🔯বঙাইগাঁৱত বহিঃৰাজ্যৰ বাহনসহ পাঁচজন যুৱকক আটক🔯

🔯বঙাইগাঁৱত বহিঃৰাজ্যৰ বাহনসহ পাঁচজন যুৱকক আটক🔯 

🔯অপৰাধ সংঘটিক কৰাৰ উদ্দেশ্যেৰে অহাৰ সন্দেহ আৰক্ষীৰ🔯

🔯দা,খুকুৰি,ষ্টিক, এটিএম কাৰ্ড, মোবাইল আদি বিভিন্ন সামগ্ৰী জব্দ🔯

📝বঙাইগাঁওঃ ১২ মাৰ্চঃ বঙাইগাঁও আৰক্ষীয়ে শুকুৰবাৰে নিশা বঙাইগাঁও চহৰত এখন বহিঃৰাজ্যৰ চাৰিচকীয়া বাহনসহ পাঁচজন যুৱকক আটক কৰে ৷ আৰক্ষীয়ে যুৱককেইজনে বঙাইগাঁও চহৰত অপৰাধ সংঘটিত কৰাৰ মানসেৰে অহা বুলি সন্দেহ প্ৰকাশ কৰিছে ৷ এই সন্দৰ্ভত বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া উপেন কলিতাই সংবাদ মাধ্যমক জানিবলৈ দিয়া মতে শুকুৰবাৰে নিশা তেওঁৰ লগতে নগৰ উপ আৰক্ষী বিষয়াসহ আৰক্ষীৰ এটা দলে চহৰখনত তহল দি থকাৰ সময়তে বহিঃৰাজ্য পশ্চিম বংগৰ নম্বৰযুক্ত এখন বাহন প্ৰত্যক্ষ কৰাত তেওঁলোকৰ সন্দেহ ওপজে আৰু বাহনখন ৰখায় ৷ ডব্লিউ বি ২৬ এ ভি ১১৮৬ নম্বৰৰ হুণ্ডাই ক্ৰেটা বাহনখন উত্তৰ প্ৰদেশৰ তিনিজন আৰু পশ্চিম বংগৰ দুজনসহ পাঁচজন বহিঃ ৰাজ্যৰ যুৱক আছিল ৷ আৰক্ষীয়ে পিচত বাহনখনত তালাচী চলোৱাত দা, খুকুৰি, ষ্টিক আদি বিভিন্ন সামগ্ৰী উদ্ধাৰ হোৱাত যুৱককেইজনে বঙাইগাঁৱত কিবা অপৰাধজনিত ঘটনা সংঘটিত কৰাৰ মানসেৰে বঙাইগাঁও চহৰত উপস্থিত হোৱাৰ সন্দেহ কৰি বাহনসহ পাঁচজনকে আটক কৰি থানালৈ আনে ৷

উল্লেখ্য যে শেহতীয়াভাৱে বঙাইগাঁও চহৰত বহিঃ ৰাজ্যৰ পৰা অহা দুৰ্বৃত্তৰ দলে এটিএমৰ ধন লুট কৰি নিয়া আদি ঘটনা সংঘটিক কৰি আহিছে ৷ এনে অৱস্থাত নিশা বহিঃ ৰাজ্যৰ পৰা অহা যুৱকৰ দলটোকো আৰক্ষীয়ে সহজভাৱে লোৱা নাই ৷ আৰক্ষীয়ে ইতিমধ্যে দলটোৰ পৰা এটিএমৰ সৈতে জড়িত কিছু নথি - পত্ৰ পোৱা বুলি প্ৰকাশ কৰি যুৱককেইজনৰ বিৰুদ্ধে এটা গোচৰ ৰুজু কৰি সমগ্ৰ বিষয়টো তদন্ত কৰি থকা বুলিও জানিবলৈ দিছে ৷ ভাৰপ্ৰাপ্ত আৰক্ষী বিষয়াগৰাকীয়ে জানিবলৈ দিয়া মতে কৰায়ত্ত কৰা যুৱক পাঁচজন হৈছে উত্তৰ প্ৰদেশৰ ছাদাম আজিজ( ২৩) ,মহম্মদ ছঈদ (৩২) আৰু ছেহজাদ (২৬) ৰ লগতে পশ্চিম বংগৰ নাছনাবী আনচাৰি ( ৩৫) আৰু আলমাহুদ মিস্ত্ৰী (৩৩) ৷ আৰক্ষীয়ে যুৱকৰ দলটোৰ পৰা বহুকেইখন এটিএম কাৰ্ড, ভোটাৰ কাৰ্ড, পান কাৰ্ড, আঠটা মোবাইল, নগদ ধন, এখন দা, এখন খুকুৰি, এডাল ষ্টিক, এটা টেমাৰ ভিতৰত ক'লা পদাৰ্থ , মূল্যবান হাতঘড়ী, কাপোৰ, বেগ আদি বিভিন্ন সামগ্ৰী জব্দ কৰে ৷ লগতে বাহনখনো জব্দ কৰিছে ৷ যুৱককেইজনৰ কথাৰ মিল নথকা বুলি প্ৰকাশ কৰি যুৱককেইজনে আৰক্ষীৰ আগত গৰু আৰু ম'হৰ পেটৰ ভিতৰত থকা বস্তু এটাৰ ব্যৱসায় কৰে আৰু সেয়া বিদেশলৈ ৰপ্তানি কৰা বুলিও প্ৰকাশ কৰা বুলি আৰক্ষী বিষয়াগৰাকীয়ে জানিবলৈ দিয়ে ৷ কিন্তু আৰক্ষীৰ মতে যুৱককেইজনে অপৰাধ সংঘটিত কৰাৰ উদ্দেশ্যৰে বঙাইগাঁওলৈ আহিছে ৷ বিশেষকৈ এটিএমৰ ধন লুটৰ ঘটনা সংঘটিত কৰিবলৈ অহাৰ সম্ভাৱনা আছে বুলি কৈ সেয়ে গোচৰ ৰুজু কৰি তদন্ত কৰি থকা বুলিও জানিব দিয়ে ভাৰপ্ৰাপ্ত আৰক্ষী বিষয়াগৰাকীয়ে ৷🔯