🔯চিৰাঙক ধঁপাত মুক্তকৰণৰ ওপৰত সজাগতা কর্মশালা🔯

🔯চিৰাঙক ধঁপাত মুক্তকৰণৰ ওপৰত সজাগতা কর্মশালা🔯  

📝চিৰাংঃ ৭ এপ্রিলঃ চিৰাং জিলাৰ সদৰ কাজলগাঁৱস্থিত জিলা উপায়ুক্ত কাৰ্যালয়ৰ সভাকক্ষত বুধবাৰে ধঁপাত নিয়ন্ত্রণ সন্দৰ্ভত এক সজাগতা কর্মশালা অনুষ্ঠিত হয় । চিৰাং জিলাৰ অতিৰিক্ত উপায়ুক্ত নির্মালী বৰুৱাই পৌৰোহিত্য কৰা কৰ্মশালাত আদৰণি ভাষণ প্রদান কৰে চিৰাং জিলাৰ যুটীয়া স্বাস্থ্য সেৱা সঞ্চালক দেবানন্দ বণিক্যই । মূল বিষয়ৰ ওপৰত আলোকপাত কৰি চিৰাং জিলাক কেনেদৰে ধঁপাতমুক্ত কৰিব পাৰি তাৰ ওপৰত বিস্তৃত আলোচনা দাঙি ধৰে স্বাস্থ্য সেৱা বিভাগৰ জিলা ন'ডেল বিষয়া ডাঃ ৰাজু কুমাৰ দাসে । কৰ্মশালাত জিলাখনৰ আৱকাৰী, স্বাস্থ্য, শিক্ষা , সমাজ কল্যাণ, আৰক্ষী, জনস্বাস্থ্য কাৰিকৰী, জনসংযোগ আদিকে ধৰি জিলাখনৰ প্ৰায়বোৰ বিভাগৰ মুৰব্বীৰ লগতে কেবাখনো মহাবিদ্যালয়ৰ মুৰব্বীয়ে অংশগ্রহণ কৰে ।  অসম ৰাজ্যিক ধঁপাত নিয়ন্ত্ৰণ কোষৰ প্ৰকল্প সহায়ক অৰুন্ধতী বৰ্মনে জিলাখনত শিক্ষা অনুষ্ঠানসমূহত কেনেদৰে ধঁপাতমুক্ত কৰিব পাৰি তাৰ ওপৰত আলোচনা দাঙি ধৰে । অনুষ্ঠানত জিলাখনত ধঁপাতমুক্ত সজাগতা সৃষ্টি কৰিবৰ বাবে কেইবাটাও পদক্ষেপ লোৱা হয় । অনুষ্ঠানত অসম ৰাজ্যিক ধঁপাত নিয়ন্ত্ৰণ কোষৰ আঁচনি প্ৰবন্ধক মৃণাল মেধিয়ে বিভাগটোৱে কৰি অহা কাম - কাজৰ ওপৰত মত ব্যক্ত কৰে । জিলাৰ অতিৰিক্ত উপায়ুক্ত নির্মালী বৰুৱাই কর্মশালাত ধঁপাত তথা কেন্সাৰ ৰোগ বিয়োপিব পৰা আচাৰ , তামোল - পাণ , শুকান মাছ আদি সন্দৰ্ভত বক্তব্য  প্ৰদানৰ লগতে কেন্সাৰ মুক্ত জিলা গঢ় দিব পৰাকৈ ধঁপাতমুক্ত জিলা হিচাপে চিৰাং জিলাক প্ৰতিষ্ঠা কৰিবলৈ কেনেধৰণৰ পদক্ষেপ গ্ৰহণ কৰা উচিত সেই সন্দৰ্ভত বিতংভাৱে আলোচনা কৰে। কৰ্মশালাত অংশগ্ৰহণকাৰী সকলোকে প্ৰমাণপত্ৰ  প্ৰদান কৰা হয় ।🔯