🔯ছিটকাগাঁৱত বঙাইগাঁও তেল শোধনাগাৰ কৰ্তৃপক্ষৰ খোৱা পানী যোগান প্ৰকল্প🔯

🔯ছিটকাগাঁৱত বঙাইগাঁও তেল শোধনাগাৰ কৰ্তৃপক্ষৰ খোৱা পানী যোগান প্ৰকল্প🔯  

🔯বিধায়ক ফণীভূষণ চৌধুৰীয়ে কৰিলে শুভ উদ্বোধন🔯 

📝বঙাইগাঁওঃ ১৩ এপ্ৰিলঃ বঙাইগাওঁ তেল শোধনাগাৰে ব্যৱসায়িক সামাজিক দায়বদ্ধতাৰ  (চি .এছ.আৰ) অংশ হিচাপে বঙাইগাঁৱৰ ছিটকাগাঁও গাৰোপাৰাত নিৰ্মাণ কৰা  খোৱাপানী যোগান প্ৰকল্প এটাৰ বুধবাৰে শুভ উদ্বোধন কৰা হয় ৷ এই খোৱাপানী যোগান প্ৰকল্পটো উদ্বোধন তথা গাওঁবাসীলৈ হস্তান্তৰ কৰে ৩২ নং বঙাইগাওঁ বিধানসভা সমষ্টিৰ  বিধায়ক ফণীভূষণ চৌধুৰীয়ে। অনুষ্ঠানত বঙাইগাওঁ জিলাৰ উপায়ুক্ত ডা° এম.এছ.লক্ষ্মীপ্ৰিয়া আৰু বঙাইগাওঁ শোধনাগাৰৰ মুখ্য মহাপ্ৰৱন্ধক এন .কে বৰুৱাৰ লগতে অতিৰিক্ত উপায়ুক্ত পংকজ চমুৱা আৰু চাপৰাকাটা গাঁও পঞ্চায়তৰ সভাপতিও উপস্থিত থাকে। সেইদৰে নিৰ্মাণ সমিতিৰ তৰফৰ পৰা অনুষ্ঠানটোত উপস্থিত থাকে বঙাইগাওঁৰ ৰাজহ চক্ৰ বিষয়া ৰুনাভ ৰামচিয়াৰী, জনস্বাস্থ্য কাৰিকৰী বিভাগৰ কাৰ্য্যবাহী অভিযন্তা শান্তনু সূত্ৰধৰ, বঙাইগাওঁ পলিটেকনিকৰ চিভিল ইঞ্জিনীয়াৰিং বিভাগৰ মুৰব্বী হিতেশ ডেকা, সমাজকৰ্মী জ্যোতিপ্ৰসাদ গোস্বামী, জনস্বাস্থ্য কাৰিকৰী বিভাগ তথা বঙাইগাওঁ শোধনাগাৰৰ বিষয়ববীয়া সকল আৰু স্থানীয় মহিলা আৰু ৰাইজ ।

ইপিনে পানী যোগান প্ৰকল্পটো উদ্বোধন কৰি বিধায়ক চৌধুৰীয়ে পিছপৰা গাওঁখনৰ বাবে লোৱা এই মহৎ প্ৰচেষ্টাৰ বাবে বঙাইগাঁও তেল শোধনাগাৰ কৰ্তৃপক্ষৰ শলাগ লয় আৰু ইয়াৰ পৰিচালনা আৰু ৰক্ষণাবেক্ষণৰ বাবে আগবাঢ়ি আহিবলৈ ৰাইজলৈ আহ্বান জনায় । উল্লেখ্য যে, ৫৫ টা পৰিয়াললৈ খোৱাপানী যোগান ধৰা উক্ত পানী যোগান আঁচনিখন সম্পূৰ্ণৰূপে সৌৰশক্তিচালিত । প্ৰকল্পটোৰ মুঠ ব্যয় ২৬.৬২ লাখ টকা যদিও বৰ্তমানলৈকে প্ৰথম কিস্তি হিচাপে ১৩. ৩১ লাখ টকা মুকলি কৰি দিছে শোধনাগাৰ কৰ্তৃপক্ষই ৷ 🔯