🔯বঙাইগাঁৱত আন্তর্জাতিক নাৰ্ছ দিৱস পালন🔯

🔯বঙাইগাঁৱত আন্তর্জাতিক নাৰ্ছ দিৱস পালন🔯 

📝বঙাইগাঁওঃ ১২ মে': সমগ্ৰ বিশ্ব তথা দেশৰ লগতে বৃহস্পতিবাৰে বঙাইগাঁৱতো আন্তৰ্জাতিক নাৰ্ছ দিৱস পালন কৰা হয় ৷ এই উপলক্ষে বঙাইগাঁও অসামৰিক চিকিৎসালয়ত অনুষ্ঠিত আন্তর্জাতিক নাৰ্ছ দিৱসৰ অনুষ্ঠানত জিলাৰ যুটীয়া স্বাস্থ্য সেৱা সঞ্চালক ডা: পি কে ৰয়ে ফ্লোৰেন্স নাইটিংগেলৰ প্ৰতিচ্ছবিৰ সন্মুখত বন্তি প্ৰজ্বলন কৰি অনুষ্ঠানৰ শুভাৰম্ভ কৰে৷ ফ্লোৰেন্স নাইটিংগেলৰ জন্মদিনৰ লগত সংগতি ৰাখি আয়োজিত আন্তর্জাতিক নাৰ্ছ দিৱসৰ অনুষ্ঠানত ইয়াৰ পিচতে চিকিৎসালয়ত কৰ্মৰত নাৰ্ছসকলে মমবাতি জ্বলাই মহীয়সী নাৰী ফ্লোৰেন্স নাইটিংগেলৰ প্ৰতি সন্মান আৰু শ্ৰদ্ধা জনায় ৷ একেদৰে মহীয়সী নাৰীগৰাকীৰ জন্মদিন উপলক্ষে অনুষ্ঠানত কেকো কটা হয় ৷ অনুষ্ঠানৰ লগত সংগতি ৰাখি এখন সভাও অনুষ্ঠিত হয় ৷ বঙাইগাঁও অসামৰিক চিকিৎসালয়ৰ অধ্যক্ষ ডা:নাজিৰুল ইছলামৰ পৌৰহিত্যত অনুষ্ঠিত সভাত  ফ্লোৰেন্স নাইটিংগেলৰ জীৱন, আদৰ্শ , মানৱ জাতিৰ প্ৰতি তেওঁৰ অৱদান আদিৰ বিষয়ে আলোকপাত কৰা হয় ৷ 

সভাত জিলাৰ যুটীয়া স্বাস্থ্য সেৱা সঞ্চালক ডা:পি কে ৰয়, বঙাইগাঁও অসামৰিক চিকিৎসালয়ৰ অধ্যক্ষ ডা:নাজিৰুল ইছলাম,ডি এচ অ, ৰাষ্ট্ৰীয় স্বাস্থ্য অভিযানৰ বঙাইগাঁও জিলাৰ মিডিয়া বিশেষজ্ঞ জ্যোতিষা শইকীয়া আদি উপস্থিত থাকি  স্বাস্থ্য সেৱা বিভাগত নাৰ্ছ সকলে আগবঢ়োৱা মানৱ সেৱা তথা অৱদানৰ লগতে মহৎ কাৰ্যৰ প্ৰশংসা কৰি বক্তব্য ৰাখে ৷ লগতে অনাগত দিনতো সকলোৱে আন্তৰিকতাৰে কাম কৰি যোৱাৰ সংকল্প গ্ৰহণ কৰে ৷ একেটা অনুষ্ঠানতে প্ৰাক্তন মেট্ৰন সকলক সম্বৰ্ধনা জনোৱা হয়৷ সেইদৰে আন্তৰ্জাতিক নাৰ্ছ দিৱস উপলক্ষে অনুষ্ঠানত উপস্থিত থকা নাৰ্ছ সকলৰ লগতে সকলোৱে আন্তৰ্জাতিক নাৰ্ছ দিৱসৰ বেজ পৰিধান কৰে৷  অনুষ্ঠানত চিকিৎসালয়খনত৷কৰ্মৰত চিকিৎসক, ফাৰ্মাচিষ্ট আৰু অন্যান্য স্বাস্থ্য কৰ্মীসকলো উপস্থিত থাকে ৷ উল্লেখ্য যে মহীয়সী নাৰী ফ্লোৰেন্স নাইটিংগেলৰ জন্মদিনটো প্ৰতিবছৰে সমগ্ৰ বিশ্বজুৰি আন্তৰ্জাতিক নাৰ্ছ দিৱস হিচাপে পালন কৰি অহা হৈছে ৷ সমগ্ৰ বিশ্বত কেৱল নাৰীসকলে ৰূপায়ণ কৰি অহা একমাত্ৰ সেৱাটোৱেই হৈছে নাৰ্ছিং সেৱা। এই নাৰ্ছসকলে শান্তি আৰু যুদ্ধ সকলো কালতে সেৱা আগবঢ়াই আহিছে ৷  যিকোনো অসুখত ভুগি থকা ৰোগী, আকস্মিক দুৰ্ঘটনা, যুদ্ধ ক্ষেত্ৰত আঘাতপ্ৰাপ্ত সৈনিক, অস্ত্ৰোপচাৰ, বৃদ্ধ এই সকলোকে হাঁহিমুখে যতন লৈ যায় এগৰাকী নাৰ্ছে । শেহতীয়াভাৱে ভয়াৱহ কৰোনা কালতো নিজৰ জীৱন বিপন্ন কৰি ৰোগীসকলোক সেৱা আগবঢ়াই নিজৰ মানৱ সেৱাৰ নিৰ্দশন দাঙি ধৰিছিল ৷ যাৰ বাবে মৃত্যুৰ দুৱাৰ দলিৰ পৰা বহুতে ঘুৰাই পাইছিল নিজৰ জীৱন ৷🔯