🔯প্ৰধানমন্ত্ৰীৰ হিতাধিকাৰীৰ সৈতে দেশব্যাপি মত বিনিময় অনুষ্ঠান🔯

🔯প্ৰধানমন্ত্ৰীৰ হিতাধিকাৰীৰ সৈতে দেশব্যাপি মত বিনিময় অনুষ্ঠান🔯

🔯কাইলৈ বঙাইগাঁৱতো আয়োজন🔯

🔯উপস্থিত থাকিব পঞ্চায়ত আৰু গ্ৰামোন্নয়ন তথা জনস্বাস্থ্য কাৰিকৰী বিভাগৰ মন্ত্ৰী ৰঞ্জিত কুমাৰ দাস🔯 

🔯বঙাইগাঁওঃ৩০ মে': ভাৰতৰ স্বাধীনতাৰ ৭৫ বছৰ পূৰ্ণ হোৱা উপলক্ষে উদযাপিত আজাদী কা অমৃত মহোৎসৱৰ লগত সংগতি ৰাখি কাইলৈ পুৱা ৯:৩০ বজাৰ পৰা সমগ্ৰ দেশৰ লগতে বঙাইগাঁও জিলাতো দিনজোৰা কাৰ্যসূচীৰ আয়োজন কৰা হৈছে ৷ বঙাইগাঁও মহাবিদ্যালয় খেল পথাৰত আয়োজন কৰা অনুষ্ঠানৰ ইতিমধ্যে সকলো প্ৰস্তুতি প্ৰায় সম্পূৰ্ণ হৈছে ৷ এই অনুষ্ঠানত ৰাজ্য চৰকাৰৰ পঞ্চায়ত৷আৰু গ্ৰামোন্নয়ন, জনস্বাস্থ্য কাৰিকৰী, খাদ্য, অসামৰিক যোগান আৰু গ্ৰাহক পৰিক্ৰমা আৰু সাধাৰণ প্ৰশাসন বিভাগৰ মন্ত্ৰী ৰঞ্জিত কুমাৰ দাসে মুখ্য অতিথি হিচাপে উপস্থিত থাকিব ৷ এই সন্দৰ্ভত বঙাইগাঁও জিলাৰ উপায়ুক্ত নৱদ্বীপ পাঠকে আজি এক সংবাদ মেল আয়োজন কৰি কয় যে কাইলৈ ভাৰতৰ প্ৰধানমন্ত্ৰী নৰেন্দ্ৰ মোদীয়ে হিমাচল প্ৰদেশত এক গৰীব কল্যাণ সন্মিলনত অংশ গ্ৰহণ কৰিব আৰু তাৰ পৰাই দেশবাসীক সম্বন্ধন কৰিব ৷ এই সন্মিলনখনত প্ৰধানমন্ত্ৰী আৱাস যোজনাকে ধৰি ১৪ টাকৈ আঁচনিৰ কিছুসংখ্যক হিতাধিকাৰীৰ সৈতে প্ৰধানমন্ত্ৰীগৰাকীয়ে ভাৰ্চুৱেলী  মত বিনিময় কৰিব ৷ এই মত বিনিময় অনুষ্ঠানটো দেশৰ আন অঞ্চলৰ লগতে অসমৰো প্ৰতিখন জিলা সদৰত একে সময়তে অনুষ্ঠিত হ'ব আৰু এই অনুষ্ঠানত ভাৰ্চুৱেলী সকলোৱে উপস্থিত থাকিব ৷ কিন্তু এই হিতাধিকাৰীৰ সৈতে দেশব্যাপি মত বিনিময় অনুষ্ঠানত ৰাজ্যখনৰ শিৱসাগৰ, ডিব্ৰুগড়, বঙাইগাঁও আৰু তেজপুৰৰ হিতাধিকাৰীৰ সৈতে প্ৰধানমন্ত্ৰীয়ে ভাৰ্চুৱেলী মত বিনিময় কৰাৰ সম্ভাৱনা আছে ৷ সেয়ে ইয়াৰ অংশ হিচাপে বঙাইগাঁৱত এই অনুষ্ঠানৰ আয়োজন কৰা হৈছে ৷ উল্লেখ্য যে  এই অনুষ্ঠাটোৰ বাবে বঙাইগাঁও মহাবিদ্যালয় খেল পথাৰত সাঁজি উলিওৱা হৈছে বৃহৎ ৰভা ৷ অনুষ্ঠানটো সুকলমে আয়োজনৰ বাবে জিলা প্ৰশাসনৰ লগতে বিভিন্ন বিভাগ ব্যস্ত হৈ পৰিছে ৷ অনুষ্ঠানত উপস্থিত থাকিবলগীয়া হিতাধিকাৰী সকলৰ বাবে সুব্যৱস্থা কৰা হৈছে বুলিও উপায়ুক্তগৰাকীয়ে সংবাদ মেলত প্ৰকাশ কৰে ৷ 

উপায়ুক্তগৰাকীয়ে জানিবলৈ দিয়া মতে অনুষ্ঠানত প্ৰধানমন্ত্ৰী আৱাস যোজনাক অধিক অগ্ৰাধিকাৰ প্ৰদান কৰা হ'ব আৰু হিতাধিকাৰীসকললৈ অনুষ্ঠানৰ শেষত আৱাস আৱণ্টন পত্ৰ প্ৰদান আৰু ধন হস্তান্তৰ কৰাৰো ব্যৱস্থা গ্ৰহণ কৰা হৈছে ৷ অনুষ্ঠানত মূলত প্ৰধানমন্ত্ৰী আৱাস যোজনা, প্ৰধানমন্ত্ৰী কিষাণ সন্মান নিধি, প্ৰধানমন্ত্ৰী উজ্বালা যোজনা, পোষণ অভিযান, প্ৰধানমন্ত্ৰী মাক্ৰ বন্দনা, স্বচ্ছ ভাৰত অভিযান, জল জীৱন মিছন, প্ৰধানমন্ত্ৰী স্ব-নিধি যোজনা, প্ৰধামন্ত্ৰী গৰীৱ অন্ন যোজনা, অয়ুস্মান ভাৰত প্ৰধানমন্ত্ৰী জন আৰোগ্য যোজনা , প্ৰধানমন্ত্ৰী মুদ্ৰা যোজনা আদিৰ হিতাধিকাৰীসকল উপস্থিত থাকিব ৷ ইয়াৰ ভিতৰত অনুষ্ঠানত প্ৰধানমন্ত্ৰী আৱাস যোজনাৰ হিতাধিকাৰী অধিক থাকিব বুলিও কয় ৷ লগতে হিতাধিকাৰীসকলক প্ৰধানমন্ত্ৰীৰ সৈতে কেনেকৈ কথা - বতৰা পাতিব আদি বিষয়ত ইতিমধ্যে প্ৰশিক্ষণ দিছে ৷ পুৱা ৯ঃ৩০ বজাৰ পৰা  পুৱা ১০ঃ ৫০ বজালৈ ৰাজ্য চৰকাৰৰ কাৰ্যসূচী আৰু ১০ঃ ৫০ বজাৰ পৰা দিনৰ ১২ঃ১০ বজালৈ প্ৰধানমন্ত্ৰীৰ অনুষ্ঠান অনুষ্ঠিত হ'ব ৷ ইপিনে সংবাদ মেলত জিলা পৰিষদৰ মুখ্য কাৰ্যবাহী বিষয়া নাদিৰা জেচমিনে কয় যে জিলাখনৰ ৬৫ টা গাঁও পঞ্চায়ত এলেকাৰ পৰা অনুষ্ঠানত আহিবলগীয়া হিতাধিকাৰীসকলক বাহনেৰে অনুষ্ঠানলৈ লৈ অহা হ'ব ৷ ইয়াৰ বাবে এশখন বাহন পৰিবহন বিভাগে যোগান ধৰিছে ৷ অনুষ্ঠানত প্ৰায় পাঁচ হেজাৰমান হিতাধিকাৰী উপস্থিত থাকিব বুলিও উল্লেখ কৰে ৷  উল্লেখ্য যে অনুষ্ঠানত মন্ত্ৰী ৰঞ্জিত কুমাৰ দাসৰ উপৰি স্থানীয় বিধায়ক ফনীভূষণ চৌধুৰীয়ে সন্মানীয় অতিথি আৰু পঞ্চায়ত আৰু গ্ৰামোন্নয়ন বিভাগৰ আয়ুক্ত বিক্ৰম কৈৰী তথা বিভাগীয় বিষয়াসকল উপস্থিত থাকিব ৷ সংবাদ মেলত জিলা উন্নয়ন আয়ুক্ত ভাস্কৰ দাস, জিলাৰ অতিৰিক্ত উপায়ুক্ত পংকজ চমুৱা,  জিলা তথ্য আৰু জনসম্পৰ্কৰক্ষী বিষয়া বিনুৰাণী ৰাজবংশী উপস্থিত আছিল ৷🔯