🔯৩০ জুনত মুকলি হ'ব কেএচিৰ কাৰ্যালয়🔯

🔯৩০ জুনত মুকলি হ'ব কেএচিৰ কাৰ্যালয়🔯

🔯মুখ্যমন্ত্ৰীকে ধৰি কেইবাগৰাকীও মন্ত্ৰীক আমন্ত্ৰণৰ সিদ্ধান্ত🔯 

📝বঙাইগাঁওঃ ১৩ জুনঃ কমতাপুৰ স্বায়ত্বশাসিত পৰিষদৰ অস্থায়ী কাৰ্যালয়টো অহা ৩০ জুনত মুকলি কৰা হ'ব ৷ আজি বঙাইগাঁও জিলাৰ উত্তৰ শালমাৰাস্থিত কেএচিৰ অস্থায়ী কাৰ্যালয়ত আয়োজন কৰা এখন সংবাদ মেলত মুখ্য কাৰ্যাবাহী পাৰিষদ গোকুল বৰ্মনে এই কথা প্ৰকাশ কৰে ৷ উল্লেখ্য যে উত্তৰ শালমাৰাস্থিত অসম পৰ্যটন বিভাগৰ অধীনৰ প্ৰশান্তি ল'জৰ গৃহতে সদ্যহতে কেএচিৰ অস্থায়ী কাৰ্যালয়টো মুকলি কৰা হ'ব ৷ ইতিমধ্য ইয়াৰ বাবে গৃহটোক দিয়া হৈছে নতুন ৰূপ ৷ সংবাদ মেলত মুখ্য কাৰ্যবাহী পাৰিষদ গোকুল বৰ্মনে উল্লেখ কৰা মতে কেএচিৰ প্ৰথমখন কাৰ্যবাহী পাৰিষদৰ বৈঠক আৰু সাধাৰণ বৈঠকতে অস্থায়ী কাৰ্যালয় হিচাপে প্ৰশান্তি ল'জটো ব্যৱহাৰ কৰাৰ বাবে সিদ্ধান্ত গ্ৰহণ কৰা হৈছিল আৰু সেই অনুসৰি ৩০ জুনত কাৰ্যালয়টো মুকলি কৰা হ'ব ৷ কেএচিৰ কাৰ্যালয় মুকলি অনুষ্ঠানত অসমৰ মুখ্যমন্ত্ৰী ডঃ হিমন্ত বিশ্ব শৰ্মা, ভৈয়াম জনজাতি উন্নয়ন বিভাগৰ মন্ত্ৰী ডাঃ ৰণোজ পেগু, বঙাইগাঁও জিলাৰ অভিভাৱক মন্ত্ৰী ৰঞ্জিত কুমাৰ দাস, মন্ত্ৰী পীযুষ হাজৰিকাৰ লগতে নতুনকৈ মন্ত্ৰীত্ব লাভ কৰা জয়ন্ত মল্ল বৰুৱাক আমন্ত্ৰণ জনোৱাৰ সিদ্ধান্ত গ্ৰহণ কৰা বুলিও উল্লেখ কৰে ৷ 

আনহাতে এই অনুষ্ঠানটো সফলভাৱে ৰূপায়ণ কৰাৰ বাবে ইতিমধ্যে পৰিষদৰ উপাধ্যক্ষ সুকেন ৰায়ক সভাপতি আৰু কাৰ্যবাহী পাৰিষদ অতুল কুমাৰ ৰায়ক সাধাৰণ সম্পাদক তথা আন কাৰ্যবাহী পাৰিষদ আৰু কেএচিৰ সাধাৰণ সদস্য সকলকলৈ এখন সমিতি গঠন কৰি দিয়া হৈছে বুলিও কয় ৷ মুখ্য কাৰ্যবাহী পাৰিষদগৰাকীয়ে কেএচিৰ কাৰ্যালয় মুকলি অনুষ্ঠানত এক লাখ লোকক সমবেত কৰাই মুখ্যমন্ত্ৰীক আদৰি আনি নতুন কমতাপুৰৰ আধাৰশিলা হিচাপে কাৰ্যালয়টো মুকলি কৰাৰ বাবে সিদ্ধান্ত গ্ৰহণ কৰা বুলিও উল্লেখ কৰে ৷ এই অনুষ্ঠানত অঞ্চলটোত বসবাস কৰা জাতি - জনগোষ্ঠীৰ লগতে  দল - সংগঠনসমূহক আমন্ত্ৰণ জনোৱা বুলি কৈ সকলোৱে মিলি এই কমতাপুৰ স্বায়ত্ব শাসিত পৰিষদৰ সামগ্ৰিক বিকাশ তথা উন্নতি কৰাৰ বাবে চিন্তা চৰ্চা কৰা বুলি কয় ৷ সংবাদ মেলত মুখ্য কাৰ্যবাহী পাৰিষদ বৰ্মনে উল্লেখ কৰা মতে অসম চৰকাৰে কেএচিক ইতিমধ্যে ১১ কোটি টকাৰ আঁচনি প্ৰদান কৰিছে যদিও কেএচিৰ বিষয়া- কৰ্মচাৰি নথকাৰ কাৰণে আঁচনিসমূহ ৰূপায়ণৰ ক্ষেত্ৰত থমকি ৰ'বলগীয়া হৈছিল যদিও সেই অভাৱ দূৰ কৰিছে চৰকাৰে ৷ সেয়ে কাৰ্যালয় মুকলি হোৱাৰ পিচতে কামবোৰ আৰম্ভ কৰা হ'ব ৷ সংবাদ মেলত কেএচিৰ অধ্যক্ষ হিতেশ্বৰ বৰ্মনে কয় যে কেএচিৰ কাম কাজসমূহৰ দ্বাৰা যাতে অঞ্চলটোৰ ৰাইজৰ উন্নয়ন হয় সেই দিশটোক গুৰুত্ব প্ৰদান কৰিহে কৰা হ'ব ৷ সংবাদ মেলত কেএচিৰ উপাধ্যক্ষ সুকেন ৰায়, কাৰ্যবাহী পাৰিষদ অতুল কুমাৰ ৰায় আৰু পূৰবী সৰকাৰ উপস্থিত আছিল ৷🔯