🔯বঙাইগাঁৱত ৰাষ্ট্ৰীয় ডেংগু দিৱস পালন🔯

🔯বঙাইগাঁৱত ৰাষ্ট্ৰীয় ডেংগু দিৱস পালন🔯

📝বঙাইগাঁওঃ ১৬ মে': বঙাইগাঁও জিলা স্বাস্থ্য সমিতিৰ উদ্যোগত আৰু ৰাষ্ট্ৰীয় স্বাস্থ্য মিছনৰ সহযোগত জিলাখনত সোমবাৰে ৰাষ্ট্ৰীয় ডেংগু দিৱস পালন কৰা হয়। এই উপলক্ষ্যে বঙাইগাঁও জিলাৰ যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়ৰ সভাপতিত্বত বঙাইগাঁও অসামৰিক চিকিৎসালয়ত এখন সজাগতা সভা অনুষ্ঠিত হয়। সভাত উপস্থিত থকা জিলাখনৰ বিভিন্ন এলেকাৰ আশাকৰ্মীসকলক যুটীয়া স্বাস্থ্য সেৱা সঞ্চালক পৰেশ কুমাৰ ৰয়ে কয় যে আশাকৰ্মীসকলেই তৃণমূল পৰ্যায়ত ৰাইজক ডেংগু জ্বৰ সম্পৰ্কে সজাগ কৰিব লাগিব। যিহেতু প্ৰতিগৰাকী আশাকৰ্মী নিজৰ নিজৰ এলেকাৰ লোকসকলক ব্যক্তিগতভাৱে চিনি পায় , গতিকে তেওঁলোকেই লোকসকলক এই বাৰিষাৰ সময়ত জ্বৰ হ'লে  স্বাস্থ্য পৰীক্ষা কৰিবলৈ উৎসাহিত কৰিব লাগিব। কিয়নো যদি জ্বৰ হোৱা মানুহজনৰ স্বাস্থ্য পৰীক্ষা কৰি গম পোৱা যায় যে তেওঁৰ ডেংগু জ্বৰ হৈছে, তেতিয়া উপযুক্ত চিকিৎসাৰ বাবে ৰোগীজনক চিকিৎসালয়লৈ আনিব লাগিব আশাকৰ্মীসকলেই। তদুপৰি ডেংগু জ্বৰ যে সংক্ৰামক ৰোগ নহয়, ই ডেংগু ম'হে কামুৰিলেহে হয় সেয়াও আশাকৰ্মীসকলে জনসাধাৰণক বুজাব লাগিব। লগতে ডেংগু নহ'বলৈ ৰাইজে কি কি কৰিব লাগে আৰু কি কি কৰিব নালাগে সেয়াও আশাকৰ্মীসকলে জনাব লাগিব ৷ সভাত বঙাইগাঁও অসামৰিক চিকিৎসালয়ৰ অধীক্ষক ডা:নাজিৰুল ইছলাম, জিলা নিৰীক্ষণ বিষয়া ডা:বাদল সৰকাৰ,জিলা আঁচনি প্ৰবন্ধক কৰুণা ব্ৰহ্ম আৰু জিলা মিডিয়া বিশেষজ্ঞ জ্যোতিষা শইকীয়ায়ো বক্তব্য ৰাখে। 

সভাত জিলা মেলেৰীয়া বিষয়া ডা:ইমদাদুল ইছলাম খান,জিলা বাহকজনিত ৰোগ পৰামৰ্শদাতা ধ্ৰুৱ চৌধুৰীৰ লগতে আন আন বিষয়ববীয়া আৰু সাধাৰণ ৰাইজ উপস্থিত থাকে। উক্ত সভাৰ পিছতে বঙাইগাঁও অসামৰিক চিকিৎসালয়ৰ সন্মুখৰ পৰা আশাকৰ্মী তথা সাধাৰণ ৰাইজৰ অংশগ্ৰহনেৰে এটি সজাগতা ৰেলীও উলিওৱা হয়। উল্লেখ থাকে যে জিলাখনৰ স্বাস্থ্য আৰু কল্যাণ কেন্দ্ৰসমূহতো ডেংগু জ্বৰ সম্পৰ্কত অনুৰূপ সজাগতা সভা অনুষ্ঠিত কৰা হয়৷ এই সজাগতাৰ লগত সংগতি ৰাখি এখন অনলাইন কুইজ প্ৰতিযোগিতাৰো  আয়োজন কৰা হৈছে যাৰ জৰিয়তে সাধাৰণ ৰাইজে লাভ কৰিব একোখন অনলাইন-প্ৰমাণপত্ৰ ৷ উল্লেখ্য যে ১৬ মে' পৰা ৩১মে'লৈ ডেংগু জ্বৰ সম্পৰ্কত পষেকজোৰা কাৰ্যসূচী হাতত লোৱা হৈছে। জিলা তথ্য আৰু জনসংযোগ বিষয়াৰ কাৰ্যালয়ৰ স্থিৰ অনুভাষ যন্ত্ৰযোগে ডেংগু জ্বৰ সম্পৰ্কত কি কি কৰিব লাগে আৰু কি কি কৰিব নালাগে সেইবোৰ প্ৰচাৰ কৰি ৰাইজক সজাগ কৰাৰ প্ৰয়াস কৰা হৈছে। অনুষ্ঠানত জিলা তথ্য আৰু জনসম্পৰ্কৰক্ষী বিষয়া বিনুৰাণী ৰাজবংশীও উপস্থিত থাকে ৷🔯