🔯বঙাইগাঁৱত ৰাজহুৱা বিতৰণ ব্যৱস্থাৰ চাউলৰ চোৰাং বেহা🔯

🔯বঙাইগাঁৱত ৰাজহুৱা বিতৰণ ব্যৱস্থাৰ চাউলৰ চোৰাং বেহা🔯

🔯অবৈধভাৱে মজুত কৰি ৰখা ৭০০ বস্তা চাউল জব্দ🔯

📝বঙাইগাঁওঃ ২০ জুনঃ ৰাজ্যত অব্যাহত আছে চাউলৰ চোৰাং বেহা ৷ বিশেষকৈ ৰাজহুৱা বিতৰণ ব্যৱস্থাৰ চাউলকলৈয়ে চলি আছে এই চোৰাং বেহা ৷ কিন্তু চৰকাৰ তথা খাদ্য আৰু অসামৰিক যোগান বিভাগে ৰোধ কৰিব পৰা নাই ৰাজহুৱা বিতৰণ ব্যৱস্থাৰ চাউলৰ চোৰাং বেহা ৷ বঙাইগাঁও জিলাতো ৰাজহুৱা বিতৰণ ব্যৱস্থাৰ চাউলকলৈ চোৰাং বেহা চলি অহাৰ অভিযোগ উত্থাপিত হৈ আহিছে ৷ ইয়াৰ মাজতে সোমবাৰে বঙাইগাঁও সদৰ থানাৰ অন্তৰ্গত চিটকাগাঁও হীৰাপাৰাত আৰক্ষী আৰু খাদ্য আৰু অসামাৰিক যোগান বিভাগে অভিযান চলাই এটা গৃহৰ পৰা অবৈধভাবে মজুত কৰি ৰখা ৭০০ বস্তাতকৈও অধিক চাউল ভৰ্তি বস্তা উদ্ধাৰ কৰি জব্দ কৰে ৷ ঘৰটোৰ গৰাকী কৃষ্ণ বাহাদুৰ প্ৰধান বুলি জানিব পৰা গৈছে ৷ জানিব পৰামতে কৃষ্ণ বাহাদুৰ প্ৰধানৰ পুত্ৰ বিনোদ প্ৰধানে এনেদৰে চাউলৰ বস্তাসমূহ মজুত কৰি ৰাখিছে ৷ খাদ্য আৰু অসামৰিক যোগান বিভাগে জানিবলৈ দিয়া অনুসৰি বিনোদ প্ৰধান ৰাজহুৱা বিতৰণ ব্যৱস্থাৰ চাউলৰ লগত কোনোধৰণে জড়িত নাই৷ তেনে ক্ষেত্ৰত ইমান বৃহৎ পৰিমাণৰ চাউল ক’ৰ পৰা আহিল সেই লৈ বিভাগে সন্দেহ ব্যক্ত কৰিছে ৷ অভিযানকাৰী দলটোৱে এ এছ ০১ জি ই ৮২০৪ নম্বৰৰ এখন ব’লেৰ’ পিকআপ ভান আৰু এ এছ ১৯ এ চি ৩৫১৬ নম্বৰৰ এখন টেম্প’ও জব্দ কৰিছে৷ অভিযানৰ সময়ত দলটোৱে বিনোদ প্ৰধানক নোপোৱা বুলি জানিব পৰা গৈছে ৷ 

অৱশ্যে সেয়া ৰাজহুৱা বিতৰণ ব্যৱস্থাৰ চাউল হয় নে নহয় এতিয়াও স্পষ্ট হোৱা নাই যদিও বিভাগে ৰাজহুৱা বিতৰণ ব্যৱস্থাৰ চাউল বুলি সন্দেহ প্ৰকাশ কৰিছে ৷ লগতে সমগ্ৰ বিষয়টো সন্দৰ্ভত আৰক্ষী তথা যোগান বিভাগে তদন্ত অব্যাহত ৰাখিছে৷ প্ৰতিটো বস্তাত ৫০ কিলোগ্ৰামকৈ চাউল আছে ৷ উল্লেখ্য যে স্থানীয় সচেতন ব্যক্তিৰ তৎপৰতাত এই চোৰাং চাউলৰ বেহাৰ ঘটনা পোহৰলৈ আহে ৷ জানিব পৰা মতে বিগত এমাহ মান ধৰি ইয়াৰ পকা এই চোৰাং চাইলৰ বেহা চলি আহিছিল ৷ শনিবাৰে নিশাৰ ভাগত দুখন ১২ চকীয়া ট্ৰাকত চাউল বজাই কৰিছিল ৷ সেইদৰে দেওবাৰে নিশাও এইদৰে লঘু বাহনেৰে বাসগৃহৰ পৰা ৰাষ্ট্ৰীয় ঘাইপথলৈ চাউল নি ট্ৰাকত বজাই কৰাৰ বাবে যো - যা চলোৱাৰ সময়তে স্থানীয় লোকে বিষয়টো ধৰা পেলায় ৷ পিচত আৰক্ষীক অৱগত কৰাত সমগ্ৰ ঘটনাটো পোহৰলৈ আহে ৷ এই চোৰাং চাউলৰ বেহাৰ সৈতে জনৈক চহিদুল নামৰ ব্যক্তিৰ লগতে আৰু ব্যক্তি জড়িত থকাৰ অভিযোগ উত্থাপিত হৈছে ৷ আনহাতে এই চোৰাং বেহাৰ লগত জড়িত চক্ৰটোৰ বঙাইগাঁৱৰ জেল্কাঝাৰ অঞ্চলটো গুদাম থকা বুলি জানিব পৰা গৈছে ৷ অৱশ্যে এটা গুদামৰ চাউল জব্দ হোৱাৰ পিচতে বাকী গুদামৰ চাউল আন স্থানলৈ নিয়া বুলিও জানিব পৰা গৈছে ৷🔯