🔯আঞ্চলিকতাবাদক শক্তিশালী কৰাতো সময়ৰ আহ্বান আৰু এয়া বাস্তৱ সত্য - ফণীভূষণ চৌধুৰী🔯

🔯আঞ্চলিকতাবাদক শক্তিশালী কৰাতো সময়ৰ আহ্বান আৰু এয়া বাস্তৱ সত্য - ফণীভূষণ চৌধুৰী🔯

📝বঙাইগাঁওঃ ৩ মাৰ্চঃ আঞ্চলিকতাবাদক শক্তিশালী কৰাতো সময়ৰ আহ্বান আৰু এয়া বাস্তৱ সত্য ৷ গতিকে এই সময়ৰ আহ্বানক নিশ্চিতভাৱে ৰাইজে সমৰ্থন আগবঢ়াব আৰু আগবঢ়াইছে ৷ এই মন্তব্য জ্যেষ্ঠ অগপ নেতা তথা বঙাইগাঁৱৰ বিধায়ক ফণীভূষণ চৌধুৰীৰ ৷ উল্লেখ্য যে অগপ বিধায়কগৰাকীয়ে শেহতীয়াভাৱে আঞ্চলিকতাবাদৰ পুনৰ উত্থান হ'ব বুলি মন্তব্য কৰাৰ লগতে ইয়াৰ বাবে ৰণকৌশল প্ৰস্তুত কৰা বুলি কৰা মন্তব্যৰ পিচতে এতিয়া ৰাজ্যৰ ৰাজনীতিত বিষয়টোকলৈ চলিছে ব্যাপক চৰ্চা ৷ আনহাতে এই মন্তব্য কৰাৰ পিচতে বিজেপি দলৰ কেইবাগৰাকীও নেতাই বিধায়কগৰাকীক সমালোচনা কৰা পৰিলক্ষিত হৈছে ৷ সেইদৰে,আকৌ বিভিন্ন নেতাই বিধায়কগৰাকীক সমৰ্থনো কৰিছে ৷ ইয়াৰ মাজতে বৃহস্পতিবাৰে অগপ বিধায়কগৰাকীৰ মন্তব্যৰ সপক্ষে বহু নেতা থিয় হোৱা বুলি সাংবাদিকে প্ৰশ্ন কৰাত তেওঁ উপৰোক্ত মন্তব্য কৰে ৷ বিধায়ক চৌধুৰীয়ে লগতে কয় যে এই কথাখিনি কোৱাৰ পিচতে বহুতে মোৰ লগত টেলিফোনিক যোগাযোগ কৰিছে আৰু সকলোৱে এই কথাটোত সমৰ্থন আগবঢ়াইছে ৷ লগতে কৈছে যে অগপই ইয়াৰ নেতৃত্ব ল'ব লাগে আৰু অগপই নেতৃত্ব লৈ আঞ্চলিকতাবাদক কেনেদৰে শক্তিশালী কৰিব পাৰি তাৰ এটা পৰিকল্পনা কৰিব লাগে বুলি বহুতে পৰামৰ্শ আগবঢ়াইছে ৷ মই ভাৱো যে এই পৌৰসভা নিৰ্বাচনটো হৈ যোৱাৰ পিচত আমি নিশ্চিতভাৱে আঞ্চলিকতাবাদক শক্তিশালী কৰাৰ পক্ষত পৰিকল্পনা কৰিম ৷ বিধায়কগৰাকীয়ে কয় যে ইউডিএফক একত্ৰিত কৰাৰ কথা  কোনো কথা নাই ৷ ইউডিএফক আমি কেতিয়াও সমৰ্থন নকৰো আৰু ইউডিএফক একত্ৰিত কৰাৰ বাবে আমি কেতিয়াও ভৱাও নাই ৷ আমাৰ কথাটো হ'ল যে আমাৰ পৰা ওলাই গৈ বা যিসকলে নতুনকৈ ৰাজনৈতিক দল গঠন কৰিছে আৰু যিসকল অসম আন্দোলনৰ লগত জড়িত আছিল, যিসকলে অলম আন্দোলনত অংশগ্ৰহণ কৰিছিল সেইসকল ব্যক্তি এতিয়া বহুধা বিভক্ত হৈছে ৷ গতিকে সেই বহুধা বিভক্ত মানুহখিনিক আমি একত্ৰিত কৰিহে আঞ্চলিকতাবাদক শক্তিশালী কৰাতোহে আমাৰ লক্ষ্য আৰু উদ্দেশ্য ৷ আনহাতে দলৰ নেতৃত্বই এইক্ষেত্ৰত কোনো আহ্বান নজনোৱা সন্দৰ্ভত বিধায়কগৰাকীয়ে কয় যে তেওঁলোকেও উপলব্ধি কৰিছে ৷ কিন্তু যেতিয়া বিষয়টো দলৰ মজিয়াত আলোচনা হ'ব নিশ্চিতভাৱে তেনেদৰে আগবাঢ়ি যাম আৰু আহ্বান জনাব ৷ এতিয়া মোৰ মনলৈ কথাটো আহিছে বাবে মই কৈছো ৷ এইটো আমাৰ দলৰ সিদ্ধান্ত নহয় ৷ দলৰ মজিয়াত এই বিষয়টো আলোচনা হ'ব ৷ আলোচনা হোৱাৰ পিচত নিশ্চয় আঞ্চলিকতাবাদক কেনেদৰে শক্তিশালী কৰিব লাগিব তাৰ পৰিকল্পনা কৰিব লাগিব ৷ আমি আমাৰ দলটোক শক্তিশালী কৰাৰ বাবে বিভিন্ন পদক্ষেপ গ্ৰহণ কৰিছো ৷ ইতিমধ্যে আমি দলটোক শক্তিশালী কৰাৰ বাবে কিছুদিনপূৰ্বে এক সদস্যভৰ্তি অভিযান আৰম্ভ কৰিছো ৷ এই সদস্যভৰ্তি অভিযান এইকাৰণে লোৱা হৈছে যাতে দলটোক শক্তিশালী কৰিব পৰা যায় আৰু দলটোৰ পতাকাৰ তলত ৰাইজ একত্ৰিত হয় সেই উদ্দেশ্য আগত ৰাখিয়ে আগবঢ়া হৈছে ৷ ইয়াৰ বাবে দলৰ মজিয়াত সিদ্ধান্তগ্ৰহণ কৰি বিভিন্ন জিলা সমিতি বা বিধান পৰিষদসমূহক নিৰ্দেশনা দিয়া হৈছে বুলিও কয় ৷🔯