🔯বঙাইগাঁৱত গুণোৎসৱ- ২০২২ ৰ প্ৰস্তুতি🔯

🔯বঙাইগাঁৱত গুণোৎসৱ- ২০২২ ৰ প্ৰস্তুতি🔯 

🔯বিভিন্ন পৰ্যায়ৰ প্ৰশিক্ষণ অনুষ্ঠিত 🔯 

📝বঙাইগাঁওঃ ৬  মে': বঙাইগাঁও জিলাত গুণোৎসৱ -২০২২ ৰ বাবে পূৰ্ণ পৰ্যায়ত প্ৰস্তুতি চলি আছে । নতুন দিল্লীস্থিত ৰাষ্ট্ৰীয় শিক্ষা গৱেষণা আৰু প্ৰশিক্ষণ পৰিষদে ধাৰ্য কৰি দিয়া নিৰ্দিষ্ট গ্ৰেড বিশেষ ফলাফল লাভ কৰাটো নিশ্চিত কৰিবলৈ অসম চৰকাৰে ২০১৭ বৰ্ষৰ পৰা 'গুণোৎসৱ-এক গুণগত পদক্ষেপ' ৰূপায়ণ কৰি আহিছে।ইতিমধ্যে অসমৰ আন আন জিলাৰ লগতে বঙাইগাঁও জিলাতো দুটা পৰ্যায়ত গুণোৎসৱ অনুষ্ঠিত কৰা হৈছে। এইবছৰ তৃতীয় পৰ্যায়ত গুণোৎসৱ অনুষ্ঠিত কৰা হ'ব । বিদ্যালয়ৰ কাৰ্যসূচীত ৰাইজৰ  অংশগ্ৰহণ, শিক্ষক-শিক্ষয়িত্ৰী, ছাত্ৰ-ছাত্ৰী, অভিভাৱক আৰু অন্যান্য অংশীদাৰসকলৰ মাজত সজাগতা সৃষ্টি, চৰকাৰী বিদ্যালয় ব্যৱস্থা সন্দৰ্ভত ৰাইজ আৰু অভিভাৱকসকলৰ মাজত ইতিবাচক অনুভৱ সৃষ্টি কৰাত গুণোৎসৱে ইতিবাচক প্ৰভাৱ পেলাইছে। গুণোৎসৱৰ অধীনত প্ৰাথমিক আৰু মাধ্যমিক পৰ্যায়ৰ সকলো চৰকাৰী, প্ৰাদেশিকৃত, চাহ বাগিছা কৰ্তৃপক্ষৰ দ্বাৰা পৰিচালিত বিদ্যালয়সমূহ সামৰি লোৱা হ'ব । বিদ্যায়তনিক,  সহঃ বিদ্যায়তনিক আৰু ৰাইজৰ অংশগ্ৰহণ আৰু আন্তঃগাঁথনি আদি দিশ সামৰি বিদ্যালয়সমূহ মূল্যায়ণ কৰা হ'ব। বঙাইগাঁও জিলাত গুণোৎসৱ -২০২২ ৰ বাবে ইতিমধ্যে পৰিকল্পনা যুগুতোৱা হৈছে। 

গুণোৎসৱত জড়িত কৰি বহিৰ্মূল্যায়ক, ন'ডেল শিক্ষক,  সংযোগী বিষয়া (Liasioning Officer) আদি বাচনি কৰা হৈছে । জিলাখনৰ উপায়ুক্ত, অতিৰিক্ত উপায়ুক্তকে ধৰি বিভিন্ন বিভাগৰ বিষয়া, মহাবিদ্যালয়ৰ অধ্যাপক আদিক বহিৰ্মূল্যায়ক হিচাপে বাচনি কৰি ইতিমধ্যে প্ৰশিক্ষণ দিয়া হৈছে। বৃহস্পতিবাৰে বীৰঝৰা বালক উচ্চতৰ মাধ্যমিক বিদ্যালয়ত বহিৰ্মূল্যায়কৰ প্ৰশিক্ষণৰ শুভাৰম্ভ কৰে উপায়ুক্ত নৱদ্বীপ পাঠকে । শুকুৰবাৰেও বীৰঝৰা বালক উচ্চতৰ মাধ্যমিক বিদ্যালয় আৰু বঙাইগাঁও জিলা শিক্ষক প্ৰশিক্ষণ প্ৰতিষ্ঠানত বহিৰ্মূল্যায়কসকলৰ প্ৰশিক্ষণ অনুষ্ঠিত কৰা হয় । গুণোৎসৱ অনুষ্ঠিত কৰিবলৈ লোৱা প্ৰতিখন বিদ্যালয়ৰে প্ৰধান শিক্ষকক বাদ দি আন এজন শিক্ষকক নোডেল শিক্ষক হিচাপে বাচনি কৰি যাৱতীয় প্ৰশিক্ষণ দিয়া হৈছে আৰু সংযোগী বিষয়াজনে বহিৰ্মূল্যায়কৰ লগত যোগাযোগ কৰি প্ৰয়োজনীয় সহায় আগবঢ়াব।🔯