🔯বিশ্ব স্বাস্থ্য দিৱস উপলক্ষে বি জি আৰ এইচ এছ স্কুলত স্বাস্থ্য সজাগতামূলক বক্তৃতানুষ্ঠান🔯

🔯বিশ্ব স্বাস্থ্য দিৱস উপলক্ষে বি জি আৰ এইচ এছ স্কুলত স্বাস্থ্য সজাগতামূলক বক্তৃতানুষ্ঠান🔯

📝বঙাইগাঁওঃ ৭ এপ্ৰিলঃ বিশ্ব স্বাস্থ্য দিৱসৰ লগত সংগতি ৰাখি ' বঙাইগাঁও শোধনাগাৰ উপনগৰীস্থিত বি জি আৰ এইচ এছ স্কুলত বৃহস্পতিবাৰে স্বাস্থ্য সম্পৰ্কীয় এক সজাগতামূলক বক্তৃতানুষ্ঠানৰ আয়োজন কৰা হয়। বি জি আৰ চিকিৎসালয়ৰ উদ্যোগত বিশ্ব স্বাস্থ্য দিৱসৰ এই বছৰৰ বিষয়বস্তু ' আমাৰ গ্ৰহ, আমাৰ স্বাস্থ্য'ক সাৰোগত কৰি  আয়োজিত এই অনুষ্ঠানত সমল ব্যক্তি হিচাবে উপস্থিত থাকে চিকিৎসালয়খনৰ জ্যেষ্ঠ চিকিৎসা বিষয়া ডাঃ তেজাশ শেঠ।বক্তাগৰাকীক আদৰণী জনায় বিদ্যালয়খনৰ অধ্যক্ষ বি কে শৰ্মাই। ডাঃ শেঠে ছাত্ৰ-ছাত্ৰীসকলে স্বাস্থ্যকৰ জীৱন-যাপনৰ ক্ষেত্ৰত ল'বলগীয়া সাৱধানতা, সজাগতা তথা প্ৰতিকাৰ সম্পৰ্কে বিস্তৃতভাবে ব্যাখ্যা কৰে। তেওঁ বিশেষকৈ শৰীৰত ভিটামিনৰ অভাৱত হ'ব পৰা ৰোগ আৰু বিভিন্ন আহাৰৰ জৰিয়তে ভিটামিনৰ অভাৱ কেনেকৈ পূৰণ কৰিব পাৰি সেই সম্পৰ্কে ছাত্ৰ-ছাত্ৰীসকলৰ উপযোগীকৈ ব্যাখ্যা কৰে। আনহাতে পানী, বায়ু, স্পৰ্শ, ম'হ-মাখি-- এই চাৰিবিধ বস্তুৰ জৰিয়তে কেনেদৰে সোঁচৰা ৰোগ বিয়পে সেই বিষয়ে ব্যাখ্যা কৰাৰ লগতে ইয়াৰ বাবে ল'বলগীয়া সাৱধানতা, সজাগতা সম্পৰ্কেও দিহা-পৰামৰ্শ দিয়ে জ্যেষ্ঠ চিকিৎসকগৰাকীয়ে। ছাত্ৰ-ছাত্ৰীসকলৰ মাজত স্বাস্থ্য সজাগতা সৃষ্টিৰ বাবে লোৱা এনে পদক্ষেপৰ বাবে বি জি আৰ এইচ এছ স্কুলৰ অধ্যক্ষ বি কে শৰ্মাই চিকিৎসালয় আৰু শোধনাগাৰ কৰ্তৃপক্ষৰ শলাগ লয়। আনহাতে দিল্লী পাব্লিক স্কুল( ঢালিগাঁও)তো অনুৰূপ অনুষ্ঠানৰ আয়োজন কৰা বুলি চিকিৎসালয় সূত্ৰই সদৰি কৰে।🔯