🔯অভিভাৱক মন্ত্ৰী বিচাৰি মুখ্যমন্ত্ৰীলৈ গৰিয়া- মৰিয়া- দেশী জাতীয় পৰিষদৰ স্মাৰক পত্ৰ প্ৰেৰণ🔯

🔯অভিভাৱক মন্ত্ৰী বিচাৰি মুখ্যমন্ত্ৰীলৈ গৰিয়া- মৰিয়া- দেশী জাতীয় পৰিষদৰ স্মাৰক পত্ৰ প্ৰেৰণ🔯

📝বঙাইগাঁওঃ ১৯ মে': অন্যান্য জাতি- জনগোষ্ঠীৰ দৰে  অসমৰ ভূমিপুত্ৰ গৰিয়া, মৰিয়া, দেশী জনগোষ্ঠীসমূহৰ    হৃত মর্যাদা পুনৰুদ্ধাৰৰ লগতে প্ৰতিটো জনজাতি আৰু জনগোষ্ঠীৰ লগত সমান্তৰাল ভাৱে আগুৱাই যোৱাৰ সুবিধা প্ৰদান কৰিবলৈ এই জনগোষ্ঠী সমূহৰ তদাৰকৰ বাবে অসম চৰকাৰৰ ফালৰ পৰা এজন অভিভাৱক অথবা তত্বাৱধায়ক মন্ত্রী নিযুক্তি দিবলৈ সদৌ অসম গৰিয়া- মৰিয়া- দেশী জাতীয় পৰিষদে অসমৰ মুখ্যমন্ত্ৰীক দাবীক জনাইছে ৷ এই সন্দৰ্ভত বৃহস্পতিবাৰে সংগঠনটোৰ বঙাইগাঁও জিলা সমিতিয়ে জিলা উপায়ুক্তৰ জৰিয়তে অসমৰ মুখ্যমন্ত্ৰীলৈ এই দাবী জনাই এখন স্মাৰক পত্ৰ প্ৰেৰণ কৰে ৷ জিলা সমিতিৰ সভাপতি নুৰুল আমিন আৰু সম্পাদক জহিৰুল ইছলাম স্বাক্ষৰিত স্মাৰক পত্ৰখনত উল্লেখ কৰা মতে বঞ্চিত আৰু অৱহেলিত অসমৰ ভূমিপুত্ৰ গৰিয়া, মৰিয়া, দেশী জনগোষ্ঠীৰ হকে  মুখ্যমন্ত্ৰী গৰাকীয়ে এক বলিষ্ঠ ভূমিকা লৈ যি ইতিহাস ৰচিলে সেই কাৰ্য অসমৰ ইতিহাসত সদায় সোণালী আখৰেৰে জিলিকি থাকিব। সেইদৰে অসমৰ থলুৱা জনজাতি আৰু জনগোষ্ঠীৰ সুৰক্ষাৰ স্বাৰ্থত গঠন হোৱা বৰ্তমানৰ চৰকাৰখনে প্ৰতিজন অসমীয়াৰ অস্তিত্ব আৰু প্ৰভূত্ব ৰক্ষার্থে এক দৃঢ় প্রতিজ্ঞাবদ্ধ। কিন্তু অসমত অতীজৰে পৰা বসবাস কৰি থকা গৰিয়া, মৰিয়া , দেশী আদি জনগোষ্ঠী সমূহ বর্তমান অস্তিত্বৰ সংকটত ভুগি দিশহাৰা হৈ পৰিছে। তদুপৰি অসমৰ চুকে-কোণে সিচঁৰিত হৈ থকা এই জনগোষ্ঠীৰ লোক সকল বছৰ বছৰ ধৰি বঞ্চিত আৰু অৱহেলিত হৈ আহিছে। বিগত কংগ্ৰেছ দলৰ দীৰ্ঘদিনীয়া শাসনকালত স্বধর্মীয় বহিৰাগত আৰু পূৰ্ববংগীয় মূলৰ লোক সকলৰ লগত একাকাৰ কৰি সংখ্যালঘূৰ মাজতে সংখ্যালঘু কৰি এই জনগোষ্ঠী সমূহ প্রায় অস্তিত্বহীন হৈ পৰিছিল। অসমৰ প্ৰায়বোৰ সমষ্টিতে গৰিয়া, মৰিয়া, দেশী আদি জনগোষ্ঠীৰ লোক সকল সিচঁৰিত হৈ আছে। কিন্তু এই চৰকাৰখনে এই অৱহেলিত আৰু বঞ্চিত জনগোষ্ঠী সমূহৰ বাবে লোৱা ঐতিহাসিক পদক্ষেপে যেন এক আশাৰ বাৰ্তা কঢ়িয়াই আনিছে। সেয়েহে মুখ্যমন্ত্রীৰ ওচৰত সংগঠনটোৰ বিনম্ৰ অনুৰোধ যাতে অন্যান্য জাতি জনগোষ্ঠীৰ দৰে উক্ত জনগোষ্ঠী সমূহৰ হৃত মর্যাদা পুনৰ উদ্ধাৰৰ লগতে প্ৰতিটো জনজাতি আৰু জনগোষ্ঠীৰ লগত সমান্তৰাল ভাৱে আগুৱাই যোৱাৰ সুবিধা প্ৰদান কৰিবলৈ এই জনগোষ্ঠী সমূহৰ তদাৰকৰ বাবে অসম চৰকাৰৰ ফালৰপৰা এজন অভিভাৱক অথবা তত্বাৱধায়ক  মন্ত্রী দিয়ে ৷ উল্লেখ্য যে জিলা সমিতিৰ সভাপতি, সম্পাদকৰ নেতৃত্বত এটি প্ৰতিনিধি দলে জিলা উপায়ুক্তৰ হাতত মুখ্যমন্ত্ৰীলৈ প্ৰেৰণৰ বাবে স্মাৰক পত্ৰখন প্ৰদান কৰে ৷🔯