🔯বঙাইগাঁৱত অনুষ্ঠিত অসম বহুভাষিক কবি সন্মিলনৰ প্ৰথম বাৰ্ষিক অধিৱেশন সম্পন্ন🔯

🔯বঙাইগাঁৱত অনুষ্ঠিত অসম বহুভাষিক কবি সন্মিলনৰ প্ৰথম বাৰ্ষিক অধিৱেশন সম্পন্ন🔯

📝বঙাইগাঁওঃ ১৬ মে’: অসম বহুভাষিক কবি সন্মিলনৰ প্ৰথম বাৰ্ষিক অধিৱেশনখনি দুদিনীয়া কাৰ্যসূচীৰে বঙাইগাঁৱত অনুষ্ঠিত হৈ যায়৷ অধিৱেশন উপলক্ষে দেওবাৰে প্ৰথম দিনৰ কাৰ্যসূচী অনুসৰি বিয়লি প্রতিনিধিৰ নাম পঞ্জীয়ন আৰু ইয়াৰ পিছতে বীৰঝৰা উচ্চতৰ মাধ্যমিক  বিদ্যালয়ৰ সভাকক্ষত কেন্দ্রীয় কার্যনির্বাহক সভা অনুষ্ঠিত হয় ৷ আনহাতে দ্বিতীয় দিনা অৰ্থাৎ সোমবাৰে পুৱা বীৰঝৰা পাব্লিক লাইব্ৰেৰীৰ প্ৰাংগণত অসম বহুভাষিক কবি সন্মিলনৰ পতাকা উত্তোলনেৰে কাৰ্যসূচী মুকলি কৰে সন্মিলনৰ সভাপতি অজিত দত্তই ৷ ইয়াৰ পাচত স্মৃতি তৰ্পণ কৰা হয় ৷ আনহাতে  বীৰঝৰা পাব্লিক লাইব্ৰেৰীত অনুষ্ঠিত হয় প্ৰতিনিধি সভা ৷  সন্মিলনৰ উপদেষ্টা বিচিত্ৰ শৰ্মাই বন্তি প্ৰজ্বলন কৰি শুভ উদ্বোধন কৰা প্ৰতিনিধি সভাৰ অন্তত অসম বহুভাষিক কবি সন্মিলনৰ সভাপতি অজিত দত্তৰ সভাপতিত্বত অনুষ্ঠিত হয় মুকলি সভা৷ সমবেত সংগীতেৰে আৰম্ভ হোৱা মুকলি সভাত আদৰণী ভাষণ প্ৰদান কৰে সন্মিলনৰ কাৰ্যকৰী সভাপতি কাজী শ্বমীমে৷ আনহাতে উদ্দেশ্য ব্যাখ্যা আৰু প্ৰধান সম্পাদকৰ প্ৰতিবেদন পাঠ কৰে প্ৰধান সম্পাদক শৈলেন্দ্ৰ প্ৰসাদ শৰ্মাই৷ একেদৰে বিত্তীয় প্ৰতিবেদন পাঠ কৰে কোষাধ্যক্ষ অপূৰ্ব গোস্বামীয়ে৷ মুকলি সভাত বঙাইগাঁও জিলাৰ অতিৰিক্ত আৰক্ষী অধীক্ষক লুণা সোণোৱালে  বিশিষ্ট অতিথি হিচাপে উপস্থিত থাকি কবিতা প্ৰতিযোগিতাত বঁটাবিজয়ী সকলক বঁটা প্ৰদান কৰাৰ লগতে গ্ৰন্থও উন্মোচন কৰে ৷ সেইদৰে বক্তব্যও ৰাখে ৷ সভাত সন্মিলনৰ উপদেষ্টা বিচিত্ৰ শৰ্মা, দীনেশ চন্দ্ৰ দাস, অৰুণা দত্ত বৰদলৈ, বহুভাষিক কবি সন্মিলনৰ উপ-সভাপতি ড॰ হৰ্ক বাহাদুৰ ছেত্ৰী, ড॰ তৰুণ কুমাৰ বাহাদুৰ আৰু ৰূপজ্যোতি দত্তকে আদি কৰি কেইবাগৰাকী ব্যক্তি উপস্থিত থাকে ৷ মুকলি সভাত অসম বহুভাষিক কবি সন্মিলনৰ বঙাইগাঁও অধিৱেশনৰ লগত সংগতি ৰাখি ৰাজ্যিক ভিত্তিত আয়োজিত বহুভাষিক স্বৰচিত কবিতা প্ৰতিযোগিতাত স্থানপ্ৰাপ্তসকলক বঁটাসমূহ প্ৰদান কৰা হয় ৷ 

উল্লেখ্য যে কবিতা প্ৰতিযোগিতাত প্ৰথম স্থান লাভ কৰা বৰপেটাৰ মেটুৱাকুছিৰ গুণজিৎ শইকীয়া ( পুনৰ্জন্ম),দ্বিতীয় স্থান লাভ কৰা গোলাঘাটৰ বৰুৱাগাঁৱৰ দিব্যজ্যোতি বৰুৱা ( জীৱন), আৰু তৃতীয় স্থান লাভ কৰা, বঙাইগাঁৱৰ প্ৰিয়া কুমাৰী শ্বাহ( মেৰা সাথ দেনা) ক ' হেমচন্দ্ৰ দত্ত আৰু দীপেশ্বৰী দত্ত সোঁৱৰণী’ বঁটা প্ৰদান কৰা হয় ৷ অজিত দত্তৰ পৰিয়ালে আগবঢ়োৱা এই বঁটাসমূহ পৰিয়ালৰ হৈ বিজয়া দত্ত, অজিত দত্ত আৰু অতিৰিক্ত আৰক্ষী অধীক্ষক লুণা সোণোৱালে প্ৰদান কৰে ৷ সেইদৰে চতুৰ্থ স্থান লাভ কৰা  যোৰহাটৰ যোগদুৱাৰৰ ৰীতা বৰুৱা ( হাফ দা স্কাই) আৰু পঞ্চম স্থান লাভ কৰা  মৰিয়নিৰ নাগাজাংকা নগাঁৱৰ অৰুণ গগৈ( আখৰা) ক মুকুন্দ শৰ্মা সোঁৱৰণী বঁটা প্ৰদান কৰা হয় ৷ বঁটা প্ৰদান কৰে প্ৰয়াত মুকুন্দ শৰ্মাৰ সহধৰ্মিনী মিনতি দেৱী আৰু দীনেশ দাসে৷ আনহাতে ষষ্ঠ স্থান লাভ কৰা তেজপুৰৰ বালিপুখুৰী তিনিআলিৰ মনোজ বৰা ( চাকৰিৰ বিজ্ঞাপন ওলাইছে) অনুপস্থিত থকাত তেওঁৰ বঁটাটো শৰ্মাৰ পৰিয়ালে সমিতিক অৰ্পণ কৰে৷ বঁটা তিনিটা মিনতি দেৱীৰ পৰিয়ালে আগবঢ়াইছে ৷ সেইদৰে সভাত অসম বহুভাষিক কবি সন্মিলনৰ সভাপতি অজিত দত্তই ইন্দুমতি শইকীয়াক 'মুকুন্দ শৰ্মা সোঁৱৰণী ' বিশেষ বঁটা প্ৰদান কৰে ৷ সভাত কেইবাগৰাকীও ব্যক্তিক স্মাৰক, মানপত্ৰ আদি প্ৰদান কৰি সন্মান যঁচা হয় ৷ একেদৰে উন্মোচন কৰা হয় কেইবাখনো গ্ৰন্থ ৷ সভাত দীনেশ চন্দ্ৰ দাসৰ 'জগতগুৰু শ্ৰীমন্ত শংকৰদেৱ' আৰু 'শক্তিয়েই জীৱন' ,  সাধন দেৰ ' শংখদ্বীপ' আৰু 'ঐ মহামানৱ আছে, জ্যোৎস্না বিশ্বাস দেৰ উপন্যাস 'প্ৰেমৰ সিপাৰে প্ৰেম', প্ৰাণেশ্বৰ কলিতাৰ গীতৰ সংকলন 'ঋতু আহে ঋতু যায়' আৰু অধিৱেশনৰ লগত সংগতি ৰাখি ড°নুৰ জামালৰ মুখ্য সম্পাদনাত প্ৰকাশ কৰা কাব্য সংকলন 'কাব্যকল্প' আদি গ্ৰন্থ উন্মোচন কৰা হয়৷ সভাৰ বিভিন্ন কাৰ্যসূচীৰ আঁত ধৰে মালা বৰুৱা আৰু মীনা দেৱীয়ে ৷ বিয়লি অনুষ্ঠিত হয় কবি সন্মিলন ৷ অসম বহুভাষিক কবি সন্মিলনৰ সভাপতি অজিত দত্তই শুভ উদ্বোধন কৰা কবি সন্মিলখন অধিৱেশনৰ অভ্যৰ্থনা সমিতিৰ সভাপতি কাজী শ্বামীমে সঞ্চালনা কৰে ৷ কবি সন্মিলনত ৰাজ্যখনৰ বিভিন্ন প্ৰান্তৰ পৰা অহা শতাধিক কবিয়ে বিভিন্ন ভাষাৰ স্বৰচিত কবিতা পাঠ কৰি অনুষ্ঠানটোক জীপাল কৰি তোলে৷🔯