🔯বঙাইগাঁৱৰ চাপৰাকাটা ৰে'ল ষ্টেচনত নিৰ্মিয়মান অভাৰব্ৰীজ সম্পৰ্কত ৰাজহুৱা সভা🔯

🔯বঙাইগাঁৱৰ চাপৰাকাটা ৰে'ল ষ্টেচনত নিৰ্মিয়মান অভাৰব্ৰীজ সম্পৰ্কত ৰাজহুৱা সভা🔯

📝বঙাইগাঁওঃ ২২ মে':  বঙাইগাঁৱৰ চাপৰাকাটা ৰে'ল ষ্টেচনত নিৰ্মিয়মান অভাৰব্ৰীজ সম্পৰ্কত দেওবাৰে পোপৰাগাঁও এম ই স্কুল প্ৰাংগণত এখন ৰাজহুৱা সভা অনুষ্ঠিত হয় ৷ উল্লেখ্য যে নিৰ্মিয়মান ৰে'লৱে অভাৰব্ৰীজখন স্থানীয় পথচাৰীৰ বাবে সুবিধাজনক নহ'ব বুলি এক শংকাৰ পৰিৱেশ সৃষ্টি হৈছে আৰু ইয়াৰ আশু সমাধান বিচাৰিছে ৷ গতিকে এই বিষয়ে বিস্তাৰিতভাৱে আলোচনা আৰু পৰৱৰ্তী ব্যৱস্থা গ্ৰহণৰ নিমিত্তে এই ৰাজহুৱা সভাৰ আয়োজন কৰে ৷ সভাৰ অন্যতম আহ্বায়ক অশোক কুমাৰ দেৱৰ সভাপতিত্বত অনুষ্ঠিত ৰাজহুৱা সভাৰ উদ্দেশ্য ব্যাখ্যা কৰে ভূৱন চন্দ্ৰ দাসে ৷ সভাত বিশিষ্ট সমাজকৰ্মী মিহিৰ কুমাৰ বৰ্মনে ৰাইজ একগোট হৈ সমস্যাসমূহ বিভাগীয় কৰ্তৃপক্ষৰ শীৰ্ষ বিষয়াসকলক অৱগত কৰি সমাধান কৰাৰ বাবে আহ্বান জনায় ৷ আনহাতে কিৰণ বৰ্মনে সমস্যাটো সমাধান কৰাৰ বাবে বিধায়ক ফণীভূষণ চৌধুৰীৰ জৰিয়তে জিলা উপায়ুক্তক অৱগত কৰিবলৈ পৰামৰ্শ আগবঢ়ায় ৷

সভাত বিভিন্নজনে বক্তব্য ৰাখে আৰু পৰামৰ্শ আগবঢ়োৱাৰ অন্তত তিনিটা সৰ্বসন্মত প্ৰস্তাৱ গ্ৰহণ কৰে সভাই ৷ সেই অনুসৰি সভাই চাপৰাকাটা-পোপৰাগাঁও  সংযোগী  পথৰ ওপৰত নিৰ্মীয়মান অভাৰব্ৰীজখনৰ ত্ৰুটিপূৰ্ণ নিৰ্মাণৰ সংক্ৰান্তত আশু সমাধানৰ বাবে বিধায়ক ফণীভূষণ চৌধুৰী আৰু বঙাইগাঁও জিলা উপায়ুক্তক অৱগত কৰাৰ লগতে সমস্যাটো সন্দৰ্ভত বিভাগীয় কৰ্তৃপক্ষৰ শীৰ্ষতম বিষয়াসকলকো স্মাৰক পত্ৰযোগে বিষয়টো জনাবলৈ প্ৰস্তাৱ গ্ৰহণ কৰে ৷ ইয়াৰোপৰি ৰাইজে সমস্যাটো সমাধানৰ বাবে উৰ্ধতম কৰ্তৃপক্ষৰ দৃষ্টি আকৰ্ষণ কৰাৰ তাগিদাত কিছু গণতান্ত্ৰিক আন্দোলনৰ কাৰ্যসূচী ৰূপায়ণ কৰাৰ প্ৰস্তাৱৰ লগতে সমস্যাটো সমাধানৰ বাবে পুঁজি সংগ্ৰহৰ আৱশ্যক হোৱাৰ পৰিপ্ৰেক্ষিতত ৰাইজৰ দান বৰঙণি সংগ্ৰহ কৰাৰ বাবেও প্ৰস্তাৱ গ্ৰহণ কৰে ৷ শেষত সভাপতি অশোক কুমাৰ দেৱে নিজৰ বক্তব্যত সমস্যাটো সমাধান কৰিবলৈ হলে গাঁওবাসীয়ে সন্মিলিতভাৱে আগবাঢ়িব লাগিব বুলি কয় ৷🔯