🔯শ্ৰমজীৱী মহিলা আৰু গণতান্ত্ৰিক মহিলা সমিতিৰ উদ্যোগত আন্তৰ্জাতিক নাৰী দিৱস উপলক্ষে বঙাইগাঁৱত শোভাযাত্ৰা🔯

🔯শ্ৰমজীৱী মহিলা আৰু গণতান্ত্ৰিক মহিলা সমিতিৰ উদ্যোগত আন্তৰ্জাতিক নাৰী দিৱস উপলক্ষে বঙাইগাঁৱত শোভাযাত্ৰা🔯 

📝বঙাইগাঁওঃ ৮ মাৰ্চঃ শ্ৰমজীৱি মহিলা সকলৰ সমন্বয়ৰক্ষী সমিতি ( চি আই টি ইউ ) আৰু নিখিল ভাৰত গণতান্ত্ৰিক মহিলা সমিতিৰ যৌথ উদ্যোগত মঙলবাৰে বঙাইগাঁও চহৰত আন্তৰ্জাতিক নাৰী দিৱস পালন কৰা হয় । নাৰী দিৱসৰ লগত সংগতি ৰাখি এক সমদলো উলিয়ায় ৷ উল্লেখ্য যে নিৰ্বাচনী বিধি নিষেধ দেখুৱাই অনৈতিক ভাৱে জিলা প্ৰশাসন আৰু আৰক্ষী বিভাগে মহিলাসকলক সমদল কৰাৰ অনুমতি নিদিলে যদিও মহিলা শ্ৰমিক সকলে প্ৰশাসনৰ বাধা অমান্য কৰি গান্ধী ময়দানৰ পৰা পাগলাস্থান তেল ডিপোলৈ সমদল কৰি ৰে’লৱে ৱৰ্কশ্বপৰ সন্মুখত মুকলি সভাত অংশ গ্ৰহণ কৰে । সভাত চি আই টি ইউ আৰু গণতান্ত্ৰিক মহিলা সমিতিৰ জিলা নেতৃবৃন্দই আন্তৰ্জাতিক নাৰী দিৱসৰ তাৎপৰ্য ব্যাখ্যা কৰে । সমান কামৰ বাবে সমান মজুৰি , কৰ্মস্থলত নাৰী শ্ৰমিক সকলৰ নিৰাপত্তা, নাৰী নিৰ্যাতন বন্ধ কৰা আদিৰ দাবীত সংগঠন দুটাৰ নেতৃত্ব সৰব হৈ পৰে। 

ইপিনে সংগঠনৰ তৰফৰ পৰা জিলা উপায়ুক্তক এখন স্মাৰক পত্ৰ প্ৰদান কৰিব বিচাৰিছিল যদিও উপায়ুক্তগৰাকী নিজে আহিব নোৱাৰা বাবে আন এজন বিষয়া উপস্থিত হৈ স্মাৰকপত্ৰ গ্ৰহণ কৰাৰ কথা আছিল ৷ কিন্তু বিষয়াগৰাকী দীৰ্ঘ সময় পিছতো আহি উপস্থিত নোহোৱাৰ প্ৰতিবাদত সংগঠনসমূহে পিচত স্মাৰকপত্ৰ প্ৰদান নকৰিলে । অনুষ্ঠানত চিটুৰ বঙাইগাঁও জিলা সমিতিৰ সভাপতি হৰেশ্বৰ দাস, নিখিল ভাৰত গণতান্ত্ৰিক মহিলা সমিতিৰ বিজয়া ৰায়, বঙাইগাঁও জিলা অংগনাৱাদী কৰ্মী আৰু সহায়িকা সন্থাৰ সম্পাদিকা জমিলা খাতুন, চিটুৰ বঙাইগাঁও জিলাৰ শ্ৰমিক নেতা সঞ্জীৱ দেৱ আদিয়ে উপস্থিত থাকে৷🔯