🔯বঙাইগাঁৱৰ জ্ঞানোদয় জাতীয় বিদ্যালয়ত মাণ্ডলিক ভিত্তিত দুদিনীয়াকৈ অনুষ্ঠিত প্ৰাক্- বিদ্যালয় শিক্ষক প্রশিক্ষণ সম্পন্ন🔯

🔯বঙাইগাঁৱৰ জ্ঞানোদয় জাতীয় বিদ্যালয়ত মাণ্ডলিক ভিত্তিত দুদিনীয়াকৈ অনুষ্ঠিত প্ৰাক্- বিদ্যালয় শিক্ষক প্রশিক্ষণ সম্পন্ন🔯

📝বঙাইগাঁওঃ ২২ মে’: অসম জাতীয় বিদ্যালয় শিক্ষা সংসদ চমুকৈ ‘এজবেক’ৰ পশ্চিম মণ্ডল (ধুবুৰী, কোকৰাঝাৰ, চিৰাং, বঙাইগাওঁ আৰু গোৱালপাৰা জিলা সামৰি ) সমিতিৰ উদ্যোগত আৰু বঙাইগাঁও জিলা সমিতিৰ সহযোগত তথা ‘এজবেক’ কেন্দ্ৰীয় সমিতিৰ তত্ত্বাৱধানত উত্তৰ বঙাইগাঁৱস্থিত জ্ঞানোদয় জাতীয় বিদ্যালয় প্ৰাংগণত শনি আৰু দেওবাৰে (২১ আৰু ২২ মে) দুদিনীয়া কাৰ্যসূচীৰে প্রাক্‌-বিদ্যালয় শিক্ষক প্রশিক্ষণ অনুষ্ঠিত হয়। উক্ত প্রশিক্ষণ কাৰ্যসূচীত প্রশিক্ষক হিচাপে উপস্থিত থাকে গুৱাহাটী নুনমাটিস্থিত অসম জাতীয় বিদ্যালয়ৰ জ্যেষ্ঠা শিক্ষয়িত্ৰী অপৰাজিতা দত্ত, জুলি শইকীয়া আৰু জুৰি গোস্বামীয়ে । প্ৰশিক্ষণৰ আৰম্ভণিতে ধুবুৰী, কোকৰাঝাৰ, চিৰাং,বঙাইগাওঁ আৰু গোৱালপাৰা জিলা জাতীয় বিদ্যালয় সমন্বয়ৰক্ষী সমিতিৰ সভাপতি যথাক্রমে ৰঞ্জিত কুমাৰ দাস, হাসৰ আলী, জ্যোতিষ মণ্ডল, অৰুণ ৰায় আৰু তৰুণ চাংমাইয়ে একোখনকৈ ফুলাম গামোচাৰে প্ৰশিক্ষকসকলক আদৰণি জনায় । জ্ঞানোদয় জাতীয় বিদ্যালয়ৰ জ্যেষ্ঠা শিক্ষয়িত্ৰী কৰবী কংকনা ৰাজ কাশ্যপ দাসে আঁত ধৰা অনুষ্ঠানটোত মুখ্য অতিথি হিচাপে উপস্থিত থাকে বঙাইগাঁও জিলাৰ বিদ্যালয়সমূহৰ পৰিদৰ্শক জ্যোৎস্নাৰাণী বৰ্মন । বঙাইগাঁও জিলাৰ বিদ্যালয় সমূহৰ পৰিদৰ্শক জ্যোৎস্নাৰাণী বৰ্মনে বন্তি প্ৰজ্বলন কৰি অনুষ্ঠানৰ শুভাৰম্ভ কৰাৰ পিছতে সমগ্ৰ অসমৰ জাতীয় বিদ্যালয়সমূহৰ সমূহীয়া গীত  'আলোকসন্ধানী আশাৰ আলয়' শীৰ্ষক গীতটি পৰিৱেশন কৰা হয় ৷ 

প্ৰশিক্ষণৰ নিয়মাৱলী ঘোষণা কৰে এজবেকৰ পশ্চিম মণ্ডল সমিতিৰ আহ্বায়ক তথা জ্ঞানোদয় জাতীয় বিদ্যালয় বঙাইগাঁৱৰ সচিব অশোক দাসে ৷  উল্লেখ্য যে প্ৰশিক্ষণত বক্তা জুলি শইকীয়াই 'প্রাক্- বিদ্যালয় শিক্ষা ব্যৱস্থা আৰু ইয়াৰ গুৰুত্ব', শীৰ্ষক বিষয়ৰ ওপৰত, বক্তা জুৰি গোস্বামীয়ে 'শাৰীৰিক শিক্ষা আৰু প্ৰাক্ - বিদ্যালয়ত ইয়াৰ প্ৰয়োগ' বিষয়ৰ ওপৰত, জুলি শইকীয়া আৰু জুৰি গোস্বামীয়ে ' প্ৰাক্ বিদ্যালয়ত ভাষা বিকাশৰ গুৰুত্ব, ভাষা বিকাশৰ বিভিন্ন ক্রিয়া,শিশু কবিতা,ওমলা গীত, আখৰ লিখাৰ কৌশলৰ' ওপৰত , জুলি শইকীয়াই 'শিশুৰ অগ্ৰগতিত বৌদ্ধিক বিকাশৰ ভূমিকা 'শীৰ্ষক বিষয়ৰ ওপৰত আৰু বক্তা জুৰি গোস্বামীয়ে 'প্ৰাক্ বিদ্যালয় পৰীক্ষাবিহীন ব্যৱস্থা' শীৰ্ষক বিষয়ৰ ওপৰত প্ৰশিক্ষণ প্ৰদান কৰে ৷ লক্ষ্যণীয় যে সমগ্র শিকণ-শিক্ষন কাৰ্যসূচী পৰিচালনা আৰু পর্যবেক্ষণ কৰে এজবেক প্ৰশিক্ষণৰ সমন্বয়ক তথা অসম জাতীয় বিদ্যালয়ৰ জ্যেষ্ঠা শিক্ষয়িত্ৰী অপৰাজিতা দত্তই । প্ৰশিক্ষণৰ শেষ ভাগত ভাৱ বিনিময়ৰ লগতে প্ৰশিক্ষাৰ্থীসকলৰ মূল্যায়ণৰ ব্যৱস্থা গ্ৰহণ কৰা হয় । লগতে দুদিনীয়া কাৰ্যসূচীত উপস্থিত তথা সক্ৰিয়ভাৱে অংশ গ্ৰহণ কৰা প্ৰতিগৰাকী  প্রশিক্ষার্থীক প্রমাণ পত্ৰ প্ৰদান কৰা হয় । জ্ঞানোদয় জাতীয় বিদ্যালয়ৰ জ্যেষ্ঠা শিক্ষয়িত্ৰী জয়ন্তী চৌধুৰীয়ে শলাগৰ শৰাই আগবঢ়োৱাৰ শেষত জাতীয় সংগীতেৰে দুদিনীয়া কাৰ্যসূচীৰ সামৰণি পৰে।🔯