🔯চাওতাল জনগোষ্ঠীক চাহ জনজাতিৰ পৰিৱৰ্তে পূৰ্বৰ দৰেই অন্যান্য পিছপৰা শ্ৰেণীৰ নামতেই জাতিগত প্ৰমাণ পত্ৰ প্ৰদানৰ দাবী চাওতাল ছাত্ৰ সন্থাৰ🔯

🔯চাওতাল জনগোষ্ঠীক চাহ জনজাতিৰ পৰিৱৰ্তে পূৰ্বৰ দৰেই অন্যান্য পিছপৰা শ্ৰেণীৰ নামতেই জাতিগত প্ৰমাণ পত্ৰ প্ৰদানৰ দাবী চাওতাল ছাত্ৰ সন্থাৰ🔯

👉মুখ্যমন্ত্ৰীলৈ স্মাৰকপত্ৰ

📝News4Bongaigaon: ২৯ মাৰ্চঃ অসমত বসবাস কৰা আদিবাসী চাওতাল জনগোষ্ঠীৰ লোকক চাহ জনগোষ্ঠীৰ মৰ্যাদাৰে জনজাতিকৰণ কৰিব বিচৰা কাৰ্যৰ বিৰুদ্ধে জাঙুৰ খাই উঠিছে সদৌ চাওতাল ছাত্ৰ সন্থাই । চিৰাং জিলা উপায়ুক্তৰ জৰিয়তে মঙলবাৰে সদৌ চাওতাল ছাত্ৰ সন্থাই মুখ্যমন্ত্ৰী ড° হিমন্ত বিশ্ব শৰ্মালৈ প্ৰেৰণ কৰিছে স্মাৰক পত্ৰ ৷ চাওতাল ছাত্ৰ সন্থাৰ চিৰাং জিলা সমিতিৰ সভাপতি চলেমান মুৰ্মু আৰু সাধাৰণ সম্পাদক বানিফাচ টুডু স্বাক্ষৰিত স্মাৰক পত্ৰত যোৱা ১৫ মাৰ্চত অসম চৰকাৰে গ্ৰহণ কৰা অসমত বসৱাস কৰা আদিৱাসী সকলক চাহ জনজাতিৰ মৰ্যাদাৰে জাতিগত পমাণ পত্ৰ দিয়াৰ অংগীকাৰ বাতিল কৰা, চাওতাল জনগোষ্ঠীক চাহ জনজাতিৰ পৰিৱৰ্তে পূৰ্বৰ দৰেই অন্যান্য পিছপৰা শ্ৰেণীৰ নামতেই জাতিগত প্ৰমাণ পত্ৰ প্ৰদান কৰা, অসম চৰকাৰ আৰু চাওতাল জনগোষ্ঠীয় দল-সংগঠনৰ মাজত এখন দ্বিপাক্ষিক বৈঠক অনুষ্ঠিত কৰি সমাধানৰ পথ প্ৰস্তত কৰাৰ দাবী উত্থাপন কৰা হয় । ইপিনে স্মাৰকপত্ৰ প্ৰদানৰ পিছত ছাত্ৰ সংগঠনৰ নেতৃত্বই সংবাদ মাধ্যমৰ আগত কয় যে  যোৱা ২০২১ বৰ্ষৰ ১৯ ডিচেম্বৰত মুখ্যমন্ত্ৰীৰ সৈতে এক বৈঠকত আছুৰ নেতৃত্ব মিলিত হৈ অসমত বসবাস কৰা চাওঁতাল জনগোষ্ঠীৰ জনজাতিকৰণ, জাতিগত প্ৰমাণ পত্ৰ, মাটিৰ অধিকাৰ আৰু সম-উন্নয়ণৰ বিষয়ত আলোচনা কৰা হৈছিল । উল্লেখ্য, অতীতৰে পৰাই জনগোষ্ঠীটোৱে নিজৰ কলা সংস্কৃতি, স্বাভিমান, আত্ম পৰিচয় আৰু আত্ম সন্মানেৰে জীয়াই আছে । অসম চৰকাৰৰ কেবিনেটৰ ( যোৱা ১৫ মাৰ্চ) সিদ্ধান্তত আমি সন্তষ্ট নহয়৷ কাৰণ চাওঁতাল জনগোষ্ঠী কোনো দিনেই চাহ জনগোষ্ঠী নাছিলো আৰু নহওঁ । জনগোষ্ঠীটোৰ সুকীয়া পৰিচয় থকা সত্বেও জনগোষ্ঠীটোক সময়ে সময়ে বিপথে পৰিচাতি কৰা হৈছে , যিটো জাতিটোৰ বাবে শুভ লক্ষণ নহয় । লক্ষ্যণীয় যে ২০০৩ চনৰ ২২ ডিচেম্বৰত ভাৰতৰ পৱিত্ৰ সংবিধানৰ অষ্টম অনুসুচিত চাওঁতালী ভাষা অন্তৰ্ভুক্ত হোৱাৰ উপৰিও ১৮৮৬ চনৰ অসম ৰাজহ আৰু ভূূমি আইনৰ অধীনত চাওঁতাল জনগোষ্ঠী এক সংৰক্ষিত শ্ৰেণীৰ লোক ৷ ড° বাণীকান্ত কাকতীয়ে লিখা "দ্যা মাদাৰ গডেছ কামাখ্যা' নামৰ গ্ৰহন্থখনতো অসমত চাওতাল সকলৰ অৱদানৰ কথা বিৱৰি লিখা আছে ৷  তথাপিও আজিলৈকে কোনো এখন চৰকাৰে জনগোষ্ঠীটোৰ কলা সংস্কৃতিৰ সংৰক্ষণ আৰু উত্তৰণৰ ক্ষেত্ৰত ব্যৱস্থা গ্ৰহণ নকৰিলে বুলি ছাত্ৰ সংগঠনটোৰ নেতৃত্বই উল্লেখ কৰে । ইপিনে ১৯৯৮ চনৰ পৰাই অসমত ছেবাৰ অধীনত হাইস্কুল শিক্ষান্ত পৰীক্ষাত চাওতালী ছাত্ৰ-ছাত্ৰীয়ে চাওতালী ভাষাৰে পৰীক্ষাত অৱৰ্তীণ হৈ আহিছে । ১৫ মাৰ্চৰ অসম চৰকাৰৰ সিদ্ধান্তত চাওতাল ছাত্ৰ সন্থা আশ্বস্ত হ’ব পৰা নাই । কাৰণ চাওতাল জনগোষ্ঠীয়ে চাহ জনগোষ্ঠী নহয় আৰু এয়া তেওঁলোকে কেতিয়াও মানি নলয় বুলিও উল্লেখ কৰি তেনে কৰিলে কলা সংস্কৃতিৰে ভৰপূৰ চাওতাল জনগোষ্ঠীটোৰ অস্তিত্ব লাঘৱ হ’ব আৰু কলা সংস্কৃতি, আত্ম পৰিচয় আৰু আত্ম সন্মানত আঘাত হানিব বুলি আশংকা কৰা হৈছে । চৰকাৰৰ এই সিদ্ধান্ত অতিশীঘ্ৰে বাতিল হ’ব লাগে আৰু চাওতাল জনগোষ্ঠীৰ কোনো ক্ষতি নোহোৱাকৈ চৰকাৰে চাওতাল জনগোষ্ঠীয় দল-সংগঠনেৰে মিলি আলোচনাৰ মাধ্যমেৰে এক স্থায়ী সমাধানৰ পথ প্ৰশস্ত কৰিব লাগে ।  চাহ জনগোষ্ঠী হিচাপে চাওতাল জনগোষ্ঠীক জাতিগত প্ৰমাণ পত্ৰ প্ৰদান কৰা হলে অনাগত দিনত জনগোষ্ঠীটোৱে নিজৰ অধিকাৰ আৰু প্ৰাপ্যৰ পৰা আজীৱনলৈ বঞ্চিত হ'বলগীয়া হ’ব । আহি থকা দিনবোৰত জনগোষ্ঠীটোৱে তেওঁলোকৰ ভাষা, কলা-সংস্কৃতি, আত্মপৰিচয় আৰু আত্মসন্মানৰ এক গভীৰ সংকটত পৰিব আৰু জাতিটো লাহে লাহে ধ্বংসৰ পিনে গতি কৰিব বুলিও শংকা কৰিছে। সেয়েহে অসমৰ অন্যান্য জনগোষ্ঠীৰ দৰে তেওঁলোকেও সহ-সন্মানেৰে অসম তথা ভাৰতৰ মাতৃভূমিত জীয়াই থাকিব বিচাৰো বুলিও প্ৰকাশ কৰিছে৷🔯