🔯বঙাইগাঁৱৰ তিনি স্থানত তিনি বিশিষ্ট ব্যক্তিৰ উপস্থিতিত অষ্টম আন্তঃ ৰাষ্ট্ৰীয় যোগ দিৱস পালনৰ প্ৰস্তুতি🔯

🔯বঙাইগাঁৱৰ তিনি স্থানত তিনি বিশিষ্ট ব্যক্তিৰ উপস্থিতিত অষ্টম আন্তঃ ৰাষ্ট্ৰীয় যোগ দিৱস পালনৰ প্ৰস্তুতি🔯

📝বঙাইগাঁওঃ ১৯ জুনঃ বেদ-বেদান্তৰ দিনৰে পৰা 'যোগে' ভাৰতীয় সংস্কৃতিত বিশেষ উল্লেখযোগ্য স্থান দখল কৰি আহিছে। মানুহৰ আধ্যাত্মিক আৰু শাৰীৰিক দুয়োটা দিশতে 'যোগ' ৰ আছে উল্লেখযোগ্য ভূমিকা। সেয়ে আজি একৈশ শতিকাতো যোগৰ এই ভূমিকা সকলোৱে একেমুখে স্বীকাৰ কৰে আৰু সেইবাবেই ভাৰতৰ লগতে আন আন দেশেও সম্প্ৰতি আন্তঃৰাষ্ট্ৰীয় যোগ দিৱস চৰকাৰীভাৱে পালন কৰে। ২১জুনটো প্ৰতি বছৰে আন্তঃৰাষ্ট্ৰীয় যোগ দিৱস হিচাপে পালন কৰা হয় ৷ এইবেলি ভাৰতৰ স্বাধীনতাৰ ৭৫ বছৰ সম্পূৰ্ণ হোৱা উপলক্ষ্যে উদযাপিত আজাদী কা অমৃত মহোৎসৱৰ লগত সংগতি ৰাখি অসমৰ ৭৫  টা স্থানত বিশিষ্ট ব্যক্তিৰ উপস্থিতিত উলহ মালহেৰে আন্তঃৰাষ্ট্ৰীয় যোগ দিৱস পালন কৰিবলৈ চৰকাৰে সিদ্ধান্ত গ্ৰহণ কৰিছে। বঙাইগাঁও জিলা প্ৰশাসন তথা উত্তৰ শালমাৰা মহকুমা প্ৰশাসনৰ উদ্যোগত বঙাইগাঁও গান্ধী ময়দান, উত্তৰ শালমাৰা মহকুমাত অভয়াপুৰীত আৰু বিদ্যাপুৰৰ ৰাজবাৰীত ক্ৰমান্বয়ে বঙাইগাঁও সমষ্টিৰ বিধায়ক ফণীভূষণ চৌধুৰী, পঞ্চায়ত আৰু গ্ৰামোন্নয়ন বিভাগৰ প্ৰধান সচিব ডা:জে:বি:এক্কা আৰু জনস্বাস্থ্য কাৰিকৰী বিভাগৰ আয়ুক্ত সচিব আকাশ দীপৰ উপস্থিতিত আন্তঃ ৰাষ্ট্ৰীয় যোগ দিৱস উদযাপন কৰা হ'ব। আন্তঃ ৰাষ্ট্ৰীয় যোগ দিৱসৰ মূল কাৰ্যসূচী 'সমূহীয়া যোগ' অনুষ্ঠান পুৱা ৭ বজাৰ পৰা ৮ বজালৈ অনুষ্ঠিত কৰা হ'ব। পতঞ্জলি যোগ সমিতিয়ে আন্তঃ ৰাষ্ট্ৰীয় যোগ দিৱসৰ কাৰ্যসূচীত জিলা প্ৰশাসনক সহায়-সহযোগিতা আগবঢ়াব। অষ্টম শ্ৰেণীৰ পৰা তাৰ ওপৰৰ শ্ৰেণীৰ ছাত্ৰ-ছাত্ৰীয়েও যোগ দিৱসত অংশগ্ৰহণ কৰিব। বঙাইগাঁও জিলাৰ উন্নয়ন খণ্ড আৰু গাঁও-পঞ্চায়ত পৰ্যায়তো আন্তঃৰাষ্ট্ৰীয় যোগ দিৱস উদযাপন কৰা হ'ব। জিলা প্ৰশাসনে বঙাইগাঁৱৰ সমূহ ৰাইজক আন্তঃ ৰাষ্ট্ৰীয় যোগ দিৱসৰ অনুষ্ঠানত অংশগ্ৰহণ কৰিবলৈ আহ্বান জনাইছে।🔯