🔯বঙাইগাঁৱত মুখ্যমন্ত্ৰীৰ ৰাজনৈতিক সচিব তথা বিধায়ক জয়ন্তমল্ল বৰুৱাৰ অগপ বিধায়ক ফণীভূষণ চৌধুৰীক উদ্দেশ্যি মন্তব্য🔯

🔯বঙাইগাঁৱত মুখ্যমন্ত্ৰীৰ ৰাজনৈতিক সচিব তথা বিধায়ক জয়ন্তমল্ল বৰুৱাৰ অগপ বিধায়ক ফণীভূষণ চৌধুৰীক উদ্দেশ্যি মন্তব্য🔯 

🔯ভাল ফল প্ৰদৰ্শন কৰি থাকোতেই  ৰাজনীতিৰ পৰা বিদায় ল'ব লাগে🔯

🔯পৌৰসভা নিৰ্বাচনত বিজেপিয়ে ২৪ টা ৱাৰ্ডতে জয়ী হ'ব🔯

🔯ক'ত আঞ্চলিকতাবাদ বিচাৰি পাইছে মই নাজানো🔯 

📝বঙাইগাঁওঃ ৩ মাৰ্চঃ বঙাইগাঁও বিধান সভা সমষ্টিৰ অগপ বিধায়ক ফণীভূষণ চৌধুৰীয়ে ভাল ফল প্ৰদৰ্শন কৰি থাকোতেই  ৰাজনীতিৰ পৰা বিদায় ল'ব লাগে বুুলি মন্তব্য কৰিছে বিজেপি নেতা আৰু মুখ্যমন্ত্ৰীৰ ৰাজনৈতিক সচিব তথা বিধায়ক জয়ন্তমল্ল বৰুৱাই ৷ বুধবাৰে বঙাইগাঁও পৌৰসভা নিৰ্বাচনৰ বিজেপি দলৰ প্ৰাৰ্থীৰ হৈ নিৰ্বাচনী প্ৰচাৰ সভাত অংশগ্ৰহণ কৰি সংবাদ মাধ্যমৰ আগত বিধায়ক জয়ন্তমল্ল বৰুৱাই এই মন্তব্য কৰে ৷ মুখ্যমন্ত্ৰীৰ ৰাজনৈতিক সচিব বৰুৱাই সংবাদ মাধ্যমৰ আগত কয় যে অকল ৰাজনীতি বুলিয়ে নহয়, যি কোনো ক্ষেত্ৰতে যেতিয়াই আপুনি খুব ভাল ফল প্ৰদৰ্শন কৰি থাকে তেতিয়াই বিদায় ললে ৰাইজে সদায় মনত ৰাখে ৷ গতিকে যেতিয়া আপুনি জানিব যে আজিৰ প্ৰেক্ষাপটত আপোনাৰ ক্ষমতা বা সেইধৰণে কাম কৰাৰ পৰিৱেশ নাই, তেতিয়া ভাৱিব লাগে যে নিজৰ পিচৰ প্ৰজন্মলৈ এৰি দিব লাগে ৷ এয়া ৰাজনীতি বুলিয়ে নহয়, খেল আৰু অন্যান্য ক্ষেত্ৰটো দেখিব যে প্ৰদৰ্শন যেতিয়া বেয়া হ'ব, আপোনাতকৈ ভাল প্ৰদৰ্শন কৰিব পৰা মানুহ আহিব আৰু তেতিয়া সেই পিচৰ প্ৰজন্মটোৰ কাৰণে এৰি দিব লাগে ৷ কথা হ'ল যে আজিৰ তাৰিখত ভাৰতীয় জনতা পাৰ্টিয়ে বঙাইগাঁও পৌৰসভাখনত ভাল প্ৰদৰ্শন কৰিব পাৰিব ৷ গতিকে ভাল প্ৰদৰ্শন কৰিব পৰা লোকসকলক এৰি দিব লাগে ৷ এইটো স্পষ্ট কথা আৰু সকলোৱে জানে যে বঙাইগাঁৱৰ উন্নয়ন হ'ব লাগিলে ভাৰতীয় জনতা পাৰ্টিৰ নেতৃত্বৰ পৌৰসভাখনে যিমানখিনি কৰিব পাৰিব অইন দলে কৰিব নোৱাৰিব ৷ সেই কাৰণে মই ইয়াৰ নেতৃত্ব বা আগতে যিসকলে নেতৃত্ব লৈ আছিল তেওঁলোকক অনুৰোধ কৰিছো যে যিয়ে ভাল প্ৰদৰ্শন কৰিব তেওঁলোকক দায়িত্বভাৰ এৰি দিয়ক ৷ তেতিয়া বঙাইগাঁওবাসীৰ কাৰণে ভাল আৰু বঙাইগাঁৱৰ সামগ্ৰীক উন্নয়ন হ'ব ৷ বিজেপি বিধায়কগৰাকীয়ে কয় যে অগপ দলটোৰ লগত আমাৰ আদৰ্শগত মিত্ৰতা আছে বা অগপৰ জাতীয়তাবাদ আমাৰ ৰাষ্ট্ৰীয়তাবাদৰ এটা অংশ হিচাপে আমি লও ৷ ঠিক তেনেদৰে অগপ দলৰ লগতো আমাৰ মিত্ৰতা আছে, ইউ পি পি এলৰ লগতো আছে আৰু গণ শক্তি, ৰাভা, তিৱা, কাৰ্বি সকলোৰে লগতে আমাৰ মিত্ৰতা আছে ৷ আনকি আমি ইউ পি পি এলৰ লগত মিত্ৰতা থকাৰ পাছতো বি পি এফৰ লগতো বিধানসভাত বুজাবুজি কৰিছো ৷ আঞ্চলিক চিন্তা চৰ্চাৰ যিটো জাতীয়তাবাদ সেই জাতীয়তাবাদক আমি শ্ৰদ্ধা কৰো ৷ সাংবাদিকে  বঙাইগাঁৱত মিত্ৰতাত ক'ত সমস্যা থাকিল বুলি সোধাত বিধায়কগৰাকীয়ে কয় যে বঙাইগাঁৱত মিত্ৰতাৰ ক্ষেত্ৰত সমস্যা  এইটোৱে থাকিল যে বিজেপিৰ উত্থান বা বিজেপিৰ প্ৰতি ৰাইজৰ সমৰ্থনৰ কথাটো অগপৰ ইয়াৰ স্থানীয় নেতাসকলে হয়তো বুজি নাপালে ৷ তেওঁলোকে ভাৱি ললে যে তেওঁলোকৰ সেই আগৰ যিটো জনসমৰ্থন সেইটো আজিও আছে ৷ সময়ৰ লগে লগে কেতিয়াবা কেতিয়াবা কোনো ৰাজনৈতিক দলৰ উত্থান হয় ৷ আজি বঙাইগাঁৱত হয় বিধায়কগৰাকী আমাৰ মিত্ৰ দলৰে ৷ কিন্তু ইয়াত তৃণমূল পৰ্যায়ৰ ৰাইজ যে বিজেপিৰ লগত আছে আৰু বিজেপিৰ যে সাংগঠনিক শক্তি বৃদ্ধি হৈছে, সেই কথাখিনি হয়তো অগপৰ স্থানীয় নেতাসকলে মানি ল'ব নিবিচাৰে ৷ তাৰ কাৰণেই হয়তো আসান বুজাবুজিকলৈ মনোমালিন্য হ'ল, মিত্ৰতা নহ'ল ৷ ইপিনে বিধায়ক ফণীভুষণ চৌধুৰীয়ে আঞ্চলিকতাবাদৰ উত্থান হ'ব বুলি কৰা মন্তব্য সন্দৰ্ভত বিধায়ক জয়ন্তমল্ল বৰুৱাই কয় যে তেওঁ বা ক'ত আঞ্চলিকতাবাদ বিচাৰি পাইছে মই নাজানো ৷ আজিৰ তাৰিখত যিসকলে আঞ্চলিক চিন্তা -চৰ্চা কৰে সকলোৱেটো ভাৰতীয় জনতা পাৰ্টিৰ লগত ৷ কাৰ্বি, মিছিং, তিৱা, বড়ো, ৰাভাকে ধৰি যিমান আঞ্চলিক শক্তি বা আঞ্চলিক চিন্তা - চৰ্চা কৰা ৰাজনৈতিক শক্তি আছে সকলোৱেটো ভাৰতীয় জনতা - পাৰ্টিৰ লগত একেলগে কাম কৰিছে ৷ লগতে ভাৰতীয় জনতা পাৰ্টিয়ে একমাত্ৰ দল যিয়ে এনেকুৱা ধৰণৰ বিভিন্ন আঞ্চলিক দলক একেলগ কৰি সমাধ অধিকাৰ দি আগবাঢ়াই লৈ যায় বুলিও মন্তব্য কৰে ৷ 

আনহাতে পৌৰসভা নিৰ্বাচনৰ পিচত অগপ - বিজেপিৰ মিত্ৰতাৰ সম্পৰ্কত কিবা প্ৰভাৱ পৰিব নেকি বুলি সাংবাদিকে সোধাত ৰাজনৈতিক সচিবগৰাকীয়ে কয় যে ৰাজ্য চৰকাৰত আজিও অগপ দল আমাৰ লগত আছে আৰু ৰাজ্যৰ উন্নয়নৰ কাৰণে আমি একেলগে কাম কৰিম ৷ যদি চাবলৈ যায় তেতিয়াহলে দেখিব যে ৰাজ্যৰ ৮০ খন পৌৰসভাৰ ভিতৰত বহু পৌৰসভাত আমাৰ দুই দলৰ মাজত মিত্ৰতা হৈছে আৰু সেই মিত্ৰতাৰে আমি কাম কৰিছো ৷ ক'ৰবাত ক'ৰবাত বিভিন্ন স্থানীয় কাৰণত মিত্ৰতা হোৱা নাই আৰু আমি এই মিত্ৰতাৰ দায়িত্বটো স্থানীয় জিলা সমিতিলৈ এৰি দিছিলো ৷ জিলা সমিতিসমূহে য'ত মিত্ৰতা কৰিব পাৰিছে কৰিছে আৰু য'ত কৰিব পৰা নাই কৰা নাই ৷ গতিকে এই মিত্ৰতা হোৱা - নোহোৱাকলৈ আমাৰ ৰাজ্যৰ ৰাজনীতিত বা মিত্ৰতাৰ সম্পৰ্কত কোনো ক্ষতি নহয়  আৰু ক্ষতি হ'বলগীয়াও নাই ৷ কিন্তু য'ত আমাৰ পৌৰসভাত স্থানীয়ভাৱে বিজেপিয়ে অলশৰীয়াকৈ নিৰ্বাচন খেলিব বিচাৰিছে তাত আমি খেলিব দিছো ৷ আমাৰ বিজেপিৰ কথা হ'ল আজিৰ তাৰিখত আমি ২৪ টা ৱাৰ্ডত নিৰ্বাচন খেলিছো আৰু মইতো নিশ্চিত যে ২৪ টাৰ আটাইকেইটাতে জয়ী হ'ব লাগে ৷ তথাপিতো একেবাৰে কম হলেও আমি ২০ টাত জয়ী হ'ম ৷ গতিকে পৌৰসভা গঠনৰ বাবে বেলেগৰ লগত মিত্ৰতাৰ কথাই নাহে ৷ মিত্ৰতা কৰিলে মানুহতো থাকিব লাগিব ৷ মিত্ৰতা কৰিবলৈ যদি মানুহেই নাথাকে কেৱল আমিয়ে জয়ী হওক তেতিয়া কাৰ লগত মিত্ৰতা কৰিম? বিধায়কগৰাকীয়ে লগতে কয় যে মোৰ লগত ফণীভূষণ চৌধুৰীয়ে কওক অথবা অতুল বৰা, কেশৱ মহন্তকেই কওক যথেষ্ট ভাল সম্পৰ্ক ৷ আনকি অসমৰ পৌৰসভাৰ নিৰ্বাচনৰ মিত্ৰতা সম্পৰ্কীয় কথাবিলাকো আমিও পাতিছিলো ৷  ইয়াত কোনো অসুবিধা নাই ৷ এই মিত্ৰতা স্থানীয় পৰ্যায়ৰ মিত্ৰতা ৷ মোৰ নলবাৰী সমষ্টিত অগপৰে মিত্ৰতা আছে ৷ একেলগে নিৰ্বাচন খেলিছো ৷ বঙাইগাঁও জিলাত হয়তো মিত্ৰতাটো হোৱা নাই ৷ বঙাইগাঁও জিলাৰ নেতৃত্বৰ মাজত সেই সমন্বয়টো হয়তো হোৱা নাই ৷ মিত্ৰতাকলৈ ৰাজ্যিক ৰাজনীতিত কোনো প্ৰভাৱ নাই  ৷ মিত্ৰতা নোহোৱাকৈ এইবাৰ বঙাইগাঁও পৌৰসভা নিৰ্বাচনত বিজেপিয়ে ২৪ টা ৱাৰ্ডতে জয়ী হ'ব ৷ এইটো এবাৰ প্ৰদৰ্শন কৰি চাওচোন কি হয় ৷ ইপিনে পৌৰসভা নিৰ্বাচন আৰু মাজুলিৰ উপ নিৰ্বাচনৰ ফলাফলৰ পিচত কংগ্ৰেছক অসমৰ ৰাজনীতিত এতিয়া হিচাব কৰিবলগীয়া দল যেন নোহোৱা হ'ব ৷মাজুলিৰ উপ নিৰ্বাচনত বিজেপি প্ৰাৰ্থীগৰাকী ৬০ হেজাৰৰ অধিক ভোটৰ ব্যৱধানত জয়ী হ'ব বুলি দাবী কৰে ৷🔯