🔯বঙাইগাঁৱত অসম ৰাজ্যিক পৰিবহন নিগমৰ নতুন বাছ আস্থান তথা কাৰ্যালয় মুকলি🔯

🔯বঙাইগাঁৱত অসম ৰাজ্যিক পৰিবহন নিগমৰ নতুন বাছ আস্থান তথা কাৰ্যালয় মুকলি🔯

🔯গুলপীয়া বাছৰ সেৱা যাত্ৰীৰ অভাৱৰ বাবেহে সাময়িকভাৱে বন্ধ কৰা হৈছিলঃ চাৰিখন চলিবলৈ আৰম্ভ কৰিছে🔯 

📝বঙাইগাঁওঃ ২৭ মে’: অসম ৰাজ্যিক পৰিবহন নিগমক নতুন ৰূপ দিয়াৰ বাবে অসমৰ  মুখ্যমন্ত্ৰীয়ে  গ্ৰহণ কৰা পৰিকল্পনাৰ অংশ হিচাপে বঙাইগাঁও চহৰৰ পুৰণি আস্থানটো সলনি কৰি শুকুৰবাৰে বৰপাৰাত নতুন বাছ আস্থান তথা কাৰ্যালয় গৃহৰ আনুষ্ঠানিকভাৱে মুকলি কৰা হয় ৷ অসম ৰাজ্যিক পৰিবহন নিগমৰ পৰিচালন সঞ্চালক ৰাহুল চন্দ্ৰ দাসে বিভাগীয়ভাৱে নতুন বাছ আস্থানৰ কাৰ্যালয়টো আনুষ্ঠানিকভাৱে মুকলি কৰে৷ এই উপলক্ষে অনুষ্ঠিত অনুষ্ঠানত পৰিবহন নিগমৰ পৰিচালন সঞ্চালক ৰাহুল চন্দ্ৰ দাসে নিজৰ বক্তব্যত কয় যে পৰিবহন নিগমে বিভাগটোক আধুনিকীকৰণৰ বাবে বিভিন্ন পদক্ষেপ গ্ৰহণ কৰিছে চৰকাৰে ৷ নিগমৰ অধীনত অচিৰেই বৈদ্যুতিক বাছ,  চিএনজি বাছ গুৱাহাটীত চলিব ৷ বাছ আস্থানসমূহক আধুনিকীকৰণ কৰাৰ বাবে ইতিমধ্যে ভবা হৈছে আৰু পৰ্যায়ক্ৰমে আগবঢ়া হ'ব ৷ আনহাতে বঙাইগাঁও জিলাৰ উপায়ুক্ত নৱদ্বীপ পাঠক উপস্থিত থাকি নিজৰ বক্তব্যত কয় যে তেওঁ বঙাইগাঁও জিলাৰ উপায়ুক্ত হিচাপে দায়িত্বভাৰ গ্ৰহণ কৰাৰ পিচতে প্ৰথমে অসম ৰাজ্যিক পৰিবহন নিগমৰ পুৰণি আস্থানটোৰ পৰা বৰপাৰাৰ এই ঠাইডোখৰলৈ আস্থানটো অহাটোক অগ্ৰাধিকাৰ দিছিল আৰু সকলো পক্ষৰ সহযোগত সেয়া অৱশেষত হৈ উঠিল ৷ সেয়ে আগলৈও যদি কিবা সহায়ৰ প্ৰয়োজন হয়, তেতিয়াহলে জিলা প্ৰশাসনে পৰিবহন নিগমক সহায় কৰিব বুলিও কয় ৷ 

সেইদৰে অসম ৰাজ্যিক পৰিবহন নিগমৰ উপাধ্যক্ষ প্ৰণৱজ্যোতি লহকৰে কয় যে নামনি অসমত অসম ৰাজ্যিক পৰিবহন নিগমৰ যি সেৱা সেই সেৱাৰ পৰিসৰৰ বাবে নিগমৰ আৰু বহু কৰণীয় আছে ৷ সেইদৰে ব্যক্তিগত খণ্ডৰ পৰিবহন ব্যৱস্থাৰ সৈতেও পৰিবহন নিগমে ফেৰ মাৰিবলগীয়া হৈছে ৷ ইয়াৰ বাবে নিগমৰ আধুনিকীকৰণৰ প্ৰয়োজন হৈ পৰিছে আৰু ইয়াৰ বাবে কিছু পলম হৈছিল ৷ কিন্তু শেহতীয়াভাৱে মুখ্যমন্ত্ৰী, নিগমৰ পৰিচালন সঞ্চালক আদিৰ নেতৃত্বত নিগমৰ বাছ আস্থানসমূহ  আধুনিকীকৰণকে ধৰি বিভিন্ন পদক্ষেপ গ্ৰহণৰ পৰিকল্পনা গ্ৰহণ কৰা বুলি উল্লেখ কৰে ৷ অনুষ্ঠানত বঙাইগাঁও পৌৰসভাৰ সভাপতি সুবোধ চন্দ্ৰ দাস , পৌৰসভাৰ প্ৰাক্তন সভাপতি তথা সমাজকৰ্মী প্ৰভাত বৈষ্ণৱেও বক্তব্য ৰাখে ৷ প্ৰাক্তন পৌৰপতিগৰাকীয়ে নতুনকৈ মুকলি কৰা বাছ আস্থানটোৰ মাটি নিগমে ক্ৰয় কৰাৰ পৰা আজিৰ অৱস্থালৈ উপনীত হোৱালৈকে সকলো কথা বিৱৰি কয় ৷ উল্লেখ্য যে ৰাজ্যিক পৰিবহন কৰ্মচাৰী সন্থাৰ উপসভাপতি ছুলেমান আলীয়ে উদ্দেশ্য ব্যাখ্যা কৰা অনুষ্ঠানত আদৰণি ভাষণ ৰাখে সন্থাৰ সাধাৰণ সম্পাদক দ্বীজেন লহকৰে ৷ অনুষ্ঠানত বঙাইগাঁও জিলা তথ্য আৰু জনসম্পৰ্কৰক্ষী বিষয়া বিনুৰাণী ৰাজবংশী, বীৰঝৰা মহাবিদ্যালয়ৰ অৱসৰপ্ৰাপ্ত অধ্যক্ষ মৃগেন দাসকে ধৰি বিশিষ্ট ব্যক্তি, নিগমৰ বিষয়া- কৰ্মচাৰীসকল তথা স্থানীয় লোক উপস্থিত থাকে ৷ উল্লেখ্য যে  বঙাইগাঁৱৰ মহাত্মা গান্ধী পথত আছিল পৰিবহন নিগমৰ পুৰণি আস্থানটো। চহৰখনৰ মাজ মজিয়াত অতি কম পৰিসৰত থকা কাৰ্যালয় তথা আস্থানটো বৰপাৰালৈ স্থানান্তৰ কৰাত যান -জঁটৰ সমস্যা যথেষ্ট লাঘৱ হ’ব বুলি আশা কৰা হৈছে ।

ইপিনে গুৱাহাটীত গুলপীয়া বছ বন্ধ হোৱা বিষয়টো সন্দৰ্ভত নিগমৰ পৰিচালন সঞ্চালক ৰাহুল চন্দ্ৰ দাসে সংবাদ মাধ্যমৰ আগত কয় যে গুলপীয়া বাছ সম্পূৰ্ণ বন্ধ কৰা নাই। গুলপীয়া বাছৰ ডিমাণ্ড নাই বাবে সাময়িকভাৱে বন্ধ কৰা হৈছে ৷ ৰাইজে বিচাৰিলে পুনৰ আৰম্ভ হ’ব এই সেৱা ৷ আনহাতে অসম ৰাজ্যিক পৰিবহন নিগমৰ উপাধ্যক্ষ প্ৰণৱজ্যোতি লহকৰে 'পিংক বাছ' বন্ধ সন্দৰ্ভত সংবাদ মাধ্যমৰ আগত কয় যে, ২১ খন বাছ বন্ধ হ'ব বুলি ওলোৱা খৱৰটো সম্পূৰ্ণ সত্য নহয় । লগতে কয় যে ২১ খন নহয় ২৫ খন বাছ আছে ৷ ক'ভিড পৰিস্থিতিৰ বাবে এই সেৱা বন্ধ হৈ আছিল ৷ পিছত আৰম্ভ হ’লেও কেইখনমান বাছ মেৰামতি কৰিব দিয়া হৈছে ৷  চাৰিখন বাছ ২২ মে'ৰ পৰা নতুনকৈ নিৰ্দ্ধাৰণ কৰা সময়সূচী অনুসৰি পুনৰ চলাচল কৰি আছে ৷ বাকী গুলপীয়া বাছৰ সেৱা শেহতীয়াভাৱে সাময়িকভাৱেহে বন্ধ কৰা হৈছে ৷ ৰাইজে বিচাৰিলে পুনৰ আৰম্ভ হ’ব ৷ লগতে বাকী থকা বাছসমূহো অতিশীঘ্ৰেই চলাচল কৰিব বুলি সংবাদ মাধ্যমৰ আগত প্ৰকাশ কৰে ৷তেওঁ লগতে কয় যে ৰাজ্যৰ অইন জিলাসমূহতো গুলপীয়া বাছ চলাচল কৰাৰ বাবে অসম ৰাজ্যিক পৰিবহন নিগমে পদক্ষেপ গ্ৰহণ কৰিছে । সেইদৰে অচিৰেই গুৱাহাটীবাসীয়ে দুশখন বৈদ্যুতিক আৰু এশখন চিএনজি বাছ পাব বুলিও কয় ৷🔯