🔯বঙাইগাঁৱৰ কাকৈজানা সংৰক্ষিত বনাঞ্চলত বিশ্ব পৰিৱেশ দিৱস উদযাপন🔯

🔯বঙাইগাঁৱৰ কাকৈজানা সংৰক্ষিত বনাঞ্চলত বিশ্ব পৰিৱেশ দিৱস উদযাপন🔯

🔯বঙাইগাঁও চহৰত উলিওৱা হ‘ল সজাগতা সমদল🔯

📝বঙাইগাঁওঃ ৫ জুনঃ আজি বিশ্ব পৰিৱেশ দিৱস উপলক্ষে বঙাইগাঁও জিলা প্ৰশাসন আৰু বঙাইগাঁওস্থিত আই উপত্যকা বন সংমণ্ডল প্ৰাধিকাৰীৰ উদ্যোগত কাকৈজানা সংৰক্ষিত বনাঞ্চলৰ ঠাকুৰাণীপাৰাত গছপুলি ৰোপণ তথা এখন সজাগতা সভা অনুষ্ঠিত কৰা হয়। এই অনুষ্ঠানত মুখ্য অতিথি হিচাপে উপস্থিত থাকি বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীয়ে গছপুলি ৰোপণ কাৰ্যসূচীৰ শুভাৰম্ভ কৰে। অনুষ্ঠানত বঙাইগাঁও জিলাৰ উপায়ুক্ত নবদ্বীপ পাঠকেও উপস্থিত থাকি গছপুলি ৰোপণ কাৰ্যসূচীত অংশগ্ৰহণ কৰে ৷ ইপিনে গছপুলি ৰোপণ কৰি দিয়া ভাষণত বিধায়ক ফণীভূষণ চৌধুৰীয়ে কয় যে চৰকাৰৰ তৰফৰ পৰা যি গছপুলি ৰোপণ কাৰ্যসূচী ৰূপায়ণ কৰা হৈছে সেয়া তেতিয়াহে ফলপ্ৰসূ হ'ব যদিহে স্থানীয় ৰাইজে সেই গছপুলিসমূহ সংৰক্ষণৰ বাবে কাম কৰে।গছপুলিসমূহ যাতে গৰু-ছাগলীয়ে খাই শেষ নকৰে তাৰ বাবে নজৰ দিব লাগিব স্থানীয় ৰাইজে। তেওঁ আৰু কয় যে চৰকাৰে কাকৈজানা সংৰক্ষিত বনাঞ্চলক অভয়াৰণ্য হিচাপে গঢ়ি তুলিব বিচাৰিছে।নিশ্চয় এয়া বঙাইগাঁৱৰ বাবে ভাল খবৰ।কাকৈজানা সংৰক্ষিত বনাঞ্চল অভয়াৰণ্য হিচাপে ঘোষণা কৰিলে ৰাইজৰ দায়িত্ব আৰু বাঢ়িব। 

আনহাতে বিশ্ব পৰিৱেশ দিৱসৰ এই অনুষ্ঠানত উপস্থিত থাকি বঙাইগাঁও জিলাৰ উপায়ুক্ত নবদ্বীপ পাঠকে কয় যে গছপুলি ৰোপণ  কৰি গোলকীয় উষ্ণতা ১.৫ ডিগ্ৰী কমাব লাগিব, তেতিয়াহে পৃথিৱী মানুহৰ বাবে বাসোপযোগী হৈ থাকিব। সেয়ে ১৯৭২ চনত যি বিশ্ব পৰিৱেশ দিৱসৰ শ্লোগান আছিল আজি ২০২২ বৰ্ষতো সেই একেই শ্লোগান"কেৱল এখনেই পৃথিৱী"উচ্ছাৰিত হৈছে।গতিকে বিনা কাৰণত কোনেও যাতে গছ নাকাটে তাৰ বাবে আমি সমূহ ৰাইজে আজি অংগীকাৰবদ্ধ হ'ব লাগিব। বতৰৰ পৰিবৰ্তন হয় গছৰ অভাৱত।নিজৰ ঘৰখন আমি যেনেদৰে সযতনে ৰাখো নিজৰ চাৰিওফালৰ পৰিৱেশো আমি তেনেদৰে সযতনে ৰাখিব লাগিব। তেতিয়াহে মানুহৰ মংগল হ'ব। নহ'লে পৃথিৱীত মানুহ সুস্থভাৱে জীয়াই থাকিব নোৱাৰিব।গতিকে চৰকাৰ বা প্ৰশাসনে গছপুলি ৰোপণৰ যি কাৰ্যসূচী কৰি আহিছে তাত ৰাইজৰ সহযোগ অতীব কাম্য। সভাত বঙাইগাঁও জিলা আইন সেৱা প্ৰাধিকৰণৰ সচিব তৰুণ দে' আৰু ৰাইজৰ ফালৰ পৰা শিৱম বেচৰকাৰী সংস্থাৰ কৰ্মকৰ্তা হাফিজুৰ ৰহমানেও বক্তব্য ৰাখে।অনুষ্ঠানৰ উদ্দেশ্য ব্যাখ্যা কৰে বন সংৰক্ষক ৰাজেন চৌধুৰীয়ে। অনুষ্ঠানত অতিৰিক্ত উপায়ুক্তদ্বয় শ্যামল ক্ষেত্ৰ গগৈ আৰু পংকজ চমুৱাৰ লগতে যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়, জিলা মিডিয়া এক্সপাৰ্ট জ্যোতিষা শইকীয়া, আই উপত্যকা বন সংমণ্ডলৰ  বন প্ৰাধিকাৰী সুবোধ তালুকদাৰ, সহকাৰী বন সংৰক্ষক অবিনাশ বসুমতাৰী, অভয়াপুৰীৰ আঞ্চলিক বন বিষয়া ,জনস্বাস্থ্য কাৰিকৰী বিভাগৰ বিষয়া তথা স্থানীয় ৰাইজ উপস্থিত থাকে। 

ইপিনে  বঙাইগাঁও জিলা প্ৰশাসন তথা বন বিভাগৰ উদ্যোগত তথা সমগ্ৰ শিক্ষা, বঙাইগাঁৱৰ সহযোগত বিশ্ব পৰিৱেশ দিৱস উপলক্ষ্যে বঙাইগাঁও গান্ধী ময়দানৰ পৰা চহৰৰ মাজেৰে স্কুলীয়া ছাত্ৰ-ছাত্ৰীৰ অংশগ্ৰহণেৰে এটি সজাগতা সমদল উলিওৱা হয়।ছাত্ৰ-ছাত্ৰীসকলৰ লগতে বিদ্যালয়ৰ শিক্ষক-শিক্ষয়িত্ৰীয়েও এই সমদলত সহযোগ কৰে।সমদলটি পতাকা জোকাৰি শুভাৰম্ভ কৰে অতিৰিক্ত উপায়ুক্ত শ্যামল ক্ষেত্ৰ গগৈয়ে। গান্ধী ময়দানৰ পৰা মায়াপুৰী হৈ হাতে হাতে প্লেকাৰ্ড লৈ ছাত্ৰ-ছাত্ৰীসকলে বন সংৰক্ষণৰ শ্লোগানসমূহ প্ৰদৰ্শন কৰি ৰাইজক বন সংৰক্ষণৰ প্ৰয়োজনীয়তা সম্পৰ্কত সজাগ কৰাৰ প্ৰয়াস কৰে। সেইদৰে বঙাইগাঁও অসামৰিক চিকিৎসালয় চৌহদতো বিশ্ব পৰিৱেশ দিৱস উপলক্ষ্যে গছপুলি ৰোপণ কৰা হয় ৷ সেইদৰে বঙাইগাঁও জিলা যুটীয়া স্বাস্থ্য সেৱা সঞ্চালকৰ কাৰ্যালয়ত জিলা স্বাস্থ্য সমিতিৰ উদ্যোগত বিশ্ব পৰিৱেশ দিৱসৰ লগত সংগতি ৰাখি এক চাইকেল সজাগতা সমদল উলিওৱা হয়। ইয়াৰ উপৰিও বিভিন্ন স্কুল,চৰকাৰী কাৰ্যালয় আদিতো গছপুলি ৰোপণ কৰি তথা সজাগতা সমদল আদি উলিয়াই বিশ্ব পৰিৱেশ দিৱস উদযাপন কৰা হয়।আনহাতে বিশ্ব পৰিবেশ দিৱস উপলক্ষে অসম সাহিত্য সভাৰ নিৰ্দেশ অনুসৰি বঙাইগাঁও  সতদল শাখা সাহিত্য সভাই বৰপাৰা প্ৰাইমাৰী বিদ্যালয় আৰু বঙাইগাঁও শিশু উদ্যানত গছপুলি ৰোপণ কৰে ৷ 🔯