🔯বান প্ৰস্তুতি সন্দৰ্ভত বঙাইগাঁৱত বিভিন্ন এজেন্সীৰ সৈতে জিলা পৰ্যায়ৰ সমন্বয় সভা🔯

🔯বান প্ৰস্তুতি সন্দৰ্ভত বঙাইগাঁৱত বিভিন্ন এজেন্সীৰ সৈতে জিলা পৰ্যায়ৰ সমন্বয় সভা🔯 

📝বঙাইগাঁওঃ ৬ মে': বাৰিষা কাল সমাগত।বাৰিষা মানে বানপানী,গৰাখহনীয়া আদি প্ৰাকৃতিক দুৰ্যোগৰ সময়।বঙাইগাঁও জিলাতো প্ৰায় প্ৰতি বছৰে বানপানী হয় আৰু তাৰ ফলত বহুলোক বানাক্ৰান্ত হয়,ঘৰ-দুৱাৰ বানে বিধস্ত কৰে,খেতি-পথাৰ নষ্ট হয়,মানুহৰ লগতে গৰু-ছাগলী,হাঁহ-পাৰও বানৰ কবলত পৰে আৰু কেতিয়াবা মানুহ আৰু জীৱ-জন্তুৰ প্ৰাণ হানিও হয়। সেয়ে বানাক্ৰান্তসকলক উদ্ধাৰ কৰিবলৈ, সকাহ দিবলৈ, অলপ আশ্ৰয়ৰ ব্যৱস্থা কৰিবলৈ আৰু বিপদৰ সময়ত খাদ্যৰ যোগান ধৰিবলৈ বঙাইগাঁও জিলা দুৰ্যোগ ব্যৱস্থাপনা প্ৰাধিকৰণৰ অধীনত বিভিন্ন প্ৰস্তুতিমূলক ব্যৱস্থা গ্ৰহণ কৰা হৈছে। এই উদ্দেশ্য আগত ৰাখি শুকুৰবাৰে বঙাইগাঁও জিলা দুৰ্যোগ ব্যৱস্থাপনা প্ৰাধিকৰণে জিলা পুথিভঁৰাল  প্ৰেক্ষাগৃহত গাঁও- পঞ্চায়তৰ বিষয়ববীয়া, বেচৰকাৰী সংস্থা,চি এছ অ'(Central Statistical Organization), এন এছ এছ, এন চি চি, আপদা মিত্ৰ, প্ৰতিৰোধী বন্ধু আৰু যুৱ সংগঠনৰ সৈতে বান প্ৰস্তুতি সন্দৰ্ভত জিলা পৰ্যায়ৰ সমন্বয় সভা এখন অনুষ্ঠিত কৰে। সভাত জিলা উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ অধ্যক্ষ নৱদ্বীপ পাঠকে উপস্থিত থাকি সংস্থা-সংগঠনবোৰে বিগত বৰ্ষসমূহত জিলাখনত বানাক্ৰান্ত লোকক কেনেদৰে সহায়-সাহায্য আগবঢ়াইছিল তাৰ বুজ লয়। 

কেইবাগৰাকীও পঞ্চায়তৰ বিষয়ববীয়া, বেচৰকাৰী সংগঠনৰ সদস্য, আপদা মিত্ৰ, প্ৰতিৰোধী বন্ধু আদিয়ে নিজৰ নিজৰ অভিজ্ঞতা বৰ্ণনা কৰে।উপায়ুক্ত পাঠকে আগন্তুক সময়ছোৱাতো বানাক্ৰান্ত লোকক সহায়-সাহায্য আগবঢ়োৱাত তেওঁলোকে আগভাগ ল'ব বুলি আশা প্ৰকাশ কৰে।বঙাইগাঁও জিলাৰ অতিৰিক্ত উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া পংকজ চমুৱাই উপস্থিত সংস্থা-সংগঠনবোৰৰ সদস্যসকলক কয় যে বানপানীৰ দৰে প্ৰাকৃতিক দুৰ্যোগেই হওক বা মানুহৰ দ্বাৰা সৃষ্ট দুৰ্যোগেই হওক বিপদগ্ৰস্তজনক সহায়-সাহায্য আগবঢ়োৱাটোৱেই দুৰ্যোগ ব্যৱস্থাপনা প্ৰাধিকৰণৰ প্ৰধান উদ্দেশ্য। গতিকে যাতে সম্ভাৱ্য বানপানীৰ সময়ত সংস্থা-সংগঠনবোৰে সেৱাৰ মনোভাৱেৰে কাম কৰি আৰ্তজনক উদ্ধাৰ কৰে তাৰ বাবে তেওঁলোকক অনুৰোধ জনায়। দুৰ্যোগ ব্যৱস্থাপনা বিভাগৰ জিলা প্ৰকল্প বিষয়া অনন্ত সামন্তই বানৰ সময়ত সংস্থা-সংগঠনবোৰক এনেদৰে সহায় আগবঢ়াবলৈ অনুৰোধ জনায় যাতে কোনো লোক বা জীৱ-জন্তুৰ প্ৰাণহানি নহয় বা কাৰো সম্পত্তি নষ্ট নহয়। সভাত অগ্নি-নিৰ্বাপক আৰু আপাতকালীন সেৱা বিভাগৰ বিষয়া অমিত বৰ্মনেও বানাক্ৰান্তক উদ্ধাৰ সম্পৰ্কত তেওঁৰ বক্তব্য আগবঢ়ায়। সভাত দুৰ্যোগ ব্যৱস্থাপনা বিভাগৰ ক্ষেত্ৰ বিষয়াসকলো উপস্থিত থাকে🔯