক্ষণ প্ৰদান কৰা হয়। তেনেদৰে অহা ২১ মাৰ্চৰ পৰা এই আত্ম-সহায়ক গোটৰ সদস্য সকলক কাজলগাঁওস্থিত গ্ৰামীণ স্বনিয়োজন প্ৰশিক্ষণ প্ৰতিষ্ঠানত ১০ দিনৰ বাবে প্ৰশিক্ষণ প্ৰদান কৰা হব ৷ সভাত উপস্থিত থাকে বিজনী মহকুমাৰ মহকুমাধিপতি ৰাহুল গুপ্তা, সহকাৰী আয়ুক্ত কুশল কলিতা, চিৰাং জিলাৰ ৰেচম বিভাগৰ সহকাৰী সঞ্চালক হেমন্ত বৰ্মন, কাজলগাঁওস্থিত গ্ৰামীণ স্বনিয়োজন প্ৰশিক্ষণ প্ৰতিষ্ঠানৰ সঞ্চালক নকুল চন্দ্ৰ ব্ৰহ্ম, বিজনী ৰেচম বিভাগৰ অধীক্ষক ৰঞ্জিত গগৈ আৰু প্ৰশিক্ষকসকল।🔯