🔯বঙাইগাঁৱৰ খগৰপুৰ বাঘপাৰা হাইস্কুলত বিজ্ঞান সজাগতা সভা🔯

🔯বঙাইগাঁৱৰ খগৰপুৰ বাঘপাৰা হাইস্কুলত বিজ্ঞান সজাগতা সভা🔯

📝বঙাইগাঁওঃ ২০ মে': বঙাইগাঁও জিলাৰ খগৰপুৰ বাঘপাৰা হাইস্কুলত শুকুৰবাৰে বিজ্ঞান সজাগতা সভা এখন অনুষ্ঠিত হয়। সভাখনত আঁত ধৰে অসম বিজ্ঞান সমিতিৰ বঙাইগাঁও শাখাৰ ভাৰপ্ৰাপ্ত সম্পাদক মৃনাল ভাগৱতীয়ে। সভাত বিদ্যালয়ৰ তৰফৰ পৰা বিজ্ঞান সমিতিৰ  বিষয়ববীয়াসকলক সম্বৰ্ধনা জনোৱা হয়। অসম চৰকাৰৰ বিজ্ঞান আৰু প্ৰযুক্তিবিদ্যা বিভাগৰ 'বিজ্ঞান সচেতনতা অভিযান' ২০২০-২১ শীৰ্ষক আঁচনিৰ অধীনত অসম বিজ্ঞান সমিতিৰ পৃষ্ঠপোষকতাত, অসম বিজ্ঞান সমিতিৰ বঙাইগাঁও শাখাৰ উদ্যোগত এটি বিজ্ঞান জনপ্ৰিয় বক্তৃতা প্ৰদান কৰে বীৰঝৰা মহাবিদ্যালয়ৰ অৱসৰপ্ৰাপ্ত অধ্যাপক মানবেন্দ্ৰ দাসে। 'জ্যোতিৰ্বিজ্ঞানৰ প্ৰাথমিক ধাৰণা' - বিষয়বস্তু সম্বন্ধে বিদ্যালয়ৰ প্ৰায় শতাধিক শিক্ষাৰ্থীক প্রজেক্টৰৰ সহায়ত তেখেতে মনোগ্রাহী বক্তৃতা আগবঢ়ায়।

সভাখনত বীৰঝৰা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ শৈলেন্দ্ৰ প্ৰসাদ শৰ্মাই শিক্ষাৰ্থীসকলক বিজ্ঞান শিক্ষাৰ প্ৰতি আগ্ৰহী হোৱাৰ বাবে ভাষণ প্ৰদান কৰে। বক্তৃতানুষ্ঠাটোত উপস্থিত থকা শিক্ষাৰ্থীসকলৰ লগতে শিক্ষক- শিক্ষয়িত্ৰীসকলো উপকৃত হয়। সভাত বীৰঝৰা মহাবিদ্যালয়ৰ অধ্যাপক অমল ডেকাও উপস্থিত থাকে। উল্লেখ্য যে ক'ৰোনা মহামাৰীৰ বাবে 'বিজ্ঞান সচেতনতা অভিযান' ২০২০-২১ আঁচনিৰ অধীনৰ কাৰ্যসূচীসমূহ স্থগিত ৰখা হৈছিল। বৰ্তমান গোটেই অসমতে এই কাৰ্যসূচীসমূহ সম্পন্ন কৰি থকা হৈছে। বক্তৃতানুষ্ঠানৰ শেষত খগৰপুৰ বাঘপাৰা হাইস্কুলৰ প্ৰধান শিক্ষক গৌতম ৰায়ে শলাগৰ শৰাই আগবঢ়ায়।🔯