বিজেপি - অগপই মিলিজুলি গঠন কৰিব বঙাইগাঁও পৌৰসভা🔯

🔯বিজেপি - অগপই মিলিজুলি গঠন কৰিব বঙাইগাঁও পৌৰসভা🔯

🔯কাইলৈ অনুষ্ঠিত হ'ব পৌৰসভাৰ প্ৰথম বৈঠক🔯

🔯পৌৰপতিৰ পদত বিজেপিৰ সুবোধ চন্দ্ৰ দাসৰ নাম ঘোষণা🔯

 

🔯উপ পৌৰপতিৰ আসনত বহিব অগপৰ শৈলেন্দ্ৰ সৰকাৰ🔯

🔯অভয়াপুৰী পৌৰসভাৰ পৌৰপতি - উপ পৌৰপতিৰো নাম ঘোষণা বিজেপিৰ🔯

📝বঙাইগাঁওঃ ১১ এপ্ৰিলঃ অৱশেষত সকলো জল্পনা কল্পনাৰ অৱসান ঘটাই কাইলৈ গঠন হ'ব বঙাইগাঁও পৌৰসভা ৷ বিজেপি আৰু অগপ দলে মিলি গঠন কৰিব পৌৰসভাখন ৷ উল্লেখ্য যে বিজেপি আৰু অগপ দলে পৃথকে পৃথকে পৌৰসভা নিৰ্বাচনত অৱতীৰ্ণ হৈছিল যদিও পৌৰসভাখন একেলগে মিলি গঠন কৰাৰ সিদ্ধান্ত গ্ৰহণ কৰি গঠনৰ দিশে আগবাঢ়িছে ৷ পৌৰসভাত বিজেপি - অগপৰ মিত্ৰতাৰ ফলত পৌৰপতিৰ আসনত বিজেপি দলৰ নিৰ্বাচিত প্ৰাৰ্থী আৰু উপ পৌৰপতিৰ আসনত অগপ দলৰ প্ৰাৰ্থীক দল দুটাই বহুৱাব ৷ 

ইপিনে কাইলৈ পৌৰসভাৰ প্ৰথমখন বৈঠক অনুষ্ঠিত হোৱাৰ পৰিপ্ৰেক্ষিতত আজি বঙাইগাঁও জিলা বিজেপিয়ে পৌৰসভাৰ পৌৰপতিৰ নাম আনুষ্ঠানিকভাৱে ঘোষণা কৰে ৷ বিজেপি দলে পৌৰপতি হিচাপে ১৬ নম্বৰ ৱাৰ্ডৰ নিৰ্বাচিত প্ৰাৰ্থী সুবোধ চন্দ্ৰ দাসৰ নাম ঘোষণা কৰিছে ৷ আনহাতে উপ পৌৰপতি হিচাপে মিত্ৰদল অগপই ২৩ নম্বৰ ৱাৰ্ডৰ নিৰ্বাচিত প্ৰাৰ্থী শৈলেন্দ্ৰ সৰকাৰৰ নাম ঘোষণা কৰিছে ৷ উল্লেখ্য যে পৌৰসভা গঠন সন্দৰ্ভত আজি  বঙাইগাঁও জিলা বিজেপি কাৰ্যালয়ত জিলা বিজেপিৰ সভানেত্ৰী হিমানী অধিকাৰীৰ সভাপতিত্বত এখন জৰুৰী গুৰুত্বপূৰ্ণ সভা অনুষ্ঠিত হয় । উক্ত সভাত বঙাইগাঁও আৰু অভয়াপুৰী পৌৰসভা দুখনৰ পৌৰপতি আৰু উপ-পৌৰপতিৰ নাম ঘোষণা কৰে । বঙাইগাঁও পৌৰসভা যিহেতু মিত্ৰদল অগপৰে সৈতে মিলি গঠিত হ'ব সেয়েহে দলীয়ভাৱে কেৱল পৌৰপতি হিচাপে সুবোধ চন্দ্ৰ দাসৰ নামটো আনুষ্ঠানিকভাৱে  ঘোষণা কৰে । ৰাজ্যিক কাৰ্যনিৰ্বাহক সদস্য সুকেন ৰায় , জিলা প্ৰভাৰী ব্ৰজ কুমাৰ দাস , জিলা বিজেপিৰ সাধাৰন সম্পাদকদ্বয় ক্ৰমে শংকৰ বিশ্বাস , জ্যোতিৰ্ময় সৰকাৰ , উপসভাপতি কৌস্তভ দাস, দেৱজিত বোস আৰু মণ্ডল সভাপতি সকলৰ লগতে বিষয়- ববীয়া তথা কাৰ্যকৰ্তাসকল উপস্থিত থকা উক্ত সভাত অভয়াপুৰী পৌৰসভাৰ পৌৰপতি আৰু উপ পৌৰপতিৰো নাম ঘোষণা কৰা হয় ৷ এককভাৱে গঠন কৰিবলগীয়া অভয়াপুৰী পৌৰসভাৰ পৌৰপতি হিচাপে ৮ নন্বৰ ৱাৰ্ডৰ নিৰ্বাচিত দলীয় প্ৰাৰ্থী ৰমেন্দ্ৰ নাৰায়ণ বণিক্য আৰু উপ-পৌৰপতি হিচাপে ২ নম্বৰ ৱাৰ্ডৰ নিৰ্বাচিত প্ৰাৰ্থী জোনমণি পাঠক ৰাভাৰ নাম আনুষ্ঠানিকভাৱে ঘোষণা কৰে দলটোৱে ৷ ইপিন এই সভাতে অগপৰ অৰ্ধশতাধিক কৰ্মীয়ে ভাৰতীয় জনতা পাৰ্টিৰ নীতি আৰু আদৰ্শৰ প্ৰতি আকৃষ্ট হৈ আনুষ্ঠানিকভাৱে বিজেপি দলত যোগদান কৰে । দলত যোগদান কৰাসকলক দলীয় ভাৱে উষ্ম আদৰণি জনোৱা  হয় । সভাত নিৰ্বাচিত পৌৰসভা নিৰ্বাচনত বিজয়ী প্ৰাৰ্থীসকলক বিশেষভাৱে শুভেচ্ছা আৰু সম্বৰ্ধনা জনোৱা হয় । 

মনকৰিবলগীয়া যে হৈ যোৱা বঙাইগাঁও পৌৰসভা নিৰ্বাচনত ২৫ টা ৱাৰ্ডৰ ভিতৰত এককভাৱে ১৩ টা ৱাৰ্ড দখল কৰি বিজেপি দলে সংখ্যা গৰিষ্ঠতা লাভ কৰাত বঙাইগাঁও পৌৰসভাখন অকলেই গঠন কৰিব বুলি চৰ্চা চলিছিল যদিও দলটোৰ ৰাজ্যিক নেতৃত্বই দিয়া নিৰ্দেশমৰ্মে অৱশেষত বিজেপি দলে অগপৰে মিলিজুলি পৌৰসভাখন গঠনৰ সিদ্ধান্ত গ্ৰহণ কৰে ৷ ইয়াৰ লগে লগে যেন পৌৰসভা নিৰ্বাচনত দুই দলে পৰস্পৰে পৰস্পৰক কৰা আক্ৰমণ তথা প্ৰত্যাক্ৰমণো অতীত হ'ল ৷ লগতে এমাহৰো অধিকজোৰা পৌৰসভা গঠনৰ অপেক্ষাৰো অৱসান ঘটিল ৷  শেহতীয়া নিৰ্বাচনত ২৫ টা ৱাৰ্ডৰে গঠিত বঙাইগাঁও পৌৰসভাত বিজেপিয়ে ১৩ টা , অগপই ১১ টা আৰু কংগ্ৰেছে ১ টা ৱাৰ্ড  দখল কৰিছিল ৷ ইপিনে  পৌৰসভাৰ পৌৰপতি হিচাপে আজি বিজেপি দলৰ সভানেত্ৰী তথা দলীয় বিষয়ববীয়াৰ সৈতে সুবোধ চন্দ্ৰ দাসে জিলা উপায়ুক্ত কাৰ্যালয়ত উপস্থিত হৈ বিভাগীয় বিষয়াৰ হাতত নিজৰ মনোনয়ন পত্ৰ দাখিল কৰে ৷ সেইদৰে অগপৰ তৰফৰ পৰা উপ পৌৰপতি হিচাপে শৈলেন্দ্ৰ সৰকাৰৰ হৈ দলীয় বিষয়বীবীয়াই মনোনয়ন পত্ৰ দাখিল কৰে ৷ উল্লেখ্য যে বঙাইগাঁও পৌৰসভা বিজেপি আৰু অগপই মিলিজুলি গঠন কৰিলেও অভয়াপুৰী পৌৰসভাখন বিজেপি দলে অকলেই গঠন কৰিব ৷🔯